group-telegram.com/uoheebuluu/30338
Last Update:
#тутуу
Улуус баһылыга Валерий Николаев 2024 сыл ахсынньы 16 күнүгэр таһаарбыт 669 нүөмэрдээх дьаһалынан 4 ыччат саҥа дьиэ күлүүстэрин туттуллар.
"Дьиэ диэн олоххо чиҥник үктэнии, үлэлииргэ-үөрэнэргэ саамай тирэх буолар улахан көмө. Кэлэр сылларга тулаайах оҕолору хаачыстыбалаах таас дьиэлэринэн эрэ хааччыйыахтаахпыт диэн сыал-сорук турар. Саҥа дьиэҕэ киирбит ыччаттар ыал буолан, үлэлээн-хамсаан дьол уйата оҥостуҥ", - диэн Валерий Валерьевич эҕэрдэ тылын анаата.
Сорохтор кэккэ биричиинэнэн улууска суох буоланнар, күлүүстэрин эппиэтинэскэ илдьэ сылдьар опекуннара дэбиэринэс нөҥүө туттулар.
Үөһээ Бүлүү нэһилиэгин баһылыгын солбуйааччыта Егор Михайлов күлүүс туппут оҕолору "ПМК" түөлбэтин олохтоохторо буолбуттарынан эҕэрдэлээн туран баһылык Максим Силигиянов аатыттан эҕэрдэ суруктары, өйдөбүнньүк бэлэхтэри туттарда.
Улуус Сэбиэтин бэрэссэдээтэлэ Николай Николаев куораттыы тииптээх саҥа таас дьиэ турар түөлбэ олохтоохторо буолан, ыаллыы дьону кытта иллээхтик-эйэлээхтик, ыраастык туттан, чэбэрдик дьаһанан олороллоругар баҕа санаатын эттэ.
Күлүүс туппут оҕолор ааттарыттан улуус мунньаҕын депутата Родион Егоров тыл этэригэр: "Икки оҕону опекаҕа ылан көрөн улаатыннардыбыт. Уол номнуо улахан киһи, кыыспыт 23 сааһа буолла. Кыыспыт ПМК-быттан ханна да барыам суоҕа диэбит баҕа санаата туолан, бүгүн саҥа дьиэ күлүүһүн тутан, ПМК олохтооҕо буолбутуттан олус үөрдүбүт. Саха сиригэр олус үчүгэй бырагыраама үлэлээн, тулаайах оҕолорго толору хааччыллыылаах хастыы эмэ мөлүйүөннээх дьиэлэри биэрэллэрэ туох да дьоһуннаах дьыала. Ким кинилэри дьиэлиэ этэй?! Этэҥҥэ ыал-күүс буолан, дьоллоохтук олордуннар диэн алҕаатаҕым буолуохтун", - диэтэ.
Бэдэрээччит - Дмитрий Тумусов салайааччылаах "Строймонтаж Комплект" хаарчахтаммыт эппиэтинэстээх тэрилтэтэ сылаас, сырдык, олус хаачыстыбалаахтык тутуллубут дьиэҕэ күлүүстэрин ылбыт ыччат дьон сотору кэминэн көһүөхтэрэ, саҥа сылы саҥа дьиэҕэ көрсүөхтэрэ.
"Үөһээ Бүлүү" хаһыат
