group-telegram.com/hussein_hider/409
Last Update:
صوت من الافلاك..حامي الحميه
ابعد الحَسنين..عن الزچيه
من حظن فاطم ياعلي نحي اليتامه
العالم نحيبه.. الهاي المصيبه
…………………
ساعة المغتسل ساعة..هدم الدنيا حزنها
الزهره من ماتت تبييّن..بالعصر ازرگ بدنها
علي ابين اركبّه راسه..وحسن وحسين بحظنها
لن صوت صاح من السمه..مروتك يحماي الحمه
نحي الولد عن فاطمه..نموت لومامشوا عنها
مگطوعه الانفاس..والحزن ردها
مدتها الچفوف..وشبگت ولدها
ضج الوجود بهالحزن واختل نظامه
العالم نحيبه .. الهاي المصيبه
…………………
علي ابين يهدي ولده..بقه وبين يهدي نوحه
ياخلگ بس الله يدري.. فاطمه شسوت بروحه
يداوي جرح اطفاله لكن..من يداويله جروحه
بذيج الحروب القاسيه..وذيج الجروح الداميه
دمعاته چانت غاليه..الوغى يشهد اله وسوحه
يشلع بالچفوف..من جسمه الاسهام
حيدر ولاصاح..من ذيج الالام
عالزهره چفه بالوجه خله علامه
العالم نحيبه .. الهاي المصيبه
…………………
شما يگرب يمها ينحب..من الخسفه اللي بضلعها
شمايريد يشد چفنها.. يشوف اثر چف الصفعها
هناك گد مانحب حيدر..نزل من فاطم دمعها
وتگله گطعت الگلب..وداعك يبن عمي صعب
وديني لحظان الترب..طاح حيدر من سمعها
يحبيبة الروح..صاحلها ابشري
بس ينحفر كون..گبرچ وگبري
خايف عليچ انه من الليل وظلامه
العالم نحيبه .. الهاي المصيبه
…………………
حيدر الفارس الاوحد..وگوه جر انفاسه گوه
سيفه قتّال الاشاوس..وهسه صار السيف تچوه
بعد ماراحت الزهره..الدنيا بعيونه متسوه
ظل يهمس ودمعه ايهلي..يافاطمه انه علي
رديلي ياناسي وياهلي..چنه مذبوح ايتلوّه
شال النعش ذاك..الماخذ نصيبه
رايح المحبوب..يدفن حبيبه
لمن وصل يم الگبر طاحت اجدامه
العالم نحيبه .. الهاي المصيبه
…………………
صعبه عالكرار لمن .. بيده نزلّها الگبرها
ماشبع من الزچيه..ثمنطعش ماتت عمرها
وصه التراب بدموعه..حتى لايلچم كسرها
ورد من دفنها بيا وضع..محني وسبگ جدمه الدمع
وناته صارت تنسمع..وخطوته گوه يجرها
ماباقي بس روح..بعد الفجيعه
والمرتضى مات..ويه الوديعه
وحشه بعدها ومظلمه ديار الامامه
العالم نحيبه .. الهاي المصيبه
…………………
الشاعر
حسين حيدر الكربلائي
كربلاء المقدسة ٢٠٢٤/١٠/١٩م
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/409