group-telegram.com/Fadfadah98/10900
Last Update:
هذا المساء ♥️
اعتبرها تنظير مني !!
لكن عن تجربة ..
- عايز توقف خير بينك وبين زول امشي اتكلم فيه (الغيبة) !!
قبل كم شهر جاتني بنوتة بتشتكي من مديرها
بعد حوار طويل وقصص جانبية بتاعة مكاتب
طلبت منها طلب
وقفي كلام عن الزول ده لا خير لا شر
اسكتي بس .. حاولي قدر الامكان
امس رسلت لي فويس انه الزول ده تعامله اتغير تماما
وكأنه اكتشف وجودها
بقى يطمن ليها .. بديها مهام
بشاورها وبحفزها وكل تعامله معاها اختلف وكمان شايفة مرتبها رهيب وظبطت بيهو امورها رغم انه ما اتغير
قالت لي السر شنو ؟
التكنيك شنو ؟
قلت ليها بالتجربة ماف زول قدم لي خير خااالص
الا انا كويسة جدا من ناحيته
مريت بصداقات
مريت بمدراء
مريت بأقارب
ودايما السؤال ده ليه فلان كويس معاك
لأني ما بتكلم فيه ودي ما اهتماماتي ولا ببادر ولا بتواجد في حتة زي دي
وما عندي شي سئ ولا احكام ولا بجيب سيرته وفي الحياد تماما اتجاهو
بالعكس بركز على الكويس فيهو وح يضيف لي شنو
طيب الزول ده عرف كيف ؟
الله اعلم
قلب المؤمن دليله ♥️
فقالت لي يادوب فهمت
انا زاتي بقفل من ناس وما بقربهم ولو سألتيني بقول ليك ما مرتاحة وما مدياهم امان
و بوقف منهم لا شعوريا وببعد كأنه ربنا بزحني منهم
وبعدها لازم اكتشف حاجة من جانبهم
ياخ حتى على مستوى العملاء
بتذكر صديقنا عنده بزنس وكان ماشي ووقف
قال والده قال ليهو حب الزباين وودهم ما تنافقهم ما تزهج منهم ما تنشر عنهم وعن مشاكلهم في صفحتك
وتكتب عن مواقفهم وكلامهم الا في الخير
والشر يقيف عندك
انا هسي بمشي دكان عمك فلان داك لأني برتاح ليهو
ف ضحك من بساطة والده
لكن لما اتونسنا وبتجربتنا احنا بنتعامل على مستوى روحي
انت بترتاح مكان تتحب وتحس بأمان وقلبك يتفتح
مش بس راحة حتى عطاءنا بمشي لا شعوريا للمكان
الآمن .. حتة ما بقطعوا فيها ب وراك
وعشان كده ما ح تعرف تتعامل مع زول
بتعامل معاك ومع عدوك او خصيمك في لحظة واحدة
ولاحظ لنفسك لو لقيت زول بتحبه قريب من زول عنده مشكلة معاك .. ح تنسحب
حتى لو قرب فقط لانك عارف ده ما مكان آمن
فالزولة دي قالت لي اواصل كده كيف؟
قلت ليها انشغلي بنفسك تماما تماما حتى لو بتطرف..
في كتاب قواعد العشق الأربعون
نصح شمس التبريزي بأنه عشان تصلح علاقتك بزول
توقف كلام سئ عنه وتتكلم عنه كويس .. لأنه غير انه الكلام السئ برتد ليك
ف حيجوط علاقتك بالشخص
طيب اقلاها خليك حكيم
دائرتك القريبة حافظ عليها بانك ما تجوطها بالكلام عنها
اهلك واصحابك وشركاءك
ما تفتكر اللي في الخفاء ما بوصل
كله بوصل
واللي ما وصله بوضوح قلبه قااااعد شايفك وحارس سيده
وبكره خيره بتقطع منك
ف اذا عايز تقفل باب بينك وبين زول وتخسر علاقتكم ..
او تقطع خيره منك وعنك
او تبعده عنك
اتكلم فيه .. وسنه سنة ح يتقفل الباب تماما
" الأرواح جنود مجندة 🤷♂️♥️ "
#Habab
@fadfadah98
BY It's Tanzeel ♡.
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/Fadfadah98/10900