group-telegram.com/RwayatSudan/42557
Last Update:
#ثمن_الإختيار❤️
حلقة1
"أنا فرصة ما هتقابلها تاني في حياتك ودا غرور عادي..!))
في غُرفة مظلمة والوانا مطفية كان صوت المنبه بِرن
اول ما صحت من النوم فتحت الواتسب ختت الإستوري أعلاه وشغلت أغنية ورمت التلفون دخلت تاخد دُش صاحية مُتأخرة كالعادة وبتدندن في الحمام مع الأغنية عدت رُبع ساعة وطلعت بتتراقص وتنشف شعرها وهي متلحفة بالبشكير شغلت أُغنية حماقي وبقت تردد معاها بأعلى صوت :
" بالطريقة شد ألبي بالطريقة
دوبت فيه سلمت من اول دقيقه "
صحبتا دخلت عليها وهي بتنده ..!
يا ننو يا بت يا نينا أوووف صدعتي بي "وهي بتقفل الأغنية"
إتلفتت عليها وهي مخلوعة بسم الله إنتِ جيتي متين ومش مفروض تدقي الباب أفرضي أنا ماخدة راحتي؟
ملك: من اول مقطع وبعدين ما إنتِ لو بتسمعي كان حسيتي عليّ وعلى أساس يوم ما كُنتِ ماخدة راحتك ودي أغاني شنو البتسمعيها دي .. مُش المفروض تسمعي إتنسيت أو قوي قلبك على الفراق؟
أنهار: فُراق شنو الـ أقوي قلبي عليه وبعدين ما أنا الـ بتنسي.
ملك: أنا ما قادرة أفهم إنتِ كيف تنفصلي وإنتِ عارفة الطرف التاني لسه بِحبك وعايزك؟
أنهار: لو أنا ما عملت كدا كان جات منو هو.
ملك: كلنا عارفين عمرو بحبك قدر شنو وإنتِ كمان بتحبي.
أنهار: كُنت بحبو بس بطلت.
ملك: بين يوم وليلة؟ أنهار إنتِ حتى ما زعلتي عليه؟ إنتوا إنفصلتوا أمس بعد الساعة 12 بعد إرتباط دام سنتين أنا إفتكرت ح أجي على الأقل ألقاك زعلانة أو شبه متضايقة.
أنهار: كلامك دا ما زهجتي منو؟ من إحنا في الجامعة بتقولي كدا.
ملك: قصدك من تانيه ثانوي نفس الحوار..!
أنهار: متضايقه مالك حصل إرتبطت مع أخوك أو صحبك؟
ملك: يا أنهار الحاجة دي ما في صالحك .. أسي خلينا من دا فطوركم بشنو؟
أنهار: ما عارفه بس ما أظن في زول في البيت أصلًا .. تحبي نطلب إيه؟
ملك: أطلعي لي من دور البرجوازين دا وأرح نشوف مطبخكم فيهو شنو.
دخلوا المطبخ فتشوا التلاجة وطلعوا أكل سخنوه وأكلوا وفِضلوا يتونسوا مع بعض لحدي ما ملك عاينت لـ الساعة ونطت ..!
ملك: وبعلي عزو قال لي ما تتأخري الليله بيقتلني.
أنهار: ياخ أنا عايزة يكون عندي أخو.
ملك: كذابة بكرة أخوك ود أبوك يجي ويتحكم فيك وقتها ببقى ليك بمبي.
أنهار: قفلي خلاص.
ملك: طيب سوري ما قصدي أجيب ليك السيرة دي..!
ملك طلعت ومشت بيتهم ..أنهار رجعت غرفتها مسكت تلفونها كانت ح تتصل ليهو زي كُل مرة بس إتذكرت إنهم إنفصلوا وهو ما حاول يكلما فما حترسل ليهو.
قفلت الداتا وقعدت وهي حاسه بفراغ وزهجانة .. فتحت دولابها وجربت كُل الفستانين الـ عندها وإتصورت بس لسه زهجا ما راح ..!
رُغم إنا متعودة على موضوع الإنفصال بس دا ما يمنع إنو عمرو كان ليهو دور مهم في حياتا ..!
____
"عند ملك"
رجعت البيت طول الطريق بفكر في أنهار اللي أسهل حاجة عندها ترتبط وتنفصل رغم إنو حياتنا مختلفة في أي شي بس ما حصل إتمنيت حاجة عندها غير ألقى شخص يحبني زي حُب عمرو ليها ♡
رغم إنها ما مُقدرة الحاجة دي بس ح تندم عليها.
وصلت البيت وفرحت لما ما لقيت عزو سلمت على أمي وإشتغلت الشغل الراجيني وحضرت الغداء أخواني أكلوا وأمي أبت مُصرة تنتظر عزو كُل شوية تقول لي إتصلي ليهو مع إنو عادي بيتأخر بس هي كانت مُقلقة عليه شديد.
إتصلت عليهو ما رد طوالي نمت صحيت ما عارفة الساعة كانت كم بس الليل جاء رفعت راسي بفتش في أمي شايفاها جمب الباب عايزة أمشي عليها سمعت صوت تلفون إتوقعتو عزو بس إتخلعت لما لقيتو هشام ولد عمتي هشام ما بيتصل لي إلا لو في حاجة رديت ليهو وما جا في بالي غير عزو.
ملك: اا الو
هشام: عارف مكالمتي في زمن متأخر بس عزو دا عمل حادث النهار و....
ملك"بإنفعال": شنو عزو مالو؟
هشام: براحة أهدي عشان خالتي ما تتخلع وأنا أسي جاي عليكم.
بعد قفل لقيت أمي واقفة في راسي بتسأل بخوف وأنا ما قادرة أنطق حرف حاولت أفهما ما قِدرتَ.
سمعنا صوت العربية والباب خبط فتحتو من غير ما أنتبه أنا لابسة كيف وفعلًا كان هشام قبل ما أسألو أمي مسكتو وبقت تبكي هو بحاول يهدي فينا إنو ما حصل ليه حاجة...!
في أقل من ربع ساعة لبسنا وصلنا المستشفى دخلنا ليهو كان رجلو مكسورة وعندو ضربة في راسو لما شفناه شويه إطمنا .. أمي قعدت معاه وأنا طلعت برا كُنت حاسة راسي ح يطق من الصداع.
هشام: ملك مالك؟ كويسة إنتِ؟
ملك: مُصدعة بس.
هشام: من الخلعة بس ويلا عشان أرجعكم.
ملك: ح يقعد معاهو منو؟
هشام: ما مالي عينك ولا حاجة؟
ملك: لا والله ما قصدي بس..!
هشام: كُلها يومين بس لما يطلع ح يقعد في وشكم أكتر من إسبوعين عشان الجبص.
ملك: هو حصل ليهو شنو؟
هشام: والله أنا ذاتي ما عارف بس خليتو راجع البيت محمد قال لمن نزلوا قبل ما يمشي بعيد شايف عربية ضربتو وجابو هنا وإتصل لي الحمدلله جات سليمة.
ملك: والله قلبي وقف ما لينا غيرو لو حصلت ليهو حاجة ..!
هشام: ما بيحصل شي ويلا كلمي خالتي وأرح.
BY رِوايات سُودانية🪐🤎!)"
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/RwayatSudan/42557