✝ስቅለት✝

✍🏽ጌታ ሐሙስ ማታ በ፩ ሰዓት የሐዋርያትን እግር አጠበ በ፪ ሰዓት ራት
በሉ በ፫ ሰዓት ስለ መንፈስ ቅዱስ አስተማረ በ፬ ሰዓት ስለ ሐዋርያት
አስተማረ በ፭ ስለ እራሱ በጌቴሴማኒ ጸለየ ከእዚህ በኃላ በ፮ ሰዓት
በአይሁድ እጅ ተያዘ ልብሱን ገፈው የእንግርግሪት አስረው እያዳፉና
እየገፉ ወደ ሐና ወሰዱት ሊቀ ካህናቱ ሐና ምን እያልኽ ታስታምራለኽ
አለው በስውር የተናገርኩት የለም የሰሙትን ጠይቅ አለው አንዱ ጭፍራ "ከመዝኑ ትትዋሥኦ ለሊቀ ካህናት" ብሎ ፊቱን በጥፊ መታው ጌታም ክፉ ከተናገርኩ መስክርብኝ እንጅ እንዴት በዳኛ ፊት ትመታኛለኽ አለው ከዚያ
በኋላ ከሌሊቱ በ፫ ሰዓት ደግሞ ከሐና ወደ ቀያፋ ወሰዱት ጴጥሮስ ከሩቅ እየተከተለ ገብቶ እሳት ከሚሞቁት ጋራ ተቀምጦ ነበረ ደጃፍ ጠባቂዋ "በለሲዳ ኦ አረጋዊ ብእሲ እንተሁ እምገሊላ ብእሲ" አለችው ደንግጦ
አላውቀውም ኣለ ፪ኛ የማልኮስ ወንድም ኮልስብ ከእርሱ ጋራ አይቼኻለኹ እለው አላየኸኝም ብሎ ካደ አንዲት ሴት መጥታ የኢየሱስ ደቀ መዝሙር ነኽ "ቃልከ የዐውቀከ" እንዲል ንግግርኽ ያስታውቅብኻል አለችው እሱም አላውቅም እያለ ይምል ይገዘት ጀመረ ወዲያው ደሮ ጮኸ ጌታ ሥልሰ ትክሕደኒ ብሎት ነበረና ዘወር ብሎ አየው ወደ ውጭ ወጥቶ ምርር ብሉ ኣሰቀሰ፡፡ ጌታም የሌሊት ድብደባው ሲጸናበት ተሰወራቸው የይሁዳ ዘመድ
የምትኾን አንዲት ሴት ልጇን ታቅፋ ኣገኛትና አትናገሪ አላት እሷ ግን
ወዲያው በእጇ ጠቁማ አመለከተቻቸው ጌታም ትቂት እስካርፍ መታገሥ አቃተሽ ብሎ እስከ ዕለተ ምጽአት ድንጋይ ኹኚ ከዚያ በኋላ አስነሥቼ እፈርድብሻላኹ አላት ወዲያው ድንጋይ ኾነች አይሁድም በጥዋት ወደ ጲላጦስ ወስደው ሊያሰቅሉት መከሩ "ወጸቢሖ ተማከሩ ሊቃነ ካህናት" እንዲል ይሁዳም ሲወስዱት አይቶ ተጸጸተ እሱ በተአምራት ይድናል እኔ ብሬን ይዤ እቀራለኹ ብሎ ነበረ የማይለቁት ሲኾን ኺዶ እንኩ ገንዘባችኹን አላቸው የምንሻውን ሰጠኸናል የምትሻውን ወስደኻል ኣሉት ብሩን በቤተ መቅደስ በትኖ ሊታነቅ ኼደና ከዛፍ ተሰቀለ ዛፋም "ኦ ይሁዳ ነስሕ ከመ እኁከ ጴጥሮስ" ይላል እንደ ወንድምኽ ጴጥሮስ ንስሓ ግባ ብትለው ከሌላ ኺዶ ተሰቀለ ገመዱ ተበጥሶ በመውደቁ፡ ሰውነቱ ቆስሎ ከዛ ቀን በኋላ ሞተ፡ ጌታ ተይዞ ወደ ዐውደ ምኩናን ሲገባ ፮ ጦረኞች ከበር ቁመው ነበረ
ሲያያቸው ተደፍተው ሰገዱለት እነዚህ ከርእሱ ተመሳጥረው ነው በማለት በ፲ በ፲ ኀያላን አስያዟቸው አሸንፈው ሰገዱለት አኹንም በ፲፭ በ፲፭ ኀያላን እስያዟቸው መቆም አቅቷቸው ተኝተው ወድቀው ሰገዱለት ጲላጦስ ይህን አይቶ ፈራ እውን የአይሁድ ንጉሥ ነኽን አለው አንተ ትቤ አንተ አልኽ አለው አይሁድ ግን ሰንበትን የሻረ ኦሪትን ያቃለሰ ራሱን የእግዚአብሔር ልጅ ያደረገ ለቄሳር ግብር የከለከለ ዐሳዊ ነው እንጅ ንጉሥ አይደለም ኣሉ ዝም አለ ይህን ያኽል ሲያሳጡኽ አትመልስም ልገድልኽም ላድንኽም
