Бүгүн СӨ Тыа хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова салайааччылаах 1-кы бөлөх отчуотун Соловьев нэһилиэгиттэн саҕалаата. Отчуоту барыта 70-ча киһи иһиттэ, үлэни сөптөөҕүнэн сыаналаатылар.

Олохтоохтортон сүрүннээн тыа хаһаайыстыбатыгар, доруобуйа харыстабылыгар, үөрэхтээһиҥҥэ сыһыаннаах ыйытыылар киирдилэр. КлиКра сокуон долгутарын эттилэр.

Оскуола дириэктэрэ Лена Яковлева спортивнай уонна оҕо былаһааккаларыгар капитальнай өрөмүөнү, ону сэргэ элбэх функциялаах киини туруоруста.

Виктор Илларионов быһыт оҥоһуллуон наадатын эттэ. Валентина Ефремова саҥа хочуолунайы олохтоохтор ааттарыттан туруоруста.

Александра Собакина былырыын 18 ыал ППМИ бырагырааматынан киинтэн ититиигэ холбонон, үөрүүлэрэ үксээбитин эттэ, улуус, өрөспүүбүлүкэ салалтатыгар махтанна.