group-telegram.com/hussein_hider/403
Last Update:
الزچيه الشفعت عند الباري الحوّاء وآدم
عجيبه وفوگ العين انسطرت يااهل العالم
العفيفه..المعظّم قدرها
الخليفه..عصرها وسطرها
الخليفه
............................
العظيمه ..الكريمه.. السماء واهلها تجلها تره
چبيره..اميره..وسر الله الاعظم هيَ الطاهره
وَعلى معرفت فاطمه الزهره وفضلها
يعالم دارت القرون الاولى واهلها
الزچيه يستظل كل نبي ومرسل بظلها
اسم الزهره نقش
منحوت اعله العرش
لازم ماتنخدش
مولاتي
زهراء
السماء السبعه واعلى واعلى الزهراء انرفعت
واليغضِب الله اليغضِبها اندفعت وانصفعت
الشريفه..الوجود بأمرها
الخليفه..عصرها وسطرها
الخليفه
............................
عقيده..اكيده..الزچيه من الله تره مكرمه
محمد..تجسد..وعلي ماتجسد بلا فاطمه
حديث القدسي مروي قالَ رب البريه
محمد وَ علي ماصاروا لولا الزچيه
نعم ذُريه بعضها من بعضٍ سويه
انخلقت ارض وسمه
والكون وعالمه
لعيونچ فاطمه
مولاتي
زهراء
القيامه وجنه ونار وبرزخ والكون بأسره
الاهك چن خاتم خلاهن بچفوف الزهره
مخيفه..وعجيبه شكبرها
الخليفه..عصرها وسطرها
الخليفه
............................
امينه..حنينه..نعم هيه جنه لچن عالارض
بلفضها..وفرضها..تصلي الملائك وراها الفرض
جميع اسراره الله بفاطمه الزهره حطها
(هذا ملك الزچيه) لوحه بالجنه خطها
عجيبه السر الاعظم تالي تناثر قرطها
فاطم ليلة قدر
والكوثر والحشر
اتكسر منها الصدر
مولاتي
زهراء
عجيبه شگد وصاهم الله وطه بذو القربه
وحرگوا باب الزهره وحيدر بي حرگوا گلبه
ضعيفه..وصغيره بعمرها
الخليفه..عصرها وسطرها
الخليفه
............................
تلثم..وتقدم..برجله دفعها وضلعها انهشم
توزر..وتصور..گالوله فاطم هُنا وابتسَم
يعالم وال وإن رجت الارض وسماها
الكواكب والنجم يتلاطمن من حچاها
الزچيه طاحت وطاحت الدنيا وراها
صاحت آه يازمن
آنه منَ بنتُ مَن
وضلوعي تكسرن
مولاتي
زهراء
ايقدس باب الزهره محمد وشگد ايجله
ايدگهه بچفه ووسفه الثاني يدفعها برجله
السقيفه..اللي هتكت خدرها
الخليفه..عصرها وسطرها
الخليفه
............................
بحزنها..لچنها..خفت عن عليها هذاك الكسر
ابچيها..يجيها..بالحجاب وتستر مكان السطر
لحدما ماتت وشاف اثر چف الصفعها
لحدما ماتت ومر چفه بكسرة ضلعها
لحدما ماتت وماشافت عينه دمعها
اتبيين وجه السمح
خافت لاينجرح
وكل لحظه تنذبح
مولاتي
زهراء
ماتت فاطم لكن حيدر هم مات اعليها
ماتت ام ايام الحلوه الروحه ايسميها
وحليفه..العلي بس گبرها
الخليفه..عصرها وسطرها
الخليفه
............................
الشاعر
حسين حيدر الكربلائي
كربلاء المقدسة2022/12/8
BY الشاعر حسين حيدر الكربلائي
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/hussein_hider/403