group-telegram.com/viasna_brest/3136
Last Update:
⚡️ Шосты судовы дзень працягваецца суд па «справе Вясны». На сённяшнім паседжанні было агучана, што ў офісе берасцейскай філіі «Вясны» вялося «аператыўнае відэаназіранне»
5 студзеня ў Менску пачалі судзіць чатырох праваабаронцаў, сябраў «Вясны»: старшыню Праваабарончага цэнтра «Вясна» і Нобелеўскага лаўрэата Алеся Бяляцкага, яго намесніка Валянціна Стэфановіча і каардынатара кампаніі «Праваабаронцы за свабодныя выбары» Уладзя Лабковіча, а таксама завочна Змітра Салаўёва, які вымушаны быў пакінуць Беларусь.
📹 На судзе 13 студзеня зачытвалі паказанні сведак з Берасця, якія тычыліся дзейнасці берасцейскай філіі «Вясны». З матэрыялаў справы стала вядома, што ў берасцейскім офісе была ўсталявана відэакамера, і ў ажыццяўлялася аператыўная відэаздымка. Сведкам падчас следства дэманстравалі, у тым ліку, распіскі і кадры відэазапісаў з гукам, на якіх яны мусілі апазнаць сябе.
Пры гэтым кіраўнік берасцейскай філіі Уладзімір Вялічкін на судзе не прысутнічае, бо вымушаны быў пакінуць Беларусь. На думку дзяржабвінавачвання, ён разам з яшчэ некалькімі праваабаронцамі (у тым ліку Бяляцкім, Лабковічам і Стэфановічам) «ажыццяўлялі падрыхтоўку грамадзян для ўдзелу ў групавых дзеяннях, якія груба парушаюць грамадскі парадак, а таксама фінансаванне і матэрыяльнае забеспячэнне такіх акцый пад выглядам праваабарончай і дабрачыннай дзейнасці ў складзе арганізаванай групы».
❗️Таксама на судзе 13 студзеня Валянцін Стэфановіч запатрабаваў абвясціць два дакументы з першага тому, якія сведчаць аб тым, што на абвінавачаных моцна ціснулі ў СІЗА. Да таго ж, Валянцін заявіў, што доказы збіралі ў абвінавачаных з парушэннямі, пра што сведчаць гэтыя дакументы. Валянцін Стэфановіч, дадаў, што «ўсе ведаюць, чым у нас у краіне займаецца ГУБАЗіК».
Нагадаем, што праваабаронцы Алесь Бяляцкі, Валянцін Стэфановіч і Уладзь Лабковіч былі затрыманы ў ліпені 2021 года. Іх абвінавачваюць па двух крымінальных артыкулах. На судзе іх трымаюць у кайданках. Працяг суду адбудзецца 16 студзеня.
BY Вясна | Брэст
Share with your friend now:
group-telegram.com/viasna_brest/3136