Ахсынньы 24 күнүгэр, Үөһээ Бүлүү улууһугар Өрөспүүбүлүкэ үрдүнэн аан бастакы нэһилиэнньэҕэ анаммыт үбү-харчыны сөпкө туттууга үөрэтэр хабыныат Россия Национальнай баанын пилотнай бырайыагын быһыытынан арылынна.

Кэлиҥҥи кэмҥэ интернет, телефон нөҥүө үлэлиир түөкүттэртэн Саха Сирин олохтоохторо эмсэҕэлииллэрэ элбээн, Россия Баана "Финансовая грамотность" диэн үбү-харчыны сөпкө туттууга анал бырагыраамма оҥорбута.

Улуус баһылыгын үпкэ уонна экономикаҕа солбуйааччы Саргылана Васильевна Алексеева Россия национальнай баанын Дьокускайдааҕы салаатын кытта ыкса үлэлэһэн, бу бырагыраамманы маассабайдык үлэлэтэргэ бастакы пилотнай улууһунан киирдибит.

Ол курдук, ахсынньы 24 күнүгэр, улууспут Киин библиотекатыгар үбү харчыны сатаан туттарга нэһилиэнньэ бары араҥатын үөрэтэр хабыныат үөрүүлээх быһыыга-майгыга арылынна.

Муниципальнай оройуон үбүлээһининэн бу хабыныакка компьютер ылылынна, Россия Баана бэйэтин өттүттэн анал методическэй матырыйааллары, брошюралара, үөрэтэр суруктары ыытта.
Хабыныат үлэтин чэрчитинэн киин библиотека мультимедийнай саалыгар онлайн уроктар ыытыллыахтара, үп-харчы эйгэтин үлэһиттэрэ тэрээһиннэри ыытыахтара, хабыныакка дьон бэйэтэ компьютерга олорон быһа эфирынан консультация ылыа, гарант, консультант плюс автоматизированнай системаларынан туһаныа. Библиотекарьдар онно күүс көмө буолуохтара, ситимнээх үлэни ыытыахтара.

Кэлэр сылга маннык хабыныаттар Дүллүкү, Боотулуу, Өргүөт, Далыр уонна ыраах сытар Туобуйа нэһилиэктэригэр арыллыахтара.

Аныгы үйэҕэ үп-харчы эргииригэр түөкүннэртэн ордук саастаах дьоммутун көмүскүөхтээхпит, эдэр кэнчээри ыччаппытын сатаан харчыны туһанар, финансовой бары өҥөнү толору туһанар гына үөрэтиэхтээхпит. Бу сыалы ситиһэргэ маннык хабыныаттар тирэх буолуохтара диэн эрэнэбит.

#КабинетФинансовойГрамотности
#БанкРоссии

T.me/it/ValeriNikolaev.com