ሥልጣን አለኝ አለው "ወይቤሎ ኢኮንከ ብዉሐ ሊተ ወኢምንተኒ ሶበ
ኢተውህበ ለከ እምሰማይ" እን (ዮሐ፲፱፥፲፩) ይህን ተናግሮ ዝም አለ ይህን በተናገርንበት እስቲ ንገረኝ አለው መንግሥቴስ በዚህ ምድር ብትኾን ኑሮ ለአንተ ተላልፌ ባልተሰጠኹ ነበረ አዳምን ከልጅ ልጆቹ ጋራ ወደ ገነት ልመልሰው ከሰማይ ወርጄ ከድንግል ማርያም ተወልጄ በዚህ ምድር ወንጌልን እያስተማርኩ ሳለኹ አይሁድ ይዘው ለአንተ አቅርበውኛል እንጅ ብሎ ኹለን ነገረው ይህን ሰው በደል አላገኘኹበትም ብሎ ልልቀቀው አላቸው ከገሊላ ጀምሮ እስከዚህ ድረስ ሲያውክ የነበረ ነው አሉ ገሊላ ሲሉ ሰምቶ ወደ ገሊላው ገዥ ወደ ሄሮድስ ላከው ሄሮድስም ዝናውን እየሰማ ሊያየው ይወድ ነበረና ሲያየው ደስ አለው፡፡ ነገር ግን ቢጠይቀው የማይመልስለት ኾነ ይህስ ቢቻል ኹለት ሞት ይገባዋል ብሎ አክፋፍቶ አስገርፎ ቀይ ግምጃ አልብሶ ሰደደው ጲላጦስ ግን ብዙ እንዳስገረፈው ዐውቆ አዘነና ፫ ጊዜ አመጣችኹት በደሉ ምንድን ነው አላቸው ገርፌ ልልቀቀው በርባንን ልስቀለው አላቸው አይሁድ ግን ሕዝቡን አስተባብረው ስቀለው ስቀለው እያሉ ጮኹ ያን ጊዜ ከሚስቱ ከአብሮቅላ የማሰጠንቀቂያ ደብዳቤ ደረሰው ዲዳ የነበሩ ልጆቹ መካራና ደርታን አንደበታቸው ረቶ የኾነውን ነግረዋት ነበረና ይህን አይቶ ሊፈታው ፈለገ "እመ አሕየውኮ ለዝንቱ ኢኮንከ ዐርኮ ለቄሳር" እን (ዮሐ፤ሀና/፪) ይህን ብታድን የቄሳር ወዳጅ አይደለኽም አሉት ስለዚህ ውሃ አስመጥቶ "ንጹሕ አነ እምደመ ለዝ ብእሲ ጻድቅ" እን (ማቴ፳፯፥፳፬) እኔ ከዚህ ጻድቅ ሰው ደም ንጹሕ ነኝ ብሎ እጁን ታጠበ እነሱ ግን ደሙ በእኛና በልጅ ልጆቻችን ይኹን ብለው ተቀብለው ፷፻፮፻፷፮ (6666) ጊዜ ገርፈውታል ዐጥንቱ እንደ በረዶ ነጭ ኾነ የሾኽ አክሊልጎ ንጉነው በራሰ ደፉበት ራሱንም በዘንግ ደበደቡት መስቀሉንም ከ፫ቱ ዕፀ አውልዕ ዕፀ ዘይት ዕፀ ወይን ከ፬ቱ ዕፀ በለስ ቁመቱ ፯ ክንድ ከስንዝር ወርዱ ፫ ክንድ ከስንገር አድርገው ሠሩ ከሊቶስጥራ አሸክመው ወደ ቀራንዮ ከወሰዱት በኋላ በ፮ ሰዓት ሰቀሉት በግራው ዳክርስን በቀኙ
ጥጦስን ዐብረው ሰቀሉ፡፡
በዚህ ጊዜ ፯ ተአምራት ተደርገዋል
~ፀሐይ ጨለመ
~ጨረቃ ደም ኾነ
~ከዋክብት ረገፉ
~መቃብራት ተከፈቱ
~ሙታን ተነሱ
~አእባን ተፈቱ
~መንጦላዕተ ቤተ መቅደስ ተተረተረ ✍🏽በዚህ ኹኔታ ስፍር ቍጥር የሌለውን መከራ ተቀበለ በጥቅሉ ፲፫ቱ ሕማማተ መስቀል ተብለው ይጠራሉ ፯ቱን አጽራሐ መስቀል ተናግሮ በ፱ ሰዓት ቅድስት
ነፍሱን ከሥጋው ለየ በሲኦል የነበሩ ነፍሳትን አውጥቶ ቀኝ እጁን የተወጋ ጎኑን አሳያቸው እንደ ጥምቀት ኹኗቸው ገነት አግብቷቸዋል ከዚህ በኋላ በ፲፩ ስዓት ዮሴፍና ኒቆዲሞስ ከጲላጦስ አስፈቅደው ከመስቀል አውርደው በንጹሕ በፍታ ገንዘው ቅዱስ ቅዱስ ቅዱስ እግዚአብሔር እያሉ ቀብረውታል፡:

