Чарговага «Ганаровага грамадзяніна» Віцебшчыны судзілі за «экстрэмізм»

Гэта Юрый Лабанаў — электрагазазваршчык «Лепельводаканала». Імя мужчыны сёлета занеслі на Дошку гонару Лепельскага раёна па выніках 2023 года.

Учора ў Лепелі, апроч яго, судзілі яшчэ дваіх чалавек па палітычных адміністрацыйных справах. Як піша @vitebsk_info, сярод іх яшчэ адна супрацоўніца «Лепельводаканала» — Вікторыя Стульба.

У Беларусі новае «экстрэмісцкае фармаванне» — «Беларуский Народный Трибунал»

Адпаведнае рашэнне прынятае МУС 12 лістапада.

Паводле ведамства, дачыненне да ініцыятывы маюць Ігар Макар, Арцём Прыпісноў, Мікіта Леанюк, Вольга Катовіч.

🗳За «перашкоду выбарам і рэферэндуму» з 2020 года ў Беларусі асудзілі 20 чалавек

Сёлетняя выбарчая кампанія перайшла ў актыўную фазу: з 7 лістапада па 6 снежня ў Беларусі збіраюць подпісы за «вылучэнне кандыдатаў у прэзідэнты», а падстаўныя кандыдаты пачалі здымаць свае кандыдатуры.

Паводле інфармацыі «Вясны» з 2020 года асудзілі ўжо 20 чалавека за «перашкоду ажыццяўленню выбараў», з іх пяць — жанчыны, у адносінах да сямі чалавек справы разглядаліся завочна. Па справах за выбары-2020 агулам былі асуджаны восем чалавек, а за рэферэндум-2022 — 12. Паводле артыкула 191 Крымінальнага кодэкса беларусаў і беларусак судзілі за заклікі «пайсці ў госці да Ярмошынай», за лісты сябрам выбарчых камісій, за ўлёткі перад рэферэндумам.

«Вясна» распавядае, каго і за што судзілі ў Беларусі за «перашкоду выбарам і рэферэндуму».

Чытаць па спасылцы 👉 https://spring96.org/be/news/116682

Амбасада Германіі ў Беларусі пракаментавала сустрэчу Марыі Калеснікавай з татам

«Мы рады, што Марыя Калеснікава пасля больш за 600 дзён адзіночнага зняволення атрымала магчымасць убачыць свайго бацьку. Беларусь абавязана выконваць мінімальныя гуманітарныя стандарты ў адносінах да зняволеных. Да іх належаць права на наведванне, атрыманне пошты і медыцынскае абслугоўванне. Мы патрабуем вызвалення ўсіх палітзняволеных», — напісала амбасада на сваёй старонцы ў Facebook.

Нагадаем, учора з'явіліся фотаздымкі сустрэчы Марыі са сваім татам.

Спісы на «гутаркі», пагрозы звальненнем, забарона на выезд — чарговая хваля рэпрэсій на Беларускай чыгунцы

Фактычных звестак аб колькасці прыцягнутых да «прафілактычных гутарак» і праверак або затрыманых супрацоўнікаў няма, аднак падобныя выпадкі далёка не адзінкавыя, піша «Супольнасць чыгуначнікаў Беларусі».

Паводле звестак ініцыятывы, толькі ў адным аддзяленні БЧ (Мінскага — НАЧ-1) у спісах супрацоўнікаў, якіх неабходна праверыць ці «паразмаўляць», утрымліваецца больш за 60 чалавек.

З часткай людзей проста праводзяць «прафілактычную гутарку»: запалохваюць звальненнем ці крымінальнай справай і далейшым турэмным тэрмінам, даюць падпісаць паперу-абавязацельства, што супрацоўнік не будзе ўдзельнічаць у недзяржаўных мерапрыемствах. Іншым пасля «гутаркі» прапануецца ў добраахвотна-прымусовым парадку наведаць КДБ.

Пры правядзенні «гутарак» супрацоўнікі КДБ забіраюць у людзей мабільныя тэлефоны на сем-дзесяць хвілін і праводзяць з імі маніпуляцыі без ведама ўладальнікаў.

