group-telegram.com/eltuz2022/32114
Last Update:
НАМАНГАН ВИЛОЯТИ ИЧКИ ИШЛАР ТИЗИМИДА ҚАНДАЙ МУАММОЛАР БОР?
Элтузга Наманган вилояти ИИБда фаолият юритаётган мутахассиснинг тизим нуқсонлари ҳақида таҳлилий мурожаати келиб тушди. ИББнинг турли бўлимларида жиддий муаммолар мавжуд, масалан:
Йўл ҳаракати хавфсизлиги хизматига соҳани тушунмайдиган ходимлар жалб этилгани сабабли, йўл-транспорт ҳодисалари кескин кўпайган.
Ҳодимлар лавозимларга шахсий алоқаларига кўра тайинланмоқда. Йўлларда тирбандлик муаммолари кучайган, бу эса шаҳар аҳолисига катта ноқулайлик туғдирмоқда.
Жамоат хавфсизлиги ва профилактика хизматида кадрлар алмашинуви юқори. Ҳодимлар жуда кўп вазифалар билан шуғулланишга мажбур. Ҳақиқий профилактика ишларига вақт қолмаяпти.
Инспекторларнинг иш вақти тартибга солинмаган. Кадрларни тайинлашда уларнинг шахсий қобилияти ва малакаси эътиборга олинмайди. Натижада лавозимлар самарасиз бўлиб қолмоқда. Давлатобод туманида ташкил этилган "Штрафобод" ички ишлар тизимида "жазо маскани" сифатида танилган. Бу ерга кўчирилган ходимлар шарт-шароитсиз ва узлуксиз ишлашга мажбур бўлишади. Раҳбариятнинг ўзбошимча буйруқлари туфайли ходимлар қийин аҳволга тушишмоқда.
Тезкор хизмат ички ишлар тизимининг юраги, лекин оператив хизмат раҳбарлари кўпинча ўз вазифаларига масъулиятсиз ташаббуссиз муносабатда бўлмоқда. Бу бўлимда ҳам "землякчилик" ва шахсий алоқалар асосида кадрлар тайинланяпти.
Уюшган жиноятчиликка қарши курашиш бўлимида ходимлар “буюртмага асосланган аризалар"ни кўриб чиқишга мажбур бўлишмоқда, бу эса ҳуқуқ-тартиботни таъминлашга жиддий таъсир қиляпти.
Тергов йўналишида терговчилар кўпинча мустақил фаолият юрита олмайди ва юқори раҳбариятнинг буйруқларига қарам бўлиб қолишган. Буюртма асосида ишларни юритиш амалиёти оддий ҳолга айланган. Бу тергов жараёнида адолатни таъминлашга салбий таъсир кўрсатмоқда. Тергов жараёнида шахсий алоқаларнинг таъсири жуда юқори. Ҳатто терговчилар қонуний асосда иш юритган тақдирда ҳам, юқори раҳбарият уларни жазога тортиши мумкин.
Коррупцияга қарши кураш йўналишининг ўзи коррупцияга ботган.
Наркоманияга қарши кураш бўлими фаолияти мутлақо қониқарсиз. Вилоятда наркотик айланмаси юқори даражада, ёшлар истаганча наркотик ва психонтроп дориларни сотиб олиши мумкин.
Киберхавфсизлик йўналиши билимсиз ходимлар билан тўлган. Фуқароларнинг пластик карталаридан пул ўғирлаш ҳолатлари ортиб боряпти, онлайн фирибгарликка нисбатан тезкор чора кўрилмайди.
Шу сабабдан фуқароларнинг ҳуқуқ-тартибот идораларига бўлган ишончи пасайтирмоқда. Тизим ичидаги фитна, коррупция ва нотўғри раҳбарият ички ишлар ходимларини ҳимоясиз қолдиряпти. Ички ишлар ходимлари раҳбарият томонидан ҳимояланмайди. Тизимда меҳнат қонунчилигига риоя қилинмаяпти. Улар соатлаб ишласа-да, моддий рағбатлантириш етарли эмас. Ҳозир Наманган вилояти ички ишлар тизими жиддий ислоҳотларга муҳтож.
Элтуз тайёрлаган видеолавҳа билан танишинг.