✝.ወስብሐት ለእግዚአብሔር ወለወላዲቱ ድንግል ወለመስቀሉ ክቡር አሜን።✝

ምንጭ፦ባሕረ ሐሳብ እና የኢትዮጵያ ታሪክ👇👇👇
@Ethiopia7980
@Ethiopia7980
@Ethiopia7980

ነሐሴ 16
ዕርገተ ማርያም

ነሐሴ ዐሥራ ስድስት በዚህች ቀን አምላክን የወለደች የእመቤታችን ድንግል ማርያም ሥጋዋ ወደ ሰማይ ያረገበት መታሰቢያዋ ሆነ ። ከዕረፍቷም በኋላ ከእርሳቸው ስለመለየቷ ሐዋርያት ፈጽሞ እያዘኑ ነበር ።

ከዚህም በኋላ የክብር ባለቤት ጌታችን ኢየሱስ ተገለጠላቸው እርሷን በሥጋ ያዩ ዘንድ እንዳላቸውም ተስፋ ሰጣቸው ። ወንጌላዊ ዮሐንስም እስያ በሚባል አገር እያስተማረ ሳለ በነሐሴ ወር ዐሥራ ስድስተኛ ቀን ተድላ ደስታ ወደአለባት ገነት በመንፈስ ቅዱስ ተነጠቀ ።

የክብር ባለቤት ጌታ ኢየሱስ ክርስቶስን የእመቤታችን ማርያም ሥጋዋ ካለበት ከዕፀ ሕይወት ሥር ተቀምጦ አየው። የንጽሕት እናቱንም ሥጋ ታወጣ ዘንድ ምድርን እንዲጠሩዋት ሰባቱን የመላእክት አለቆች አዘዛቸው ። እነርሱም የንጽሕት እናቱን ሥጋ ታወጪ ዘንድ እግዚአብሔር አዞሻል አሏት ። ያን ጊዜም ከዕፀ ሕይወት በታች ካለ መቃብር የእመቤታችን ማርያም ሥጋዋ ወጣ ።

የክብር ባለቤት ጌታችንም እንዲህ እያለ አረጋጋት የተወደድሽ የወለድሽኝ እናቴ ሆይ ዘላለማዊ ወደ ሆነ መንግሥተ ሰማያት አሳርግሽ ዘንድ ነዪ ። ያን ጊዜም በገነት ያሉ ዕፀዋት ሁሉም አዘነበሉ መላእክት የመላእክት አለቆች ጻድቃን ሰማዕታትም እየሰገዱላትና ፈጽሞ እያመሰገኗት አሳረጓት ።

አባቷ ዳዊትም ንግሥት እመቤታችን ወርቀ ዘቦ ለብሳ ደርባ ደራርባ በቀኝህ ትቀመጣለች እያለ በበገና አመሰገናት ። በኪሩቤል ሠረገላ ተቀምጣ ከዐረገች በኋላ በልጁዋና በፈጣሪዋ ቀኝ በታላቅ ክብር ተቀመጠች ።

ወንጌላዊ ዮሐንስም ከእርሷ በረከትን ተቀብሎ ሰግዶላት ተመልሶ ከሰማይ ወረደ ሐዋርያትን ተሰብስበው ስለ እመቤታችን ቅድስት ድንግል ማርያም ሥጋ ፈጽሞ ሲያዝኑና ሲተክዙ አገኛቸው ። እርሱም እንደ አየ እንደ ሰማ ሥጋዋንም በታላቅ ክብር በምስጋና እንደ አሳረጓት ነገራቸው ።

