🇦🇿🇮🇷Իլհամ Ալիև-Ալի Աքբար Ահմադիան հանդիպմանը, դատելով երկու կողմերի տարածած հաղորդագրություններից, քննարկվել են նախկինում ունեցած համատեղ նախագծերի, համաձայնագրերի իրագործմանն առնչվող հարցեր, մասնավորապես՝

📍Հյուսիս-Հարավ միջանցքի, այդ ուղղությամբ Իրան-Ադրբեջան-ՌԴ համագործակցության զարգացում,

📍«Արասի» միջանցքի ենթակառուցվածքների կառուցում,

📍Արաքս գետի վրա ՀԷԿ-երի կառուցում,

📍Իրան-Ադրբեջան-ՌԴ էլեկտրահաղորդման գծերի սինխրոնացում։

❗Տարածաշրջանային իրադրության առնչությամբ Ալիևը հայտարարել է, որ տարածաշրջանի հարցերը պետք է լուծվեն տարածաշրջանի երկրների կողմից՝ առանց արտաքին միջամտության։

📍Երկուստեք հնչել են երկկողմ հարաբերությունները դրվատող խոսքեր։ Ըստ ադրբեջանական կողմի՝ Ահմադիանը նաև շնորհավորել է «Ադրբեջանի տարածքային ամբողջականության վերականգնման» կապակցությամբ։

🔍Այլ՝ ավելի հետաքրքիր մանրամասներ առայժմ չկան։

@IRI2day

🇮🇷🇦🇲Իրանի ազգային անվտանգության գերագույն խորհրդի քարտուղար Ալի Աքբար Ահմադիանը Երևանում վերահաստատել է տարածաշրջանի աշխարհաքաղաքական ցանկացած փոփոխությանը դեմ լինելու Իրանի դիրքորոշումը:

🔸Ահմադիանը նաև Իրանի պատրաստակամությունն է հայտնել աջակցել Հարավային Կովկասի երկրների միջև քաղաքական, անվտանգային, տնտեսական հարաբերությունների զարգացմանը և անհրաժեշտության դեպքում միջնորդել հակասությունների վերացման համար:

@IRI2day

🇮🇷🇷🇺Իրանն ու ՌԴ-ն այսօր «Համապարփակ ռազմավարական համագործակցության մասին 20-ամյա պայմանագիր» են ստորագրելու: Ի՞նչ է սա ենթադրում:

➡️Թեհրանն ու Մոսկվան դեռ 2001թ. 10 տարի ժամկետով «ՌԴ և ԻԻՀ միջև հարաբերությունների հիմունքների և համագործակցության սկզբունքների մասին պայմանագիր» էին ստորագրել: Հետագայում այն ավտոմատ երկարաձգվել է:

➡️2021 թվականին՝ դեռ Հասան Ռոհանիի կառավարության օրոք, ռուսական կողմին առաջարկվել է ընդլայնել և ավելի մեծ ժամկետ սահմանել այդ պայմանագրի համար: Բանակցություններն հիմնականում ընթացել են Էբրահիմ Ռայիսիի կառավարության օրոք՝ նոր թափ ստանալով Ուկրաինայում պատերազմից հետո:

➡️Նախորդ պայմանագիրը բաղկացած էր 21 հոդվածից, նորը՝ 47: Սա լիովին բնական է՝ հաշվի առնելով, որ վերջին տարիներին ՌԴ-ն ու Իրանը ամենատարբեր ոլորտներում զարգացրել են իրենց համագործությունը, և հենց այդ ընդլայնված ոլորտներն էլ, ըստ էության, արտացոլվել են նոր հոդվածներում (օրինակ՝ Իրան ռուսական գազի մատակարարում և փոխադրում, Հյուսիս-Հարավ միջանցքում համագործակցություն և այլն):

➡️Իրան-Չինաստան 25-ամյա համագործակցության փաստաթղթի նման, սա էլ ճանապարհային քարտեզ է լինելու. փաստաթղթում հիշատակված ոլորտներում համագործակցության համար կողմերը դեռ պետք է առանձին բանակցություններ անցկացնեն ու պայմանագրեր կնքեն: Այս առումով փաստաթուղթն ավելի շատ ամրագրում է երկկողմ համագործակցության ընթացիկ մակարդակն ու դրա հետագա խորացման պատրաստակամությունը:

⏺️Հատկանշական է նաև, որ Արևմուտքի հետ միջուկային բանակցությունները վերսկսելու փորձերի ֆոնին՝ իրանական կողմը փորձում է «փարատել» այս փաստաթղթի շուրջ հնարավոր մտահոգությունները. Իրանի արտգործնախարարը հայտարարում է, որ պայմանագրում շեշտը դրված է տնտեսական ոլորտի վրա և այն ռազմական դաշինք չի ենթադրում, նախագահ Փեզեշքիանն էլ հարցազրույց է տալիս ամերիկյան NBC-ին ու ընդգծում, որ Իրանը պատրաստ է բոլոր երկրների հետ, այդ թվում՝ եվրոպական կողմի հետ նման պայմանագրեր կնքել:

@IRI2day

📍Իրանում նախկին նախագահ Էբրահիմ Ռայիսիի ուղղաթիռի վթարի պատճառը կասկածի տակ դնող խոսույթի ակտիվացման ֆոնին Իրանի ԶՈւ ԳՇ-ն նորից հայտարարություն է տարածել՝ վերահաստատելով, որ ուղղաթիռը վթարվել է եղանակային և աշխարհագրական բարդ պայմանների պատճառով:

«Որևէ այլ վարկած, այդ թվում՝ տեխնիկական խափանում, դիվերսիա, ահաբեկչություն, պայթյուն, ռադիոէլեկտրոնային ներգործություն և այլն, չի հաստատվել: Ուստի լրատվամիջոցների ներկայացուցիչներին, ֆիզիկական և իրավաբանական անձանց և խորհրդարանիի հարգելի պատգամավորներին խնդրում ենք զերծ մնալ ոչ պրոֆեսիոնալ, զգացմունքային և ոչ պատասխանատու հայտարարություններ անելուց, որը չի ունենալու այլ արդյունք, քան հասարակական կարծիքը խաթարելը, թշնամիների շահարկումների համար հիմքեր ստեղծելը»,- նշվել է ԶՈւ ԳՇ հայտարարությունում:

🔍ԻԻՀ խորհրդարանի պատգամավորից բացի, օրերս էլ Էբրահիմ Ռայիսիի թիկնապահի եղբայրն էր հայտարարել, որ եղբայրն անհանգստանում էր Ռայիսիի այցի առնչությամբ, «քանի որ Իսրայելն Ադրբեջանում բազա ունի»:

@IRI2day

🇮🇷🇦🇿Թեհրանում անցկացվել է Իրանի ու Ադրբեջանի տնտեսական համագործակցության հարցերով հանձնաժողովի 16-րդ նիստը: Բովանդակային առումով առանձնապես նորություն չկա. հիմնականում քննարկվել են նախկինում եղած համատեղ նախագծերի/պայմանավորվածությունների իրագործմանն առնչվող հարցեր, այդ թվում՝

➡️Իրանի, Ադրբեջանի, ՌԴ էներգահամակարգերի սինխրոնացում:

➡️Հյուսիս-Հարավ միջանցքում համագործակցություն: Այս թեմայով հունվարին 28-ին եռակողմ հանդիպում է լինելու Մոսկվայում:

➡️Նավթի, գազի ոլորտում համագործակցություն: Նախատեսվում է այս ուղղությամբ աշխատանքային խումբ ստեղծել:

➡️Արաքս գետի վրա ամբարտակների, ՀԷԿ-երի կառուցում/համատեղ շահագործում:

➡️Աստարայի երկաթուղային տերմինալի կառուցում: Այս առնչությամբ ստորագրվել է փոխըմբռնման հուշագիր:

Նաև

🔸Հայտարարավել է, որ Աղբանդ-Քալալեհ ավտոմոբիլային կամուրջը կարող է գարնանը շահագործման հանձնվել:

🔸 Ադրբեջանական կողմը պատրաստակամություն է հայտնել մինչև 1000 մգվտ էլեկտրաէներգիա մատակարարել Իրան, որտեղից էլ այն կմատակարարվի Նախիջևան:

🔸Իրանական կողմը ցանկություն է հայտնել առաջիկա 5 տարում երկկողմ առևտրի նշաձող սահմանել 10 մլրդ դոլարը, ինչպես նաև քայլեր ձեռնարկել արտոնյալ պայմաններով առևտրի համար ( 2024-ին Իրան-Ադրբեջան առևտուրը 580 մլն է կազմել):

