💔4 гады і 2 месяцы за кратамі ўтрымліваюць палітзняволенага валанцёра «Вясны» Андрэя Чапюка

У верасні 2022 году Андрэю прысудзілі 6 гадоў калоніі. Чапюка абвінавацілі паводле ч. 1 арт. 13 ч. 2 арт. 293 (падрыхтоўка да ўдзелу ў масавых беспарадках), ч. 2 арт. 285 (удзел у злачыннай арганізацыі), ч. 1 арт. 130 (распальванне іншай сацыяльнай варожасці), арт. 341 (апаганьванне збудаванняў і псаванне маёмасці — за графіці супраць Еўрапейскіх гульняў у 2019 годзе).

Пазней Вярхоўны Суд скараціў тэрмін на тры месяцы — да 5 гадоў і 9 месяцаў зняволення. У мінулым сакавіку Чапюка этапавалі ў івацэвіцкую калонію.

💌Месца ўтрымання Андрэя: ПК № 22. 225295, Брэсцкая вобласць, Івацэвічы, ст. Даманава, а/с 20, Андрэй Сяргеевіч Чапюк
💻Напісаць анлайн

Вядомага трэнера па ўсходніх адзінаборствах сёння пачынаюць судзіць за жаданне ваяваць за Украіну

Міхаілу Галінскаму 59 гадоў. Ён адзін з самых вядомых трэнераў па кітайскіх адзінаборствах. Ягоныя выхаванцы выйгравалі міжнародныя спаборніцтвы па ўшу, а ягоная школа вядомая ў Беларусі і за яе межамі па выніках спаборніцтваў, піша «Наша Ніва».

Міхаіла затрымалі ў чэрвені. Спачатку яго судзілі па адміністратыўнай справе — за «непадпарадкаванне супрацоўнікам міліцыі». Суд па «крыміналцы» над Міхаілам пачаўся 2 снежня. Яго абвінавачваюць у «спробе ўдзелу ў вайне» (ч. 1 арт. 361-3 КК).

Судзіць Галінскага прызначана Вера Галаўкова.

Віцебскага актывіста Аляксея Саламаненку пачынаюць судзіць за данаты

2 снежня ў Віцебскім абласным судзе пачнецца разгляд справы ў дачыненні да Аляксея Саламаненкі. Яму інкрымінаваны арт. 361-2 КК (фінансаванне экстрэмісцкай дзейнасці). Справу прызначана разглядаць Галіна Бондал.

У 2020-ым годзе Аляксея некалькі разоў судзілі паводле адміністрацыйных спраў — адзін з судоў быў за ўдзел у стрыме Сяргея Ціханоўскага.

У Мінску судзяць жанчыну затрыманую за тэлеграм-чат «Здравый смысл на Алибегова»

У Мінскім гарадскім судзе адбываецца працэс над Марынай Мышко. Яе абвінавачваюць паводле трох артыкулаў Крымінальнага кодэкса: ч. 1 арт. 342 (актыўны ўдзел у дзеяннях, што груба парушаюць грамадскі парадак), ч. 1 арт. 130 (распальванне іншай сацыяльнай варожасці), ч. 1 арт. 367 (паклёп на Лукашэнку).

Справу разглядае Міхаіл Макарэвіч.

Меркавана, Марыну затрымалі ў лютым 2024 года падчас рэйда за тэлеграм-чат «Здравый смысл на Алибегова», калі прызналі яго «экстрэмісцкім фармаваннем». Агулам у рашэнні КДБ прапісана 19 удзельнікаў і ўдзельніц чата, сярод ярод якіх — Марына Мышко.

У Магілёве распачаўся чарговы завочны суд, але ў закрытым рэжыме

У Магілёўскім абласным судзе 2 снежня распачаўся суд над 42-гадовым Уладзімірам Раманенкам. Яму інкрымінаваныя ч. 1 арт. 130 КК (распальванне іншай сацыяльнай варожасці), ч. 1 арт. 368 КК (абраза Лукашэнкі), арт. 369 КК (абраза прадстаўніка ўлады).

