المبروكة

يُمة الفِضية الدهبية..

نتلاقى قِدام
تكوني ارتحتي من وجع الحياة
ونكون بِرينا من الدخلنا بعد مشيك
مُتعافية، واحنا معاك تمام
نتلاقى انسام
كمّلنا باقي الونسة في ظل نور جلال الله
مع زُمرة جميل الانبياء
وأصحابهم البَررة الكِرام
نتلاقى احلام
واقفة بتقدمي في عتبة الباب حبيبة
بتوصي توبها على المحبة
وتدسي في روحها السلام
انا غايتو عافيلِك غيابِك
طالما بشوفِك في البرندة
مطبوعة صورتِك في المخدة
قُمتي بتغسلي باقي عِدة
وتشتتي الحَب للحمام..

يُمة الفداحة مافي الرحيل
ولا وجعة الموت في الغياب
يُمة البتكتُلني التفاصيل
وعيونِك التلقاني في الباب
دعواتك اليوم يفتر الحيل
تنزل علينا سلام و تِرحاب
يُمة الطُشاتة، إبر الخِياتة، وجع المشابِك والغسيل
اوضتِك اذا ما تاوقت ضلفة وسرح من لمستِك دولاب
انا ود كوابيس الملاريا وحُمة الليل
يُمة السهر وينِك، وسِيرة الالتهاب؟
كيف بمشي باقي اليوم بلا شاهي ومواويل
وكيف تكتمل عصرية دون صينية في ساعة صِحاب
يُمة السفر تاواق، بلاك الزاد قليل
انسيني في جيب شنطتك
دبوس يونِّس طرحتِك
حين جزمتك، فردة شُراب..

على سيرة الدومة ونخلاتِك
ليمونتِك طارحة وعطّاية
يا يُمة الريحة الما فاتت
سبتيها في فرو المُصلاية
شافع المُرسال الماعاود
والجاهلة التصرخ بكّاية
يُمة الفِضية الدهبية
مَصفى وكفتيرة وكُباية
مُشطك يا يُمة فتيل ريحتِك
والبينسة الحرست تسريحتِك
تربيزة ومُرواد ومِراية
مهموم من صوت الموتور
خايف من شكل الوضّاية
يوم تكمل موية الصِهريج
ونتوه بين جاية وما جاية
لو مرّة ندوّر لي مُفتاح
يُمة العنوان الغلط الصاح
لافوتِك كانت في البال
لا غيبتِك كانت محريّة..

في كل رُكن في البيت يُمة
مع صوت نقاع جردل في الزير
ما ملاية انفردت نُص الحوش
او قيّل في ضُهرية سرير
امبوبة الغاز، عين البوتوجاز
البصلة الحِرقت في التحمير
في صيحة مرحب عند الباب
وسلام يا الجوة صباح الخير
في فُرشة معلقة في الشُباك
وحِوار شمّاعة مع البِشكير
شايفِك في بِسلة على الشارع
في كارو لبن واقفة تبايع
يا يُمة الشاي الراجِنو
شفقانة تنومّي في شافِع
مبسوطة و صوتِك سامِعنو
مع طلبة خلوة في سورة الكهف
فلتت من مئذنة الجامع..

يا أستاذة وراك حِصة وطابور
وفصول مليانة اولاد وبنات
يا بذرة خير يا مِشعل نور
العاش في سيرة النور ما مات
رسموك بي لون في خد السور
ودسّوك اماتهُم في الدعوات
غنّوك بي كُل سرور وحُبور
سِت زينب جات سِت زينب جات 💜

_
أحبّك يا بت ابراهيم، ونتلاقى قدام.

www.group-telegram.com/us/almbroka.com/418

262 viewsJan 20, 2023 at 20:12

يُمة الفِضية الدهبية..

نتلاقى قِدام
تكوني ارتحتي من وجع الحياة
ونكون بِرينا من الدخلنا بعد مشيك
مُتعافية، واحنا معاك تمام
نتلاقى انسام
كمّلنا باقي الونسة في ظل نور جلال الله
مع زُمرة جميل الانبياء
وأصحابهم البَررة الكِرام
نتلاقى احلام
واقفة بتقدمي في عتبة الباب حبيبة
بتوصي توبها على المحبة
وتدسي في روحها السلام
انا غايتو عافيلِك غيابِك
طالما بشوفِك في البرندة
مطبوعة صورتِك في المخدة
قُمتي بتغسلي باقي عِدة
وتشتتي الحَب للحمام..

يُمة الفداحة مافي الرحيل
ولا وجعة الموت في الغياب
يُمة البتكتُلني التفاصيل
وعيونِك التلقاني في الباب
دعواتك اليوم يفتر الحيل
تنزل علينا سلام و تِرحاب
يُمة الطُشاتة، إبر الخِياتة، وجع المشابِك والغسيل
اوضتِك اذا ما تاوقت ضلفة وسرح من لمستِك دولاب
انا ود كوابيس الملاريا وحُمة الليل
يُمة السهر وينِك، وسِيرة الالتهاب؟
كيف بمشي باقي اليوم بلا شاهي ومواويل
وكيف تكتمل عصرية دون صينية في ساعة صِحاب
يُمة السفر تاواق، بلاك الزاد قليل
انسيني في جيب شنطتك
دبوس يونِّس طرحتِك
حين جزمتك، فردة شُراب..

على سيرة الدومة ونخلاتِك
ليمونتِك طارحة وعطّاية
يا يُمة الريحة الما فاتت
سبتيها في فرو المُصلاية
شافع المُرسال الماعاود
والجاهلة التصرخ بكّاية
يُمة الفِضية الدهبية
مَصفى وكفتيرة وكُباية
مُشطك يا يُمة فتيل ريحتِك
والبينسة الحرست تسريحتِك
تربيزة ومُرواد ومِراية
مهموم من صوت الموتور
خايف من شكل الوضّاية
يوم تكمل موية الصِهريج
ونتوه بين جاية وما جاية
لو مرّة ندوّر لي مُفتاح
يُمة العنوان الغلط الصاح
لافوتِك كانت في البال
لا غيبتِك كانت محريّة..

في كل رُكن في البيت يُمة
مع صوت نقاع جردل في الزير
ما ملاية انفردت نُص الحوش
او قيّل في ضُهرية سرير
امبوبة الغاز، عين البوتوجاز
البصلة الحِرقت في التحمير
في صيحة مرحب عند الباب
وسلام يا الجوة صباح الخير
في فُرشة معلقة في الشُباك
وحِوار شمّاعة مع البِشكير
شايفِك في بِسلة على الشارع
في كارو لبن واقفة تبايع
يا يُمة الشاي الراجِنو
شفقانة تنومّي في شافِع
مبسوطة و صوتِك سامِعنو
مع طلبة خلوة في سورة الكهف
فلتت من مئذنة الجامع..

يا أستاذة وراك حِصة وطابور
وفصول مليانة اولاد وبنات
يا بذرة خير يا مِشعل نور
العاش في سيرة النور ما مات
رسموك بي لون في خد السور
ودسّوك اماتهُم في الدعوات
غنّوك بي كُل سرور وحُبور
سِت زينب جات سِت زينب جات 💜

_
أحبّك يا بت ابراهيم، ونتلاقى قدام.

BY المبروكة