Биир дойдулаахтарбыт, Ил Түмэн председателэ Алексей Еремеев уонна Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов нэһилиэктэргэ сылдьан олохтоохтору кытта көрсүһэ, отчуоттуу сылдьаллар.

Бүгүн Түбэ нэһилиэгэр тутулла турар оскуола-саады, арендалаан үлэлии олорор олохтоох дьаһалта дьиэтин көрдүлэр-иһиттилэр.

Мунньах саҕаланыыта СР социальнай-экономическай сайдыытыгар кылааттарын иһин Анатолий Дьяконов уонна Гек Дьяконов кыһыл көмүс бэлиэлээх Ил Түмэн Бочуоттаах грамотатынан наҕараадаланнылар.

Алексей Ильич республикаҕа туох үлэ-хамнас ыытылла турарын, ханнык сокуоннарга уларыйыылар киирбиттэрин, дойду политическай балаһыанньатын, халаан кэннэ чөлүгэр түһэрии үлэлэрэ хайдах ыытыллыбыттарын, бюджекка хантан дохуот киирэрин, хайдах ороскуоттанарын о.д.а. сиһилии быһааран кэпсээтэ.

Александр Павлович тыа хаһаайыстыбатыгар саҥа уларыйыылар тустарынан илдьиритэн кэпсээтэ. Субсидия харчыта төбөҕө уонна биир литр үүккэ түһү төлөнөр буоларын ырытыһан кэпсэттилэр.

Оскуола директора Евдокия Шарина Мария Охлопкова букубаарын үөрэх булгуччулаах испииһэгэр киллэриэххэ наада диэн этии киллэрдэ. Оскуола-саад тутуута саҕаламмытыгар Ил Түмэн салайааччыларыгар махталын эттэ. Нэһилиэк ытык ветерана Розалия Лукина уонна хас да олохтоох саха тылын үөрэтии боппуруоһун күүскэ туруордулар. Маныаха Алексей Еремеев бу хайысхаҕа туох үлэ бара турарын быһааран кэпсээтэ. Элбэх кэтээн көрүү кэнниттэн: оҕолор билигин үс көрүҥҥэ арахсаллар – өйдүүр уонна саҥарар оҕо, өйдүүр уонна саҥарбат оҕо, өйдөөбөт да саҥарбат да оҕо. Бу үс оҕоҕо атын-атын үөрэтэр ньыма наада. Уонна үлэни уһуйаантан саҕалыахха наада диэн эттэ.

Түбэ нэһилиэгэр быйыл Балыктааһын сылынан биллэриллибит. Онуоха туох эмит субсидия көрүллүө дуо диэн ыйыттылар. Бензин ыараан, туох барыта ыарыы, үрдүү турарын сонньуйа эттилэр.

Олохтоохтор мунньах түмүгэр Ил Түмэн депутаттара маннык кэлэн көрсөн, кэпсэтэн бараллара олус хайҕаллааҕын этэн туран, махтаннылар.

«Нам улууһа» МТ пресс-сулууспата