Справу разглядае Ігар Зямцоў. Працэс праходзіць у закрытым рэжыме.

Крымінальную справу ў парадку спецвытворчасці супраць мужчыны ўзбудзілі ў чэрвені гэтага года.

Сілавікі прыйшлі з ператрусам да 85-гадовай бабулі былога журналіста «Белсата»

Пра чарговы ператрус у сваякоў Сяргей Скулавец паведаміў у Facebook. Сяргей зараз жыве ў ЗША. Летам 2023 года ён з’ехаў з Беларусі, асцерагаючыся пераследу за прафесійную дзейнасць. Сутнасць прэтэнзій і нагода ператрусу засталіся невядомымі. Але людзі, якія назваліся следчымі і супрацоўнікамі КДБ, цікавіліся менавіта асобай журналіста.

«Перагледзелі мабільнікі, задавалі нейкія пытанні, а потым самі на іх адказвалі і нешта запісвалі. Бацька ж сказаў, што ў гэтым доме няма аніякіх маіх рэчаў, але гэта іх зусім не цікавіла», — распавядае Сяргей.

Акрамя таго, паводле слоў журналіста, днямі яго родным пачалі званіць невядомыя асобы, якія прадстаўляліся супрацоўнікамі дэпартамента фінансавай бяспекі.

«Пытаюцца дзе я, маўляў, не могуць да мяне дазваніцца», — піша Скулавец. Ён адзначае, што не хавае свайго месцазнаходжання, вядзе сацыяльныя сеткі, дзе ёсць усе кантакты, паведамляе @bajmedia.

🎪«Хочуць пабіць паказчыкі 2020 года»: як праходзіць збор подпісаў у Барысаве

Збор подпісаў выбаршчыкаў у падтрымку вылучэння кандыдатаў у прэзідэнты Рэспублікі Беларусь на выбарах* сканачваецца 6 снежня. Праваабаронца «Вясны» Алег Мацкевіч прааналізаваў гэты этап у Барысаве паводле адкрытыц крыніц.

«У Барысаве гэты этап выбарчай кампаніі нічым не адрозніваецца ад сітуацыі па краіне ў цэлым: пікеты за Аляксандра Лукашэнку і яго спойлераў праходзяць у публічнай прасторы з яўнай перавагай на яго карысць. У той жа час нават ён наўрад ці можа пахваліцца публічнай і шчырай усенароднай падтрымкай», — кажа праваабаронца.

Пакуль улады робяць усё, каб паказаць «актыўнасць» выбаршчыкаў, накіраваную на падтрымку дзеючага рэжыму. І калі на тэрыторыі арганізацый і прадпрыемстваў стварыць станоўчую карцінку ім яшчэ неяк удаецца, то з «вуліцай» праблемы.

Падрабязнасці 👉 elections2025.spring96.org/be/news/116814

❗️За «здраду дзяржаве» будуць судзіць супрацоўніка новастворанага Дэпартамента крымінальнай выведкі

У Мінскім гарадскім судзе 19 снежня пачнуць разглядаць справу супраць 35-гадовага Аляксандра Кудрэвіча. Яго абвінавачваюць паводле ч. 3 арт. 361-1 КК (удзел у экстрэмісцкім фармаванні) і ч. 2 арт. 356 КК (здрада дзяржаве, здзейсненая службовай асобай, якая займае адказнае становішча, або асобай, на якую распаўсюджваецца статус вайскоўца). Справу будзе разглядаць Любоў Сімахіна.

Верагодна, ён працаваў у Дэпартаменце крымінальнай выведкі, які падаў супраць Аляксандра пазоў за прычыненне маёмаснай шкоды.

Аляксандра затрымалі, верагодна, у студзені. Паводле інфармацыі ў ягоных сацсетках, мужчына жанаты, у 2014 годзе скончыў БДУІР.

