group-telegram.com/Honrawey_Meriwan/831
Last Update:
بەرەو ڕووناکی...!
بۆ هەڵۆ عەیبە نەوی بێت و لە زەلکاوا بژی
کوندەبوو ئاسا لە سووچی ماڵە ڕووخاوا بژی
هەر نەژی داڵێ بهاڵێتە کەلاکی کەیلە خوێن
بەربدا شاخ و لە پێسەی سوورە لێڵاوا بژی
بمرێ ئەو گورگەی قەلادەی نان و ئاوی لێ کرێ
تەک پشیلەی کاسەلێس و کلکی بدناوا بژی
داوەشێ ئەسپێ لە ئاخوڕ بێتە هاوخوان گوێدرێژ
بەر بدا یاڵ و لەگەل جەمعێکی ئەسپاوا بژی
هەڵوەرێ دارێ کە سێبەر با بە تەور و لاپواز
لێیگەڕێن با هەر لە گۆڕی مەرگ و ناراوا بژی
هەڵوەرێ باڵ و پەڕی کۆتر بە ڕەنگی دێزەوە
گەر بە سەرشۆڕی لەگەل قاژوولکە قاڵاوا بژی
با بڕووخێ کۆشکی زێوینی بەفر بەو بەرزەوە
گەر ئەوینداری نسێ بێت و لەگەل تاوا بژی
کوێر دەکەم یارێ کە ڕووی هەڵبێ لە ڕووی مۆنی نەیار
با هەزار ساڵیش لە بێخی نووری ناو چاوا بژی
چۆن بە تێخی مەرگەوە شێری زەلیل هەڵنادڕم
بمرێ بۆ ڕێویلکە فێڵێک و لەگەل داوا بژی
هەڵپڕووکێ پەلکی تێراوی ئەوینی سوورەگوڵ
گەر بە خەمزەی پارە هەڵبێ، هەر لە گەنداوا بژی
تێگەییشتی بۆ (بەرەو ڕووناکی باڵم گرتووە)؟
بۆ هەڵۆ عەیبە نەوی بێت و لە زەلکاوا بژی
✍#کەیوان_جام‌خانە
https://www.group-telegram.com/us/Honrawey_Meriwan.com
BY مەریوان‌شیعر
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/Honrawey_Meriwan/831