group-telegram.com/CabinetBelarus/1137
Last Update:
«Мы не можам ставіць пытанне, ці магчыма збліжэнне нашых пазіцый. Гэта наш доўг і абавязак»
Павел Латушка, Валер Кавалеўскі і Вольга Гарбунова выступілі на слуханнях Каардынацыйнай рады па праблеме палітзняволеных, якія днямі адбываюцца ў Варшаве.
Павел Латушка адзначыў, што для магчымасці вызвалення палітзняволеных трэба стварыць умовы – і стварыць іх можна праз ціск на рэжым. На думку прадстаўніка па транзіце ўлады Кабінета, на сёння гэты ціск недастаткова моцны. Пры гэтым доказаў злачынстваў рэжыму сабрана больш чым дастаткова. Павел Латушка падкрэсліў: адмовіцца ад санкцый азначае адмовіцца ад барацьбы.
Павел Латушка: «Я член сям’і палітвязня, таму гэтае пытанне для мяне не абыякавае. Кожны дзень я прачынаюся і кладуся спаць з гэтай думкай. Гэта матывуе мяне вось ужо чацвёрты год прыходзіць у офіс і рабіць тое, што я магу. Мы не можам спыніцца на паўшляху.
Не трэба стратэгію ціску супрацьпастаўляць стратэгіі перамоў. Перамовы могуць быць вынікам ціску – і такія прыклады існуюць. Але толькі ў тым выпадку, калі мы прывядзём ціск у адпаведнасць маштабу праблемы, якую хочам вырашыць. Сённяшні ціск не адпавядае маштабу праблемы».
Валер Кавалеўскі адзначыў, што палітычны крызіс у Беларусі працягваецца і рэпрэсіі – індыкатар гэтага. Ціск дзеля вызвалення вязняў увесь гэты час заставаўся для Кабінета вельмі важным складнікам барацьбы. Як падкрэсліў прадстаўнік па замежных справах Кабінета, выкарыстоўваюцца самыя розныя віды ціску на рэжым Лукашэнкі, напрыклад, санкцыйны, прававы, інфармацыйны.
На думку Валера Кавалеўскага, не ўсе формы ціску працуюць аднолькава добра, і варта звярнуць увагу, дзе беларусы могуць спрыяць узмацненню ціску, без спадзявання толькі на замежных партнёраў.
Валер Кавалеўскі: «Нягледзячы на тое, што санкцыйны і іншыя формы ціску падаюцца нам недастаткова моцнымі і дасканалымі, яны вельмі балючыя для рэжыму. І рэжым гэтага не хавае. Ён вядзе актыўную працу над тым, каб, напрыклад, зняць санкцыі. Дзве найбольш балючыя для яго кропкі – гэта «Белавія» і калійныя ўгнаенні».
Вольга Гарбунова падсумавала панэльную дыскусію па праблеме вызвалення палітзняволеных. Яна падзякавала прысутным за меркаванні, адзначыла, што за 11 месяцаў яе працы ў Кабінеце ёй не хапала такой дыскусіі і выказала шкадаванне, што тэма палітзняволеных альбо замоўчваецца, альбо становіцца прасторай для маніпуляцый.
Вольга Гарбунова: «Мы разам – вялікі рух, які можа заняць пазіцыю, калі дамовімся паміж сабой. Папулярная фраза сёння: мы гатовыя да перамоў, а рэжым недагавораздольны. Але мы самі не дагавораздольныя, таму што ў нас ёсць праблема і няма адзінай стратэгіі па ёй.
Не ігнаруючы гэтую тэму, даючы ёй прастору і голас, розную экспертызу, не абвяшчаючы кагосьці здраднікам, можна прыйсці да рэальнага выніку.
У выніку ўсе супрацьстаянні заканчваюцца перамовамі. Перамовы праходзяць ва ўсім свеце, у якім зараз налічваецца прыблізна мільён палітзняволеных. Але мы заўжды шукаем нейкі ўнікальны беларускі шлях, каб застацца «ў белым паліто».
Прадстаўніца Кабінета падкрэсліла, што нельга ігнараваць міжнародную практыку: у Венесуэле за апошнія тры гады ў выніку перамоў былі вызваленыя амаль 1300 чалавек. У Беларусі ёсць 20-25 чалавек, якія выйшлі на волю ў выніку перамоў: «Нам кажуць, гэта немагчыма, але гэта адбываецца. Калі мы пачнём лічыць кропкай адліку тое, што рэальна?».
Таксама Вольга Гарбунова мяркуе, што слова «перамовы» ўжо «дастаткова рэабілітавана»: «Але, напэўна, больш карысным будзе выкарыстоўваць словазлучэнне «гуманітарныя перамовы», каб ніхто не падумаў, што мы прапануем «перагарнуць старонку».
Прадстаўніца Кабінета падкрэсліла, што дэмакратычнаму руху перш за ўсё трэба памятаць аб прынцыпах дэмакратыі, што жыццё чалавека – найвышэйшая каштоўнасць: «І таму мы не можам ставіць пытанне, ці магчыма збліжэнне нашых пазіцый. Гэта наш доўг і абавязак».
Трансляцыю і запіс слуханняў глядзіце на YouTube канале КР.
@CabinetBelarus
BY Аб’яднаны Пераходны Кабінет Беларусі
Share with your friend now:
group-telegram.com/CabinetBelarus/1137