group-telegram.com/hussein_hider/398
Last Update:
سامحني..ودعتك من ظهر الناگه
ودعني..والمثلك موسهل فراگه
يحسين الاصعب هاي
ذباحك يمشي وياي
سامحني
...................
بزغ فجر السبي..بضعن روح النبي
طلعت ابطولي والعين عليه
شلع گلبي الهزل..وشبگ چفي الحبل
وسبيه تنچتف بيد سبيه
ابشرك للعظم چان الحبل نازل
المتن خزّن دمه من الضرب مايل
سبي وبس رحمة الله چانت وياي
لارايه ولامحمل ولاكافل
شلت ايدي..وودعتك يانور عيوني
شلت ايدي..ردت انزل بس ماخلوني
صحت ودمعي بعيناي
ذباحك يمشي وياي
...................
ردت انزل الك..واجيك واوصلك
واودعك گبل ليصير رحيلي
امن اروح اعله الجسد..على الناگه بعد
شيركبني وعلى الگاع كفيلي
الگمر عباس الله يرحم احساسه
اسم زينب تشوفه حتى بنفاسه
اجه واحد وشايل بيده عامود
ويگلي بهذا اخييچ فجرت راسه
عباسي..من فدوه الطوله ولحروفه
عباسي..اركض واتعثر بچفوفه
ياماي ويم الماي
ذباحك يمشي وياي
سامحني
.....................
شخص يضرب مره..انتبهت الخنصره
اصد وخاتمك چان بصبعه
تگربت اسئله..شنو اشجابك اله
وگف گدامي يضحك واسمعه
طلّع خنجره وبي دمك الگيته
گلي وكون ماگلي تمنيته
المحبس ردت اشلعه امن اصبع حسين
امن اصبعه ماطلع وبچفي گصيته
يعيوني..يحرگ گلبي وگلب ايتامي
يعيوني..ويفر بالمحبس گدامي
ويبن الزهره بممشاي
ذباحك يمشي وياي
سامحني
.....................
اختصاراً للحچي..شبعت امن البچي
سمعوني الكلام المينگال
من چفوف الخدر ..الى چف الشمر
اخت عباس تنگاد بلحبال
الخيل التمشي بيهن ريحة عظامك
ومثل طشت السبحه طشوا ايتامك
يحسين السبي ماذيني يحسين
شگلت يبن امي من ضربوني گدامك
مسبيه..زينب ماواحد ناداني
مسبيه..والشايل راسك اذاني
ايهوس بالراس هواي
ذباحك يمشي وياي
سامحني
.....................
اطلعت كلي الم..من ارماد الخيم
توجهنه بوضع كون تشوفه
بده السب والشتم..وبده صياح الزلم
الشمر خويه ثگيله چفوفه
كلسا جيبوا زينب ردوا زينب صاح
وكلسا من ضعنّه طفل ضاع وطاح
امن اصيحن ياحسين الحگ يعباس
اشوف الروس توگع من الرماح
ياروحي..ضيم المر بزينب قاسي
ياروحي..راسك ظل ايفيي الراسي
لكن تصعب بلواي
ذبّاحك يمشي وياي
سامحني
.....................
الشاعر
حسين حيدر الكربلائي
كربلاء المقدسة2022/8/11
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/398