💫Тохсунньу 19 күнэ

♈️Хой

Кэнники кэмҥэ настырыанньаҥ, дьэ, көтөҕүллэн, дьону кытта алтыһыах баҕаҥ батарбат. Ол эрээри, дьон ол туруккар сөп түбэһимиэн сөп. Онон эниэргийэҕин суолталаах дьыалаҕа аныырыҥ ордук.

♉️Оҕус

Үлэ күнэ буолбатах, дууһаҕа - бырааһынньык. Өрөбүллэргин үчүгэйдик былааннаабыккын. Туохтан да матыма, санаабыккын оҥор, дуоһуй.

♊️Игирэлэр

Нэдиэлэ устата мунньуллубут түбүккүн бүтэрэ иликкин. Ол иһин көргө-нарга кыттыһыаххын баҕарбаккын, ол эрээри чугас дьонуҥ иннигин ылыахтара. Баттыыр санааны киэр кыйдаа, доруобуйаҕын харыстаа.

♋️Рак

Суорҕанын иһиттэн тахсыаххын баҕарбатаргын да, тураргар тиийэҕин. Күнү быһа киэһэтин бэйэҥ бэйэҕэр хааларгын баҕа санаа оҥостуоҥ. Саҥа үлэ нэдиэлэтигэр оҥороруҥ үгүс. Ол олус сэргэхситэр.

♌️Хахай

Тыын да ылбат күүрээннээх күн. Холкутаан, уоскуйан үлэлиэххин наада. Оччотугар эйигин кыйахыыр, суолтан туоратар туһунан ким да өйүгэр киириэ суоҕа. Балаһыанньаттан кыайыылаах тахсыаҥ.

♍️Кыыс

Дьоллоох күнүҥ үүммүт. Эрдэтээҥи үлэҥ, түбүгүҥ иһин дьоһун наҕарааданы тутуоҥ, дьон да сыанабылын ылыаҥ. Бары эн тула көтөллөр, болҕомто киинэ оҥороллор.

♎️Ыйааһын

Артыыстыыры сатыыр буолаҥҥын, дьон эйигин мэлдьи дьоллоох диэн көрөр. Дьиҥэр, эн даҕаны тургутуулары көрсөҕүн буоллаҕа. Бүгүҥҥү күнүҥ табыллыа. Бытархайга болҕомтоҕун уурума.

♏️Скорпион

Күнүҥ улахан аҥаарын үлэҕэ атаарыаҥ. Ол эрээри, сынньанары умнума. Үтүөлээх үлэһит аатын ыларыҥ ыраах. Оттон доруобуйа – биир.

♐️Охчут

Дьыаланы кэлин көһөрөн баран, умнан кэбиһэр идэлээххин. Хаһан эмит ол ситтэриэ суоҕа, онон кыралаан көөрөтө сылдьарыҥ ордук. Атыттарга тэҥнээтэххэ, сынньалаҥ эйиэхэ чэпчэкитэ суох тиксэр.

♑️Чубуку

Күүс, сэниэ бөҕөҕүн. Атыттардааҕар кыһамньылааххын. Онон күлүккэ хаалыаҥ суоҕа. Иллэҥ кэмҥэр тугунан дьарыктанаргын искэр толкуйдуу сырыт.

♒️Күрүлгэн

Сылайбытыҥ, илистибитиҥ бэрт. Аһара кичэйимэ, судургутук сырыт. Үлэҕин бүтэрэ охсон, сынньан.

♓️Балыктар

Сылдьыбыт суолгунан сылдьа сатаама. Күн ахсын биирдик салаллар күҥҥүн-дьылгын уларытар кыахтааххын. Саҥаҕа ылсартан куттаныма. Онтон ылар санааҕыттан толору дьоллонуоҥ.

📆Тохсунньу 19 күнэ. Өрөбүл күн

🥶Бэҕэһээ тымныы күн буолла. Сорох нэһилиэктэргэ 49 кыраадыс тымныы буолбут дэһэллэр. Инньэ гынан улуус оскуолаларын алын уонна орто кылаастарын оҕолоро үөрэммэтэхтэрэ.

🌥Бүгүн сарсыарда 6 чааска Бороҕоҥҥо 41 кыраадыс тымныы буолбут. Күнүс 35-37 кыраадыс тымныы буолара күүтүллэр. Соҕуруулуу илинтэн сөкүүндэҕэ 1 м түргэннээхтик үрэр тыаллаах былыттаах күн.

Кириһиэнньэ күнэ үүннэ. Сүллүкүүттэр киирдэхтэрэ, таҥхалааһын бүттэ. Ону кытта тымныы тыыннарын илдьэ бардылар ини? Илинтэн тыал былыты аҕалара буолуо.

✍️Афанасий Сектяев

📸Александра Охлопкова. Мүрү

✅@murusahargata @ulusmedise