Чытаць па спасылцы 👉 https://spring96.org/be/news/116816

У Гомелі працягваецца суд за «агентурную дзейнасць» і «здраду дзяржаве» над украінцам і двума беларусамі

У Гомельскім абласным судзе 15 кастрычніка пачалі судзіць грамадзяніна Украіны Вячаслава Бародзія, а таксама беларусаў Мікалая Ласоўскага і Валянціну Полаз. Падрабязнасці пераследу ўкраінскага егера сталі вядомыя летась з прапагандысцкага фільму, у якім Вячаслава падчас следчых дзеянняў вадзілі на ланцугу.

Агулам трох чалавек абвінавачваюць адразу паводле шасці артыкулаў Крымінальнага кодэкса, у тым ліку «здрада дзяржаве» і «агентурная дзейнасць». Працэс у закрытым рэжыме вядзе суддзя Яўген Шаршнёў.

Падрабязнасці справы 👉 https://spring96.org/be/news/116394

Жыхара Краснаполля асудзілі на год калоніі за выказванне пра Лукашэнку

Жыхара Краснаполля Аляксандра Кірэева асудзілі да аднаго года пазбаўлення волі ў калоніі ва ўмовах агульнага рэжыму за крытыку Лукашэнкі пры сілавіках. Такі прысуд вынес суд Краснапольскага раёна 2 кастрычніка. Справу разглядала суддзя Яўгенія Краўцова.

Падставай для крымінальнай справы стала тое, што Кірэеў у чэрвені ў прысутнасці супрацоўнікаў Краснапольскага РАУС і аддзела прымусовага выканання Краснапольскага раёна, выказаў негатыўную ацэнку Лукашэнкі. Паводле версіі абвінавачання, пры гэтым ён выкарыстаў ненарматыўную лексіку.

Чытаць па спасылцы 👉 https://spring96.org/be/news/116821

У Гродне судзяць індывідуальнага прадпрымальніка

Сёння ў Гродзенскім абласным судзе пачынаюць судзіць Андрэя Слізевіча — індывідуальнага прадпрымальніка. Паводле версіі абвінавачання, ён нібыта пакідаў негатыўныя каментары пра Расею пасля тэракту ў «Крокус Холе» і заклікаў бамбіць расейскія гарады.

Суддзя Віталь Кулеш разглядае справу ў дачыненні да мужчыны паводле трох артыкулаў: арт. 130 (распальванне сацыяльнай варожасці і варажнечы), ч. 1 і ч. 2 арт. 368 (абраза Лукашэнкі), арт. 367 (паклёп у дачыненні да Лукашэнкі) Крымінальнага кодэксу.

Андрэя затрымалі ў сакавіку. Праўладныя каналы публікавалі з ім «пакаяльнае» відэа.

«Усе выдаткі павінны праходзіць праз выбарчы фонд». Ці здымуць з выбараў* камуніста Сыранкова за парушэнні?

Да 6 снежня ініцыятыўныя групы збіраюць подпісы за кандыдатаў. Па ўсёй Беларусі даволі актыўна збіраюць подпісы і ў падтрымку прадстаўніка Камуністычнай партыі Сяргея Сыранкова. Пікеты ладзяцца пад сцягамі КПСС, з бюстамі Леніна і раздрукаванымі партрэтамі прэдэндэнта ў кандыдаты.

Сыранкоў ідзе на выбары пад лозунгам «Не замест Лукашэнкі, а разам з ім». У першы дзень збору подпісаў ён дэманстратыўна падпісаўся за Лукашэнку, што сведчыць пра яго "спойлернасць", а не пра рэальны намер балатавацца ў прэзідэнты.

Тым часам, на сайце Цэнтрвыбаркама пазначана, што Сыранкоў яшчэ не выдатковаў грошы са свайго выбарчага фонда. Запыталі ў юрыстаў, ці з'яўляецца гэта парушэннем.

Падрабязнасці 👉 elections2025.spring96.org/be/news/116823