group-telegram.com/hussein_hider/384
Last Update:
اتوسل الهوى.. اريده اريده.. ياخذني الك
ذبحتني نينوى.. بعيده بعيده ..وارد اوصلك
ساعي بريد جروحي
بمرساله ماخذ روحي
ارد اوصلك
...................
مشتاگه اشوف عيونك..طمني گلي شلونك
ياللي اطلعت من بيتي
طلعت هوى من ريتي
واخذت احبابي ضعونك
والريح احب چفوفه..ابني واريد اشوفه
لحسين ياخذ بيدي
طگ گلبي اريد وليدي
فدوه رحت لحروفه
عيني تصد صوب الدرب هلبت يرد ضعن ابني
ذبّة مطر من السمه هالشكل فرگاه ذبني
ماشيبت من الوكت حسين اللذي شيبني
يالشوفتك فجر..حبيبي حبيبي..وجهك شمس
ظل بالگلب فطر..طبيبي طبيبي ..اصرخ همس
ام البنين تنادي
بيني ويروح الهادي
ارد اوصلك
...................
ترسمك بخدي دموعي..يالچنت بين ضلوعي
گلبي وطلع من صدري
من اطلعت ياعمري
والريح يطفي شموعي
ياريح اخذ مرسالي..لبني الحبيب الغالي
طمني عن اخباره
يمته يرد الداره
العايش وسط دلالي
ياريح اسولف والفگد بس بالدمع سالفته
بالزاد دمعي ينخبط والزاد مُر من ضگته
چني زليخه مشييّبه وارجع شباب بجيته
يايوسف شوكت..تجيني تجيني..ابييض النظر
بفراگك اكبرت..سنيني سنيني..ذبلن قهر
مارد اليه ثوبك
ولارد الي مكتوبك
ارد اوصلك
...................
تتحكم بأنفاسي..ياموطني واحساسي
روحي ودليلي وعقلي
حسين انت بيدك كلي
تاج ويشيلك راسي
مشتاگه اشمن نحرك..مشتاگه اضمن صدرك
مشتاگه احب چفوفك
مشتاگه عيني تشوفك
من عمري كون العمرك
يحسين يانسمة فجر ترتاح بيك الريه
وجهك شمس وكت الصبح وجهك گمر ليليه
اسمك يبعد امك تره ايثلج الگلب طاريه
بالدنيا دورت..مثيلك مثيلك..ماحصّلت
يلگولي بس ردت..بديلك بديلك..وماشاهدت
من مثلك اليتكنّه
سيد شباب الجنه
ارد اوصلك
...................
انه ودليلي انتاني..هاجاني هاماجاني
عالدرب تشبح عيني
انتظر جيت حسيني
وبالباب صار امچاني
اشهگ نفس بالگوه..مثل السعف اتلوه
وشما يرد مسافر
يندهني گلبي الحاير
يمكن وليدچ هوه
ساعه وابن حذلم دخل ينعه ويون بحسره
يهل المدينه ابن النبي من الگفه انحز نحره
وبخيل عشره بكربله انداس وتهشم صدره
ومفجر الحجر..جبينه جبينه..ودمه يصب
جسمه صبح وذر..ونينه ونينه..فوگ الترب
متغيرات ارسومه
ومسلبات هدومه
ارد اوصلك
...................
گالولي يابس ثغرك..گالولي ناشف نحرك
متغيرات اوصافك
متفطرات شفافك
گالولي كسروا ظهرك
جسمك ييمه مترب..بوكت السحگ يتگلب
عينك تصد لخيامك
تشب نارهم گدامك
وتشوف حيرة زينب
زينب عگب ذاك الخدر هالهزّل امركبيها
اخت ابوفاضل ياوسف يتجاسرون اعليها
من مجلس المجلس صفت متجتفات ايديها
وراسك على الرمح..يشاهد يشاهد..طول السبي
وبالحر يمنذبح..تغيير تغيير..لون العبي
بت حيدر ايضربوها
وسط الزلم دخلوها
ارد اوصلك
...................
الشاعر
حسين حيدر الكربلائي
كربلاء المقدسة2022/7/25
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/384