ሐዋርያትም በሰሙ ጊዜ ዮሐንስ እንዳየና እንደሰማ ባለማየታቸውና ባለመስማታቸው እጅግ አዘኑ ። ከዚህም በኋላ እያዘኑ ሳሉ እነሆ የክብር ባለቤት ጌታችን ኢየሱስ ክርስቶስ ተገለጠላቸውና የፍቅር አንድነት ልጆች ሰላም ይሁንላችሁ ስለ እናቴ ማርያም ሥጋ ለምን ታዝናላችሁ ። እነሆ እኔ እርሷን በሥጋ ላሳያችሁ ልባችሁም ደስ ሊለው ይገባዋል አላቸው ይህንንም ብሎ ከእርሳትው ዘንድ ወደ ሰማያት ዐረገ ።

ሐዋርያትም ዓመት ሙሉ ቆዩ የነሐሴም ወር በባተ ቀን ለሐዋርያት ዮሐንስ እንዲህ አላቸው አምላክን የወለደች የእመቤታችንን ሥጋዋን ለማየት የተዘጋጀን አድርጎ ያሰየን ዘንድ ኑ ይህን ሁለት ሱባዔ በመጾም የክብር ባለቤት ጌታችንን ኢየሱስ ክርስቶስን እንለምነው በልጅዋ በወዳጅዋ ቀኝ ተቀምጣ አይተን በእርሷ ደስ እንዲለን ።

በዚያን ጊዜም ዮሐንስ እንዳላቸው በጾም በጸሎት ሱባዔ ያዙ የነሐሴ ወር እንደ ዛሬ ዐሥራ ስድስተኛ ቀን በሆነ ጊዜ የክብር ባለቤት ጌታችን ኢየሱስ ክርስቶስ ሁሉንም ሐዋርያት ወደ ሰማይ አወጣቸው ። በታላቅ ክብር በተወደደ ልጅዋ ቀኝ ተቀምጣ ከሥጋዋ ተዋሕዳ ተነሥታ እመቤታችን ማርያምን አዩዋት። እጆቿንም ዘርግታ የከበሩ ሐዋርያትን እያንዳንዳቸውን ባረከቻቸው በልባቸውም እጅግ ደስ አላቸው።

የክብር ባለቤት ጌታችን ኢየሱስ ክርስቶስም በከበረ ሥጋውና ደሙ ላይ ሠራዒ ካህን ሆነ ። እስጢፋኖስም አዘጋጀ ዮሐንስም በመፍራት ቁሙ አለ ። ሁሉም ሐዋርያት በመሠዊያው ዙሪያ ቆሙ በዚያን ጊዜ ከቶ እንደርሱ ሆኖ የማያውቅ ታላቅ ደስታ ሆነ።

ጌታችንም የቅዳሴውን ሥርዓት በፈጸመ ጊዜ ሥጋውንና ደሙን አቀበላቸው ። ከዚያም በኪሩቤልና በሱራፌል ሠረገላ ተቀምጣ በምታርግ ጊዜ የክብር ባለቤት ጌታችን ኢየሱስ ክርስቶስ እናቱ እመቤታችን ማርያምን እንዲህ ብሎ ተናገራት።

በዚች ቀን የሆነ የዕርገትሽን መታሰቢያ በዓለም ውስጥ እንዲሰብኩ ልጆችሽ ሐዋርያትን እዘዣቸው ። መታሰቢያሽን የሚያደርገውን ሁሉ ተጠብቆም በዚች ቀን ቅዱስ ቁርባንን የሚቀበለውን ኃጢአቱን እደመስስለታለሁ ። የእሳትን ሥቃይ ከቶ አያያትም መታሰቢያሽን ለሚያደርግ ሁሉ በዚች ቀን ለድኆች በስምሽ ለሚመጸውት ቸርነቴ ትገናኘዋለች ይህም ሥጋሽ ወደ ሰማይ ያረገበት ነው።

እመቤታችን ቅድስት ድንግል ማርያምም ክብር ይግባውና ጌታችንን እንዲህ አለችው ልጄ ሆይ እነሆ በዐይኖቻቸው አዩ በጆሮቻቸውም ሰሙ በእጆቻቸውም ያዙ ሌሎችም ታላላቅ ደንቆች ሥራዎችን አዩ ። እመቤታችንም ይህን ስትናገር ጌታችን ሰላምታ ሰጥቷቸው በታላቅ ደስታ ወደ ደብረ ዘይት ተመለሱ ።

