group-telegram.com/RwayatSudan/42558
Last Update:
بعد إصرار حتى أمي وافقت إننا نرجع وصلنا البيت وقفلنا علينا ورقدنا لقيت مكالمة من أنهار رجعت ليها وكلمتها سألتني من اسم المستشفى ونمت عشان بكرة ح نمش من بدري .. وفعلًا أمي من قبل ما الصباح يصبح سامعة حركتها في المطبخ لقيتها عملت الشاي وعملت معاه زلابية عشان عارفة هشام وعزو بيحبوها.
مشيت صحيت هديل ومصطفى لـ المدرسة وطلعنا سوا وصلنا وكان معاهو هشام و2من أصحابو هشام شال الشاي ودخل ليهم فِضلنا مُستنينهم برة قبل ما يخلصوا من شراب الشاي جات خالتي أميره "أم هشام" معاها قهوة وطبعًا الجماعة مبسوطين من الدلع وعاملين العنبر زي بيتهم بعد ساعة جا الدكتور وإتكلم معاهو ومشى خليت أمي وخالتي مع بعض وطلعت رديت لـ انهار وصفت ليها نحن وين وقعدت برا منتظراها .. لقيت هشام والأولاد طالعين ..!
لمحت أنهار جاية من بعيد رفعت ليها يدي وجاتني ودخلت سلمت لـ امي وخالتي..عزو كان نايم طلعنا قعدنا برا كان واضح إنها عايزة تقول حاجة بس قبل ما تتكلم هشام سلم وأداني سندوتشات ودخل الغرفة.
أنهار: الود الحلو دا منو؟
ملك: هشام ود خالتي الله ما بتعرفي؟
أنهار: نعمممم؟ واي بتهظري شفتو برا مع أصحابو وسألتو من اسم أخوك وصف لي بس تاني ما قال شي .. مالو بقى حلو كدا؟
ملك: هشام من يومو حلو يختي إنتِ الما كُنتِ بتشوفي من كترة الحلوين الفي حياتك.
أنهار: الجوة دي أمو؟ ماشة أطلبو منها ما قادره أعيش من غيرو خلاص .. مقعداني هنا ليه أرح ندخل
"قبل ما أرد لقيتها قامت ودخلت مشيت وراها وبقينا قاعدين كلنا وهي تتظارف مع خالتي"
ملك: طيب إحنا ح نمش بعد دا أجيب أخواني وأجهز الغداء.
هشام: لالا ما تجهزي أي غداء وتعملي نفسك برنامج أصلًا ح أوصلكم كلكم وتجوا بكرة بس.
ساميه"أم عزو": بس يا هشام ..
هشام: يا خالتي ولدك زي الحصان ماعندو أي شي بدل التعب دا أرجعو البيت ولمت يطلع أقعدي قصادو لما تزهجي منو أصلًا بكره أو بعدو ح يطلع يلا يلا الشباب ديل جاين بعد كدا.
أنهار: اي يا خالتي أصلًا الأولاد بيحبو يقعدو براهم وما يصدقوا واحد يقعد في المستشفى يعملوا برنامج
هشام: واعية من يومك وبتعجبيني يلا سوقيهم وألحقوني.
طلعنا كلنا وهشام وصل أمو لأنها أقرب ووصلنا إحنا وأنهار نزلت معانا بس طول الطريق كل ما أعاين ليها بلقاها مركزة معاهو حتى بعد وصلنا بقت تسألني منو كتير ما إتطمنت لـ الوضع لاني عارفه أنهار وعارفة تفكيرا ..!
تاني يوم صحينا بدري كالعادة عشان أمي تجهز الشاي وأنا كنت براجع لـ هديل عشان ممتحنة لقيت مكالمة من أنهار إسغربت الزمن بدري بس ما رديت خلصت شرح وجهزنا وطلعنا مجرد ما وصلنا شفت أنهار واقفة وماسكة تلفونا
أنهار: يا بتي بتصل ليك من صباح الرحمن ليه ما رديتي علي؟
ملك: الجابك بدري شنو؟
أنهار: عملت ليكم قهوة وجبت معاي بسبوسة.
سامية: كتر خيرك يا بتي ما قصرتي...!
"دخلنا وأنا مستغربة في أنهار معقولة تصحى بدري كدا وتعمل قهوة وبسبوسة كمان؟ امس كلمتها بدري بس برضو جات بعد ساعتين .. كالعادة إستلمت الونسة وكل شويه تقول أنا الـ عملت البسبوسة .. لمت الظهر أذن طلعنا برا صلينا وقعدنا في الصاله جاء هشام مشيت عليه سألته:
الدكتور قال شنو؟
هشام: ح يطلع المساء إن شاءالله.
ملك: طيب الحمد لله.
هشام: طلبت ليك إجازة انتِ وهو عشان ما تخلي أمك براها.
ملك: والله كنت ناسية موضوع الشغل دا.
أنهار: إنتِ شغالة معاهم؟
هشام: أي وإنتِ مش خلصتي جامعة معاها؟ إشتغلتي وين؟
أنهار: والله فتشت كم بنك كدا ما قبلوني تاني كسرت الحنك.
هشام: ليه ياخ طيب ما جيتي قدمتي مع ملك كان ضمنتي مكانك.
انهار: أقدار بس.
هشام: ما فات شي أسي جيبي أوراقك أنا بتوسط ليك.
أنهار: بجد؟ياريت ياخ زهجت من قعدة البيت ومنها أكون مع ملك.
وإحنا راجعين الطريق كلو أنهار مُتحمسة لـ الشغل ومنتظرة متين أخلص إجازتي عشان تنزل هي حسب كلام هشام إننا ننزل سوا .. كانوا بيتكلموا الطريق كلو عن الشغل وهي مركزة شديد في الموضوع غير العادة
في الوقت دا كنت ساكتة بحاول أفهم أنهار عايزة تصل لـ شنو بالظبط؟ ياما حنستها تشتغل معاي رفضت وأصلًا ما كان عندها نيه شغل لانو لو فكرت ساي أبوها من مكانو ييخلها رئيسة قسم ..!
____
"في مكان أخر"
كانت الساعة 4 صباحًا لما خلصت شغل ودخلت المسجد صليت الصبح وأنا راجع على البيت ما كنت شايف قدامي من النعاس العلي دخلت البيت ختيت تلفوني القافل في الشاحن ورقدت نمت .. أظن نمت ساعتين بس وصحيت بصوت أمي وهي بتصحي فيني:
_عمرو يا ود عمرو قوم كفاك نوم وهاك دا ود عمك عايزك ..
ختت لي التلفون في أضاني ما حبيت أبين الضيق قداما وإتكلمت عادي رُغم إنو كلامو أبدًا ما كان عادي ..
بعد هي طلعت قعدت وأنا ماسك تلفوني كنت بعاين للرسايل بعدم مُبالاة لحد ما عيني وقعت على رسالتا كانوا 3 رسائل وبُساط شديد مقارنة لـ البينا .. تلاتة رسائل بتنهي أي شي بينا .. بحاول أستوعب وأفكر أنا عملت شنو ..؟
BY رِوايات سُودانية🪐🤎!)"
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/RwayatSudan/42558