🔗Хроніка палітычнага пераследу

👷‍♂️За чатыры гады ў Беларусі знішчаны незалежны прафсаюзны рух: 17 актывістаў дагэтуль за кратамі

Сярод масавых парушэнняў правоў працоўных у Беларусі істотнае месца займае знішчэнне незалежнага прафсаюзнага руху і крымінальны пераслед яго кіраўнікоў і актывістаў.

Па звестках праваабаронцаў «Вясны», за перыяд з верасня 2020 па 2024 год было затрымана больш за 50 актывістаў незалежных прафсаюзаў і арганізатараў стачкамаў на прадпрыемствах. Многія з іх за сваю дзейнасць па абароне працоўных правоў зазналі крымінальны пераслед.

Распавядаем, як беларускія ўлады знішчалі незалежны прафсаюзны рух.

Чытаць па спасылцы 👉 https://spring96.org/be/news/116681

❗️Больш за месяц невядомае месцазнаходжанне палітвязня Аляксандра Францкевіча

У чэрвені у судзе Ваўкавыскага раёна палітвязню Аляксандру Францкевічу, асуджанаму раней да 16 гадоў і дзевяці месяцаў калоніі ва ўмовах строгага рэжыму, дадалі яшчэ адзін год зняволення. Яго абвінавацілі паводле ч. 2 арт. 411 КК (злоснае непадпарадкаванне адміністрацыі калоніі).

Да разгляду апеляцыйнай скаргі яго ўтрымлівалі ў баранавіцкім СІЗА-6, адкуль напачатку кастрычніка этапавалі ў калоніі, але якую — невядома. З таго часу яго блізкія не атрымлівалі ад яго ні лістоў, ні паведамлення з папраўчай установы, куды яго накіравалі для адбыцця пакарання. Таму фактычна больш за месяц нічога невядома пра стан і месцазнаходжанне Аляксандра.

Маці палітвязня — Таццяна — цяпер таксама знаходзіцца ў зняволенні ў межах крымінальнай справы.

Чытаць па спасылцы 👉 https://spring96.org/be/news/116689

У канцы лістапада пачынаецца суд на святаром Генрыхам Акалатовічам. Яму пагражае да 15 гадоў за «здраду дзяржаве»

Суд над Акалатовічам пачнецца 25 лістапада ў Мінскім абласным судзе. Яго абвінавачваюць у здрадзе дзяржаве (ч. 1 арт. 356 КК). Судзіць яго будзе Уладзімір Арэшка, паведамляе @nashaniva.

Каталіцкаму святару 64 гады. Родам ён з вёскі Новая Мыш Баранавіцкага раёна.

Апошнім часам Генрых служыў у каталіцкім храме святога Язэпа ў Валожыне. Яго затрымалі 17 лістапада 2023 года.

Акалатовіч раней перанёс інфаркт і хварэў на анкалогію, таму незадоўга перад затрыманнем яму правялі аперацыю на страўніку. Святару трэба асаблівы дагляд і медыцынская дапамога. Але яго трымаюць у СІЗА КДБ, а стан здароўя невядомы.

Спыніла працу найбуйнейшая школа замежных моваў на Берасцейшчыне «АКЦ Мост»

Пра гэта паведамляе @pozirkonline.

Студэнтам курсаў і іх бацькам пра адмену заняткаў і прыпыненне дзейнасці школы паведамілі ў групавых чатах, без тлумачэння прычынаў.

Паводле звестак «Позірку», офіс «АКЦ Мост» сёння быў апячатаны.

🔗Хроніка палітычнага пераследу

Следчы камітэт скончыў расследаванне крымінальнай справы аб атацы дрона на базу мінскага АМАПу

Фігурантамі расследавання сталі ўдзельнікі ініцыятывы «Супраціў» Павел Кулажэнка і былы вайсковец Віталь Пацехін. Абодва яны знаходзяцца за мяжой. Ім інкрымінавана 7 артыкулаў крымінальнага кодэкса.

Следствам накладзены арышт на маёмасць фігурантаў справы агульным коштам каля 240 тысяч рублёў.