የተወደዳችሁ ወንድሞች ሆይ በፍጹም ደስታ መታሰቢያዋን እናደርግ ዘንድ ይገባናል እርሷ ስለእኛ ወደ ተወደደ ልጅዋ ሁልጊዜ ትማልዳለችና ።

ለእግዚአብሔር ምስጋና ይሁን እኛንም በእመቤታችን በቅድስት ድንግል ማርያም አማላጅነት ይማረን ። በረከቷም ከርእሰ ሊቃነ ጳጳሳት ከአባ ማትያስ ከሁሉም ሊቃነ ጳጳሳትና ኤጲስቆጶሳት ጋራ ሐዋርያት ከሰበሰቧት ከቅድስት ቤተ ክርስቲያን ልጆች ከሁላችን ጋራ ይኑር ለዘላለሙ አሜን ።

(#ስንክሳር_ዘወርኀ_ነሐሴ)




ምንጭ፦ቤተ ቅዱስ ዮሐንስ አፈወርቅ

🌼🌼🌼🌼🌼🌼🌼
"ወትባርክ አክሊለ ዓመተ ምሕረትከ
ወይጸግቡ ጠላተ ገዳም" (መዝ ፷፬፤፲፩)

🌼🌼🌼🌼🌼🌼
ውድ ቤተሰቦቻችን እንኳን ከዘመነ ማርቆስ ወደ ዘመነ ሉቃስ በሰላም አደረሰን አደረሳችሁ።
🌼🌼🌼🌼🌼🌼
ዘመነ ሉቃስ ፪፻፲፭
የሰላም
የፍቅር
የአንድነት
መልካሙን የምንሰማበት
መልካም የምንሰራበት
ዘመን ያድርግልን።
🌼🌼🌼🌼🌼🌼
እግዚአብሔር አምላክ በቸርነቱ ሀገራችን ኢትዮጵያን እና ህዝቦቿን ይባርክ ይጠብቅ።
🌼🌼🌼🌼🌼🌼
@enqopazion777
"መልካም በዓል"
🌼🌼🌼🌼🌼🌼

#ዐቢይ_ጾም

ዐቢይ ለምን ተባለ ቢሉ ‹‹ዐበየ›› ማለት ከፍ አለ ማለት ሲሆን ከዚህም ግስ ዐቢይ የሚለው ቅጽል ይገኛል፡፡ዐቢይ ማለት ከፍ ያለ ትልቅ ማለት ነው፡፡ ዐቢይ ጾም የተባለበት ምክንያት፡-

ሀ. ጌታችን መድኃኒታችን ኢየሱስ ክርስቶስ የጾመው ጾም
      ስለሆነ
ለ. በቀኑ ቁጥር ከሌሎች አጽዋማት የሚበልጥ ስለሆነ
ሐ. ሦስቱ ታላላቅ የሰይጣን ፈተናዎች ማለትም
             ➛ ትዕቢት
             ➛  ስስት
             ➛  ፍቅረ ነዋይ ድል የተመቱበት ስለሆነ ነው፡፡

በቤተክርስቲያን ስያሜ መሰረት በዐቢይ ጾም ውስጥ የሚውሉ ሰንበታት እያንዳንዳቸው መጠሪያ ስም ሲኖራቸው እነርሱም፡-

#ዘወረደ

የዐቢይ ጾም የመጀመሪያው ሰንበት ሲሆን ይህም ቅድመ ዓለም የነበረ ዓለምን ፈጥሮ የሚኖር አልፋና ኦሜጋ ከሰማየ ሰማያት መውረዱንና ከእመቤታችን ከቅድስተ ቅዱሳን ከንጽሕተ ንጹሐን ከድንግል ማርያም መወለዱን የሚያመለክት ሥያሜ ነው፡፡

#ቅድስት

ይህ የሁለተኛው ሰንበት ስያሜ ሲሆን የተባለበትም ምክንያት ስለ ዕለተ ሰንበት ቅድስና ስለሚያወሳ ነው፡፡ እንዲሁም ይህ ዕለት ዕለተ እግዚአብሔር የተባለች የሰንበት ክርስቲያን ቅድስናን ያመለክታል ምክንያቱም የዚች ዕለት ጌታ እርሱ ቅዱስ እግዚአብሔር ነውና ስለዚህም ዕለተ ሰንበት ቅድስት ተብላለች፡፡

