Елена Рыбакина рейтингте тағы құлдырады

Қазақстанның бірінші ракеткасы саналатын Елена Рыбакина WTA рейтингінде тағы да төмендеді. Майамиде өткен WTA 1000 турнирінің бірінші айналымында жеңіліп қалған отандасымыз тізімнің оныншы сатысына бір-ақ түсті. Бұған дейін ол сегізінші тұрған.

Алдымен Рыбакинаның алдына қытайлық Циньвэнь Чжен шыққан еді. Ал күні кеше Майами турнирінде испан қызы Паула Бадоса норвегиялық Клара Таусонды жеңіп, тоғызыншы орынға көтерілді.

Десе де, қазақстандық теннисшіні үздік ондықтан жақын арада ешкім ығыстырып шығара алмайды.

Айта кетейік, жыл басталғалы бері Елена Рыбакина бірде-бір турнирдің финалына жете алмай келеді. Тіпті, былтыр да ол денсаулығына байланысты жарытып өнер көрсете алған жоқ.

Кәсіпқой бокс: Махмұд Сабырханға жаңа қарсылас іздеп жатыр

5 сәуірде Астанада өтетін кәсіпқой бокс кешінде жұдырықтасатын Махмұд Сабырханға ұйымдастырушылар жаңа қарсылас іздеп жатыр. Бұл туралы sportbugin.kz сайты жазды.

Бұған дейін Махмұд Сабырхан филиппиндік Джэй Фрэнсис Бураймен (13-3-1, 3 КО) жекпе-жек өткізетіні хабарланған болатын. Алайда, Бурайдың Астанаға келмейтіні анықталып отыр.

Осылайша, бокс кешіне небәрі 10 күндей уақыт қалғанда Махмұд Сабырханның қарсыласы жоқ. Бұл – оның кәсіпқой бокстағы дебюті екенін де айта кету керек.

Кәсіпқой бокс кешін ұйымдастырып отырған Nomad Promoutions компаниясы Балауса Мұздыманға да уәде еткен америкалық боксшыны әкеліп бере алмады. Қазақтың боксшы қызы мансабында алғаш рет азулы қарсылас – Розалинда Родригеспен (14-0, 3 КО) күш сынасуы тиіс еді. Алайда, жнкүйерлер бұл жекпе-жекті көре алмайды. Оның орнына Балауса филиппиндік Мария Тереза Пинилимен жұдырықтасады.

1 млрд доллар: ФИФА жаңа турнирдің жүлде қорын жариялады

ФИФА 2025 жылы алғаш рет өтетін Клубтық әлем чемпионатының жүлде қорын жариялады.

Турнир жеңімпазының 125 миллион доллар табыс табуға мүмкіндігі бар, бұл шамамен 63 миллиард теңгеге тең.

Жарыстың жалпы жүлде қоры – 1 миллиард доллар.
32 командаға бөлінетін жалпы жүлде қоры – 1 миллиард доллар.
525 миллион доллар клубтарға тек қатысқаны үшін беріледі:
- Еуропа өкілдері – 12,81 миллионнан 38,19 миллион долларға дейін (рейтингіне байланысты)
- Оңтүстік Америка өкілдері – 15,21 миллион доллар
- Азия, Африка және КОНКАКАФ аймағы – 9,55 миллион доллар
- Мұхит аймағы – 3,58 миллион доллар.
Қалған 475 миллион доллар нәтижелер бойынша бөлінеді:
• 2 миллион доллар – топтық кезеңдегі әр жеңіс үшін
• 1 миллион доллар – топтық кезеңдегі әр тең ойын үшін
• 7,5 миллион доллар – 1/8 финалға шыққаны үшін
• 13,125 миллион доллар – 1/4 финалға шыққаны үшін
• 21 миллион доллар – жартылай финалға шыққаны үшін
• 30 миллион доллар – финалға шыққаны үшін
• 40 миллион доллар – турнир жеңімпазы үшін

Осылайша, чемпион бір айда 150 миллион долларға дейін табыс таба алады, бұл Чемпиондар лигасындағы тоғыз айлық табыстан да көп.

Қазақстан алтынсыз қалған Азия чемпионатында өзбектер жоғары нәтижеге қол жеткізді

Грек-рим күресінен Өзбекстан құрамасына өткен жылдың қазан айында бас бапкер болып тағайындалған Рустам Ассакаловтың шәкірттері Азия чемпионатында табысты өнер көрсетті. Париж Олимпиадасынан кейін спорттық мансабын аяқтаған спортшы бапкер ретінде де құрлық біріншілігінде жоғары нәтижеге қол жеткізді.

Иорданияда өтіп жатқан Азия чемпионатында Өзбекстанның грек-рим құрамасы 3 алтын, 2 күміс, 1 қола медальға қол жеткізіп, жалпыкомандалық есепте Ираннан кейінгі екінші орынға тұрақтады.

Грек-рим күресінен Өзбекстан ұлттық құрамасының бас бапкері Рустам Ассакалов осыған дейін халықаралық ареналарда ел намысын абыроймен қорғап келген тәжірибелі спортшы ретінде танымал. Жаңа міндетті қолға алған Ассакаловқа өзбек балуандарын 2026 жылы Аичи-Нагояда өтетін Азия ойындарына және 2028 жылы Лос-Анджелесте өтетін жазғы Олимпиадаға дайындау жүктелген.

Айта кететін жайт, Рустам Ассакалов үш Олимпиададаға қатысты. Ол спорттық жолында 2012 жылдан бастап Өзбекстан атынан күрескен. Легионер балуан әлем чемпионаттарында 1 күміс, 1 қола жүлде иеленсе, Азия Ойындарынан 1 алтын, 1 күміс, 1 қола жүлдеге қол жеткізді. Сондай-ақ, құрлық чемпионаттарында 3 алтын, 1 күміс, 2 қола медаль жеңіп алған.