group-telegram.com/hussein_hider/404
Last Update:
مابيه حيل الجر الانفاس
ماتت حبيبة گلبي ياناس
راحت دوه جروحي
والعاشت بروحي
ماتت حبيبة گلبي ياناس
.................................
آنه حيدر وارد اسولف..ظيم گلبي المَر عليه
ياخلگ بس الله يدري..شسوّت بحالي الزچيه
مامصدگ روحي ماتت..وغسلتها بهاي اديه
صحتلها ودموعي اتهلي..علمغتسل گومي الي
يافاطمه آنه علي..صدگ بعدتنه المنيه
يم الحسين الخاطر حسين
ردي تراها ابيضت العين
مستثگل انفاسي
ومشييب احساسي
ماتت حبيبة گلبي ياناس
.................................
آخ يالزهره وفگدها..رمح چنه وصاب گلبي
فراگها خلاني اميل..امن الدمع ماشوف دربي
تهتز الگاع بمشيتي..وهسه گوه الجدم يحبي
والقلع بيده خيبره..ماشايل رموشه تره
هد حيلي موت الطاهره..وللمگابر عيني تربي
موذاك حيدر محني مگفاي
گلولها متغيير هواي
مانشفت دموعي
والطم على ضلوعي
ماتت حبيبة گلبي ياناس
.................................
روحي عافت جسمي لمن..ايدي عافتها الاديها
المشكله كلشي بحياتي..ودنيتي يذكرني بيها
ولو نشف ماي البعيني..هم اضل ابچي عليها
تستاهل ابچيها بدمه..وخاليلفي لعيوني العمه
هاي العزيزه فاطمه..ام زوجها وام ابيها
مكسور گلبي وظهري مكسور
دافن ضوه عيوني بالگبور
والفارگ اعزازه
چفينه عكازه
ماتت حبيبة گلبي ياناس
.................................
حيدر الفارس الاوحد..وگوه اجر انفاسي گوه
سيفي قتّال الاشاوس..وهسه صار السيف تچوه
بعد ماتسوه حياتي..راحت أُم عشرة الحلوه
راحت ضحكتي وفرحتي..والبقت ونتي ودمعتي
ماتت وماتت راحتي..ومنها گلبي ماتروه
الطايح بروحي بالگبر طاح
وجيب اليخلي الروح ترتاح
والحيل ودعته
والدمع وشلته
ماتت حبيبة گلبي ياناس
.......................................
حاير ومشدوه بالي..وضاع ليلي من نهاري
چن حبل ضَب اعله نحري..خنگتي من اطب داري
اون والحيطان تنحب..ومن ونيني يفز جاري
ويم بابها يحلى البچي..اعلى الجرح ظهري ينتچي
والگلبي متروك الحچي..يسولف اعليها انكساري
البسمار المكسّر عظمها
گبالي واشوف اعليه دمها
ياذابح وليدي
ويللي اخطفت عيدي
ماتت حبيبة گلبي ياناس
..............................................
صارت الشمس وضواهه..بذره من نور الشريفه
اتجاسرت چف الخيانه..والگلوب المونضيفه
ابليس ياناس وذنوبه..اتبرّه من جرم السقيفه
لازم يجي يوم الفزع..وتنصلب كلها اعله الجذع
والمهدي يثأر للضلع..ويشهد العالم السيفه
وياخذ بثار النحره مگطوع
موضلع عنده بكربله ضلوع
وزينب يرد بيها
لديار اهاليها
ماتت حبيبة گلبي ياناس
.................................
الشاعر
حسين حيدر الكربلائي
كربلاء المقدسة2022/12/5
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/404