#ምኩራብ

ይህ የሦስተኛው ሰንበት ስያሜ ሲሆን በዚህ ሰንበት ጌታ በመዋዕለ ትምህርቱ በምኩራብ ገብቶ ማስተማሩ ይነገራል፡፡ እንዲሁም ይህች ዕለት መድኃኒታችን ኢየሱስ ክርስቶስ በምኩራብ ገብቶ እንዳስተማረ የሚታሰብበት ዕለት ነው፡፡ ምኩራብ ማለት የቤተ አይሁዳውያን የጸሎት ቤት ነው፡፡

#መጻጉዕ

ይህ የአራተኛው ሰንበት መጠሪያ ሲሆን ይህም ዕለት ጌታችን አምላካችን መድኃኒታችን ኢየሱስ ክርስቶስ ድውያንን መፈወሱ እውራንን ማብራቱ ለምጻምን ማንጻቱ ሽባዎችን መተርተሩ የሚያነሳ መዝሙር የሚዘመርበት እንዲሁም እነዚህ ሁሉ ድንቅ ገቢራተ ታምራቶች የሚዘከሩበት ዕለት ነው፡፡

#ደብረ_ዘይት

ይህ የአምስተኛው ሰንበት መጠሪያ ሲሆን ይህም ዕለት ጌታችን መድኃኒታችን ኢየሱስ ክርስቶስ በደብረ ዘይት ተራራ ላይ ሆኖ ነገረ ምጽአቱን እንዳስተማረ የሚወሳበት ሰንበት ነው፡፡ ደብረ ዘይት ማለት ወይራ የበዛበት ተራራ ማለት ነው፡፡

#ገብርኄር

ይህ የስድስተኛው ሳምንት ሰንበት ስያሜ ሲሆን ይህም ዕለት ለጌታው ታማኝና በጎ የሆነው ባርያ ወደ ጌታህ ደስታ ግባ ተብሎ እንደተመሰገነ የሚነገርበት ዕለት ነው፡፡

#ኒቆዲሞስ

ይህ የሰባተኛው ሰንበት ስያሜ ነው፡፡ ይህም ዕለት ኒቆዲሞስ የተባለው የአይሁድ መምህር በሌሊት ወደ ጌታው ወደ ኢየሱስ ክርስቶስ እየመጣ ይማር እንደነበረ ይታሰብበታል በዚም ዕለት የኒቆዲሞስን ታሪክ የሚያስታውስ መዝሙር ይዘመርበታል፡፡

#ሆሳዕና

ይህ የስምንተኛው ሳምንት ሰንበት መጠሪያ ሲሆን ይህም ዕለት በነቢዩ በዘካርያስ ላይ የተጻፈው ትንቢት ይፈጸም ዘንድ ጌታችም መድኃኒታችን ኢየሱስ ክርስቶስ በአህያይቷ እና በውርንጭላይቷ ላይ ተቀምጦ ሆሳዕና በአርያም ሆሳዕና ለዳዊት ልጅ ተብ እየተመሰገነ ወደ ቤተ መቅደስ መግባቱ የሚተሰብበት ዕለት ነው፡፡ ሆሳዕና ማለት ‹‹እባክህ አሁን አድን አሁን ባርከን›› ማለት ነው፡፡በሰሙነ ሕማማት ጸሎተ ፍትሃት ጸሎተ አስተስርዮ ስለማይፈጸም ጸሎተ ፍትሃትና አስተስርዮ የሚደረገው በዚሁ ዕለት ነው::

               ጾሙን የበረከት ጾም ያድርግልን፡፡

ምንጭ ፦ቤተ ቅዱስ ዮሐንስ አፈወርቅ

#ሆሳዕና
(የዐቢይ ጾም ስምንተኛ ሳምንት)

ሆሣዕና ከስምንቱ የዐቢይ ጾም እሑዶች አንዱና የመጨረሻው ሳምንት ተብሎ የሚጠራው ከትንሣኤ ቀድሞ የሚገኝ የሕማማት መገቢያ ዋዜማ ነው።

