group-telegram.com/hussein_hider/386
Last Update:
يادمع گلبي اليكت ماي بصوركم
والمرض ماجرح روحي بگد سفركم
هاي المحامل وين مسراها
يحسين ماتاخذني ويّاها
.................................
آنه يحسين العليله..والدمع بلَّلَ عباتي
للسفر من درت وجهك..هدمت سور امنياتي
ياحياه بعيوني تحله ..يالخذت بيدك حياتي
ماهمني ضعفي وعلّتي..روحتك جمره بمهجتي
من رحت طاحت خيمتي..ومطر نزلن نايباتي
حمّلت واعيوني صوب الضعن تربي
هسه لوبعدين ابويه ايگلي اركبي
هاي الحبايب كلها وداها
يحسين ماتاخذني ويّاها
.................................
من مشه واتعده ضعنك..الضلمه حلّت بالمدينه
الحزن فك عينه بغيابك..والفرح غمضها عينه
شمعنه كل احباب گلبي..وياك ركبت بالضعينه
بس آنه دوناً عن هلي..ويّانه ماگتلي ارحلي
اصرخ واتنخه بعلي..يالعفت بنتك حزينه
چلمة امشي ويانه حسره بگلبي ظلت
كل اخوتي وكل خواتي گبالي صعدت
ولاوحده منهن يمي خلاها
يحسين ماتاخذني ويّاها
.................................
يالعشت بالروح وحدك..تارك بنيتك وحيده
انچان عن المرض ظلتي..للمرض هجرك يزيده
ياشهيد الغاضريه..روحي بفراگك شهيده
هم سامع بنار الهجر..العن واشد امن الجمر
يافجر يالخذت الفجر..مسافر الديره بعيده
ياضوه عيني وعليك انعمت عيني
گلي من رايح تجي لوماتجيني
ياوطن روحي وياثناياها
يحسين ماتاخذني وياها
.................................
طلع ضعنك والمحامل ..وارجعت للدار وحدي
خاليه وظلمه بجفاكم..والدمع بعيوني يحدي
الناس كلها عند اهلها..لاابو ولااهل عندي
گاعده بداري بلاوعي..عبدالله صوته بمسمعي
انحب وينصب مدمعي..احس كل الدنيا ضدي
تشبح عيوني اعله صوب الغاضرية
مناطره وادري بضعنكم ماله جيه
ياراحتي وطرواك سلواها
يحسين ماتاخذني وياها
.................................
استسلمت تالي الهجركم..وبعد مده امن الرزيه
بشر ناده بالمدينه..ابهاشم الكلهم حميه
حسين واهل حسين كلهم..اتذبحوا بالغاضريه
ومگطعه چفوف الگمر..وخنصر ابواليمه انبتر
وصاعد على رمحه النحر..وزينب الحره سبيه
اضلمت الدنيا وبعد ماشوف كلشي
من وكت هالصوت وآنه انحمل نعشي
والعيله طايح حامل الواها
يحسين ماتاخذني وياها
.................................
الشاعر
حسين حيدر الكربلائي
كربلاء المقدسة2022/7/8
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/386