group-telegram.com/eltuz2022/32108
Last Update:
ТРОЛЛАРНИ ЖУМБУШГА КЕЛТИРАДИГАН МАВЗУЛАР
Элтузга мурожаат қилиш ва муаммони ёритиш бепул, доим шундай бўлиб қолади.
Айримлар таъкидлагани каби «заказ мақола» деган тушунчанинг ўзи йўқ Элтузда. Буни миллион марта қайтарсак ҳам аламзадалар тўдасига кор қилмаслигини яхши биламиз. Қуйида тролларни жумбушга келтирадиган асосий мавзуларни санаб ўтамиз.
Куч ишлатар тизимдаги муаммоларга реакция ўлароқ троллар ёпирилади. Мазмунсиз, қарши аргументларсиз қуруқ ҳақорат ёғрилади. "Тухмат", "заказ", "мусаппо осмонимизди кўролмайсан" қабилидаги шаблон гаплар. Бу тенденция барча давлат ташкилотлари ҳақидаги танқидий постлар изоҳида кузатилади.
Таълим даргоҳлари ва ташкилотлар ҳақидаги танқидий мурожаатларда шикоятчиларни сотқинга чиқариш, уни ҳақоратлаш ва таҳдид қилиш трендга айланган. Айнан шу сабабдан Элтуз шикоятчи шахсини ҳеч қачон ошкор қилмайди. Чунки масъуллар учун шикоят сабабини йўқотишдан кўра шикоятчини топиб жазолаш қулай.
Диний бағрикенгликни тарғиб қилувчи, аёллар ҳуқуқи, динни ниқоб қилган популистлар ва товламачилар ҳақидаги постларда ҳам ўта консерватив ва жоҳил оломон тўпланади. Бундай жоҳил тўда диндор шахс ҳақидаги танқидини бевосита дин танқиди деб тушунади. Диндорни диндан ажратолмайди.
Ҳар қандай "диндор" шахси даҳлсиз қолиши керак деб ўйлайди – танқид қилинган киши радикал жиноятчи бўлса ҳам, учига чиққан товламачи бўлса ҳам, диний ҳассосликдан фойдаланиб популизм қилса ҳам майли улар учун. Бундай постлардан кейин эътиқодий ва жинсий ҳақоратлар урчиши табиий ҳол бўлиб қолган.
Жамиятда жинсий нотенглик, зўравонликни тарғиб қилувчи, зўравонларни ёқловчи, ҳақорат ва эътиқодий прозелитизм мазмунидаги изоҳлар Элтуз мустақил нашрига қизиқ эмас.
Аслида изоҳларда нафрат градусининг ортиши ёритилган мавзунинг ўта долзарблигини кўрсатади.
Ўзбекистоннинг ҳудудий яхлитлиги, мустақиллиги, ижтимоий ва иқтисодий барқарорлиги, тенг ҳуқуқли ва эркин, коррупциядан ҳоли жамиятни шакллантиниш масалалари Элтуз учун устувор бўлиб қолаверади. Биз очиқ, конструктив мулоқот тарафдоримиз. Шундай экан, келган жойимиздан давом этамиз, хонимлар ва жаноблар.