ሆሣዕና አስቀድሞ ካለው ረቡዕ ጀምሮ የሚታሰብ ታላቅ የቤተክርስቲያን የበዓል ቀን እንደሆነ ይታወቃል። ይህን ስም በዚሁ ሰንበትና በዋዜማዎቹ ዕለታት የሚዘመረው ጾመ ድጓ ‘ሆሣዕና በአርያም’’ ‘ሆሣዕና ለወልደ ዳዊት’’ ‘ዕለተ ሆሣዕናሁ አርዓየ… ‘ ወዘተ. በማለት ሆሣዕና የሚለውን ቃል ቅዱስ ያሬድና ሌሎችም አባቶች በየቦታው እየጠቀሱና እየተዘመረለት በአህያ ውርንጭላ ላይ ተቀምጦ ኢየሩሳሌም የገባበትን ሁኔታ እየተረከ ስለሚዘምር ይህ ሰንበት በጌትነትና በክብር በውዳሴና ቅዳሴ ሆሣዕና በአርአያም እየተባለ በሽማግሌዎችና በሕፃናት አንደበት በድንጋዮችም ልሳን ሳይቀር እየተመሰገነ ወደ ቅድስት ሀገር ኢየሩሳሌም በከብር ሲገባ ለሰጣቸው ለተቀደሰ ሰላሙና ፍቅሩ መታሰቢያ ሆኖ የተሰጠ ነው። ጌታችን ኢየሱስ ክርስቶስ “ሌላ ቀን እንደ ተራ ሰው ሆኖ ወደ ኢየሩሳሌም ይገባ ነበር፡፡

በዚህ ቀን ግን የአይሁድ ንጉሥ ሆኖ በክብር ገባ፡፡ ከቢታንያ ተነሥቶ ደብረ ዘይት ሲደርስ ከሐዋርያቱ ሁለቱን በቤተፋጌ ሰው ተቀምጦባት የማያውቅ ውርንጭላ እንዲያመጡለት ላካቸው፡፡ “በፊታችሁ ወዳለችው መንደር ሒዱ በዚያን ጊዜም የታሰረችን አህያ ውርንጫም ከእርሷ ጋር ታገኛላችሁ፤ ፈትታችሁም አምጡልኝ፡፡ ማንም አንዳች ቢላችሁ ለጌታ ያስፈልጉታል በሉ" አላቸው፡፡ ማቴ.21፡1-17 ወደ ቤተፋጌም ሄደው አህያዪቱን አገኙአት፡፡ ሲፈቱአትም ሳለ ባለቤቶቹ መጡባቸውና አስቆሟቸው፡፡ እነርሱም ኢየሱስ እንደፈለጋት ነገሩአቸው፡፡ ባለቤቶቹ ይህንን ሲያውቁ ተዋቸው፡፡ ሐዋርያትም የአህያዪቱን ውርንጭላ ፈትተው ወደ ኢየሱስ ወሰዱ፡፡ አጠገቡም ሲደርሱ ልብሳቸውን በአህያዪቱ ውርንጭላ ላይ አንጥፈው ኢየሱስን አስቀመጡት፡፡

ለምን ዘንባባ ያዙ ቢባል፡-
ዘንባባ እሾሃም ነው ፤አንተም የኃይል የድል ምልክት አለህ ሲሉ፤በሌላም በኩል ዘንባባ እሳት ለብልቦ ይተወዋል እንጂ አይበላውም አንተም ባህርይህ አይመረመርም ሲሉ፤አንድም ዘንባባ ረጅም /ልዑል/ ነው አንተም ባሕርይህ ልዑል ነው ሲሉ ዘንባባ ይዘው ተቀብለውታል፡፡

የተምር ዛፍ ዝንጣፊ ነው ቢሉ፡-
ተምር ፍሬው አንድ ነው አንተም ባህርይህ አንድ ነው
ሲሉ፡፡አንድም፤ተምር ልዑል/ረጅም/ ነው አነተም ልዑለ ባህርይ ነህ ሲሉ፡፡ አንድም፤የተምር ፍሬው በእሾህ የተከበበ ነው በቀላሉ መለቀም አይቻልም ፤ የአንተም ምስጢር አነተ ካልገለጠከው አይመረመርም ሲሉ ነው፡፡

የወይራ ዛፍ ዝንጣፊ ነው ቢሉ፡-
ወይራ ጽኑዕ/ ጠንካራ/ ነው አንተም ጽኑዓ ባህርይ ነህ ሲሉ፤አንድም ወይራ ለመስዋዕት ይሆናል፤ አንተም መስዋዕት ትሆናለህ ሲሉ፤አንድም ወይራ ዘይቱ ለመብራት ይሆናል አንተም የዓለም ብርሃን ነህ ሲሉ ይህንን ይዘው አያመሰገኑ ተቀበሉት፡፡

ልብሳቸውንም ማንጠፋቸው፡-
እንኳን አንተ የተቀመጥክባት አህያ እንኳን መሬት መርገጥ አይገባትም ሲሉ ልብሳቸውን አነጠፉለት፡፡ እነዚያ ያላመኑ አይሁድ ለተቀመጠባት አህያ ይህንን ያህል ክብር ከሰጡ፤ በድንግልና ጸንሳ ለወለደችው እመቤታችን ቅድስት ድንግል ማርያም ምን ያህል ክብር ልናድረግለት ይገባን ይሆን?፡፡

