group-telegram.com/eltuz2022/33601
Last Update:
АҚШДА 33 ЁШЛИ ТОЖИКИСТОНЛИК ИШИДГА МОЛИЯВИЙ КЎМАК БЕРИШДА АЙБЛАНИБ ҚЎЛГА ОЛИНДИ
АҚШ хавфсизлик идоралари 33 ёшли Тожикистон ватандоши Мансур Манучеҳрийни ИШИД, жумладан унинг «Хуросон» гуруҳига молиявий ёрдам бериш ва бошқа бир нечта оғир жиноятларни содир этишда гумонлаб қўлга олди.
АҚШ прокуратураси 25 феврал куни эълон қилган айблов хулосасига кўра, Манучеҳрий 2021 йил декабридан 2023 йил июнигача ИШИД билан боғлиқ шахсларга 70 минг доллардан ортиқ маблағ ўтказган. Ушбу пулларнинг бир қисми 2024 йилда Туркиянинг Истанбул шаҳрида черковга қилинган қонли ҳужумда иштирок этганликда гумонланаётган шахсга етиб боргани айтилмоқда.
Манучеҳрий 2016 йилда сайёҳлик визаси билан АҚШ ҳудудига кирган ва сохта ҳужжатлар, жумладан, қалбаки никоҳ билан мамлакатда қолган. Ҳуқуқ-тартибот идоралари уни Нью-Йоркнинг Бруклин туманида қўлга олган. Тафтишчиларга кўра, унинг қариндошларидан бири терроризмга қарши кураш бўлимига қўнғироқ қилиб, Манучеҳрий ўз оила аъзосидан бирини ўлдириш билан таҳдид қилгани ва агрессив ҳаракатлар содир этгани ҳақида хабар берган.
Тергов маълумотига кўра, у отиш машқларини ўтказган ва ўзининг ўқотар қуролдан фойдаланиш видеоларини Туркиядаги ИШИД билан боғлиқ шахсга юборган. Шунингдек, у экстремистик ғояларни очиқдан-очиқ қўллаб-қувватлагани, ИШИД тарғибот материалларига эга бўлгани, жумладан, ушбу ташкилотга қўшилган Тожикистон махсус кучлари собиқ қўмондони Гулмурод Ҳалимовнинг видеоларини сақлагани айтилмоқда.
АҚШ прокуратураси унга ноқонуний қурол сақлаш ва миграция ҳужжатларини қалбакилаштириш айбловларини қўйган. Унинг адвокати ҳозирча иш юзасидан изоҳ бермаган.
Бу ҳодиса 2024 йил июнида АҚШда теракт тайёрлаганликда гумонланган саккиз Тожикистон фуқаросининг қўлга олинишидан кейинги навбатдаги қўлга олиш ҳолати ҳисобланади.
