group-telegram.com/hussein_hider/407
Last Update:
ياباب ماتحچيلي عالصار
وشلون حرگت فاطمه النار
وين طاحت
وين صاحت
والسالفه شاهدها بسمار
.................................
هايباب الزهره جيتك حتى تحچيلي
حيدر آنه البس انوح ومانمت ليلي
فاطمه كسرتلي ظهري وهدمت حيلي
حتى ذوالفقّار محني ومايتچيلي
فاطمه كسرتني..شاب من عافتني
راحت وشيبتني..اويلاه
الهوى فارگ ريتي..شصار ويه ام بيتي
احچيلي عن غاليتي..اويلاه
ماچنت حاظر دفعة الباب
گالولي طاحت فوگ التراب
وين راحت
وين طاحت
والسالفه شاهدها بسمار
.................................
هايباب الزهره سولف وضّح الصوره
صاحت بياصوت بالله وهيه معصوره
گالوا البسمار احمر من الحروره
موضلع واحد اتلث ضلوع مكسوره
امن اندفعت اعليها..شسوت بأيديها
ونار تلسع بيها..اويلاه
شمثگلك يابابي..من عصرت احبابي
ليك ابث اعتابي..اويلاه
ياباب وابسمارك شلون
عابر على الحايط يگولون
شلون ناحت
وين طاحت
والسالفه شاهدها بسمار
.................................
ثمنطعش عام ام ابوها ليش عذبوها
الزهره بُنيَتها ضعيفه شلون عصروها
اسمعت صوت الضلع من طگ حين دفعوها
الله لايرضه عليهم هيچ اذوها
حين طاح اجنينها..واطلعت بونينها
صدگ سطروا عينها..اويلاه
والطفوها شموعها..شلون تهوى دموعها
مكسرات ضلوعها..اويلاه
من غسلتها بگلب مفجوع
شاهدت چفه بخدها مطبوع
العين شافت
وين طاحت
والسالفه شاهدها بسمار
.................................
ارد اسئلك بالسياط الضربت الزهره
شفت لمن غسلتها موتنها الحمره
حالها الگلب اليهودي ايمرده وايكسره
فلان بالله شچان عنده گلب لوصخره
گلب التعنالها..مايرف الحالها
بالسياط الشالها..اويلاه
فوگ سطر عيونها..والضلع وجفونها
يضرب اعله امتونها..اويلاه
ياباب گلي يقضه لوطيف
يركل الزهره برجله ياحيف
هناك مالت
وين طاحت
والسالفه شاهدها بسمار
.................................
هايباب البيت واختم قصة آلامي
للگبر راحت حريمه الزهره گدامي
ادفنت روحي وهوه ريتي وضحكة ايامي
ومن بعدها ماكو واهس حتى بحلامي
بوحشتي وبناري..ونهر دمعي الجاري
اكرهت عمري وداري..اويلاه
والله مدري شبيه..وفاطمه ماهيه
گمر فارگ ضيّه..اويلاه
عايش حياتي بدمعه وبآه
امن اذكر اسمها اصرخ الله
آه ماتت
وين طاحت
والسالفه شاهدها بسمار
.................................
الشاعر
حسين حيدر الكربلائي
كربلاء المقدسة2022/10/24
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/407