የዕለተ ሰንበት መዝሙር (ከጾመ ድጓ)
ወእንዘ ሰሙን በዓለ ፋሲካ ቀርቡ አርዳኢሁ ለአምላከ ጽድቅ ኀበ ደብረ ዘይት ሙራደ ዓቀብ ሀገረ እግዚአብሔር ወተቀበልዎ ሕዝብ ብዙኃን አዕሩግ ወሕፃናት ነሢኦሙ አዕፁቀ በቀልት እንዘ ይብሉ ሆሣዕና በአርያም ተፅዒኖ ዲበ ዕዋል ቦአ ሀገረ ኢየሩሳሌም በትፍሥሕት ወበሐሴት ይሁቦሙ ኃይለ ወሥልጣነ፡፡…..
ትርጉም: “በፋሲካ በዓል ሰሞን የእውነት አምላክ ደቀ መዛሙርት ወደ ደብረ ዘይት ቀረቡ፤ በሀገረ እግዚአብሔር (ኢየሩሳሌም) አቀበቱ ላይ ብዙ አረጋውያንና ሕፃናት የዘንባባ ቅጠል ይዘው ሆሣዕና በአርያም እያሉ ተቀበሉት፣ በአህያ ውርንጫ ላይ ተጭኖ በፍጹም ደስታ ወደ ኢየሩሳሌም ገባ። ለእነዚህ ኃይልና ሥልጣንን ይሰጣቸዋል።

መልዕክታት
ዕብ.8÷1-ፍጻ. ከተናገርነውም ዋናው ነገር ይህ ነው፤ በሰማያት በግርማው ዙፋን ቀኝ የተቀመጠ እንዲህ ያለ ሊቀ ካህናት አለን፡፡ እርሱም የመቅደስና የእውነተኛይቱ ድንኳን አገልጋይ ነው፤ እርስዋም በሰው ሳይሆን በእግዚአብሔር የተተከለች ናት፡፡ (ተጨማሪ ያንብቡ)

1ኛ ጴጥ.1÷13 ስለዚህ የልቡናችሁን ወገብ ታጥቃችሁና ነቅታችሁ ኑሩ፤ ኢየሱስ ክርስቶስም ሲገለጥ የምታገኙትን ጸጋ ፈጽማችሁ ተስፋ አድርጉ፡፡ (ተጨማሪ ያንብቡ)

ግብረ ሐዋርያት
የሐዋ.8÷26-ፍጻ. የእግዚአብሔር መልአክም ፊልጶስን ተናገረው፤ እንዲህም አለው÷ “በቀትር ጊዜ ተነሣና በደቡብ በኩል ከኢየሩሳሌም ወደ ጋዛ በሚያወርደው በምድረ በዳው መንገድ ሂድ፡፡” ተነሥቶም ሄደ፡፡” እሆም÷ (ተጨማሪ ያንብቡ)

ምስባክ
"ንፍሑ ቀርነ በዕለት ሠርቅ፡፡ በእምርት ዕለት በዓልነ፡፡ እስመ ሥርዓቱ ለእስራኤል ውእቱ" መዝ.80÷3
ትርጉም፦ በመባቻ ቀን በታወቀችው በዓላችን ቀን መለከትን ንፉ፤ ለእስራኤል ሥርዐቱ ነውና÷ የያዕቆብም አምላክ ፍርድ ነውና፡፡
ወይም
"እምአፈ ደቂቅ ወሕፃናት አስተዳሎከ ስብሓተ፡፡ በእንተ ጸላዒ፡፡ ከመ ትንሥቶ ለጸላዒ ወለገፋዒ፡፡" መዝ.80÷2
ትርጉም፦ ከሕፃናትና ከሚጠቡ ልጆች አፍ ምስጋናን አዘጋጀህ፡፡ ስለ ጠላት÷ ጠላትንና ግፈኛን ታጠፋው ዘንድ፡፡

ወንጌል
ዮሐ.12÷1-11 ፋሲካ ከሚውልበት ከስድስተኛው ቀን አስቀድሞ ጌታችን ኢየሱስ ከሙታን ያስነሣው አልዓዛር ወደ ነበረበት ወደ ቢታንያ መጣ፡፡ (ተጨማሪ ያንብቡ)

ቅዳሴ ፡- ቅዳሴ ዘጎርጎርዮስ፡፡

ምንጭ፦
ቤተ ቅዱስ ዮሐንስ አፈወርቅ