📌Իրանի ու Ադրբեջանի տնտեսական համագործակցության հարցերով հանձնաժողովի նախորդ նիստի մասին մանրամասն՝ այստեղ:

@IRI2day

🇮🇷🇦🇿Իրանի ԱԳՆ Եվրասիայի վարչության պետը հանդիպել է Թեհրանում Բաքվի դեսպանի հետ և բողոք հայտնել Իրանի ու իրանցիների նկատմամբ «Ադրբեջանի որոշ շրջանակների ու անձանց բացասական գործողությունների և անհարգալից հայտարարությունների» կապակցությամբ:

@IRI2day

🇦🇿🇮🇷Ադրբեջանն Իրանի դեսպանատան գործերի ժամանակավոր հավատարմատարին նորից հրավիրել է ԱԳՆ։

📍Բաքվում դժգոհություն են հայտնել, որ երկու երկրների տնտեսական համագործակցության հարցերով հանձնաժողովի նիստից հետո Թեհրանում Ադրբեջանի դեսպանին հրավիրել են Իրանի ԱԳՆ ու «անհիմն բողոք» հայտնել։

📍Ադրբեջանական կողմը դժգոհել է , որ «ներողության փոխարեն Իրանում հակաադրբեջանական արշավը շարունակվում է»։

@IRI2day

❗️Ղազվինում հոգևոր առաջնորդի ներկայացուցիչ և ուրբաթօրյա աղոթապետ Աբդոլքյարիմ Աբեդինին հրաժարական է տվել: Հրաժարականի պատճառը չի նշվում, բայց մեդիադաշտում կան ենթադրություններ, որ այն պայմանավորված է իրանա-ադրբեջանական լարվածությամբ:

🔺Աբեդինին ավելի վաղ, ի պաշտպանություն Արդաբիլում հոգևոր առաջնորդի ներկայացուցիչ Հասան Ամելիի, քննադատել էր Իլհամ Ալիևին` նրան անվանելով դավաճան, բռնակալ, ԱՄՆ և Իսրայելի վարձկան:

🔺Օրերս ադրբեջանական կողմը, երբ Իրանի դեսպանատան գործերի ժամանակավոր հավատարմատարին հրավիրել էր ԱԳՆ, դժգոհություն էր հայտնել նաև Աբեդինի հայտարարությունների առնչությամբ:

@IRI2day

🇮🇷🇦🇿Հանդիպել են Իրանի նախագահի խորհրդական Մեհդի Սանային և Ադրբեջանի նախագահի օգնական Հիքմեթ Հաջիևը։

Կողմերն ընդգծել են, որ պետք է շարժվեն «որոշ թյուրըմբռնումների» վերացման, բազմոլորտ համագործակցության զարգացման ուղղությամբ։

@IRI2day

🇮🇷🇦🇿Իրանի նախագահ Մասուդ Փեզեշքիանն Ադրբեջանի նախագահի օգնական Հիքմեթ Հաջիևի հետ հանդիպմանն ընդգծել է, որ տարածաշրջանի սահմանների փոփոխությունը որևէ կերպ ընդունելի չէ:

📍Հաջիևին ընդունել է նաև արտաքին հարաբերությունների ռազմավարական խորհրդի նախագահ Քյամալ Խարազին: Նա շեշտել է, որ երկրները պետք է ուշադրություն դարձնեն իրենց հարևանների զգայունություններին և «անհանգստություն հայտնել Ադրբեջանում Իսրայելի ներկայության առնչությամբ»։

📍Արտգործնախարար Աբբաս Արաղչին էլ վերահաստատել է, որ Իրանն աջակցում է բանակցությունների և տարածաշրջանի երկրների հնարավորությունների կիրառմամբ խնդիրների կարգավորմանը՝ առանց արտաքին ուժերի միջամտության:

@IRI2day

🇮🇷🇹🇷Իրանի ճանապարհների և քաղաքաշինության նախարար Ֆարզանե Սադեղը հայտնել է, որ Թուրքիա կատարած իր այցի ընթացքում պայմանավորվածություն է ձեռք բերվել, որ Թուրքիան վերացնում է իրանական բեռնատարներից գանձվող հավելյալ մաքսատուրքերը, իսկ Իրանն իր հերթին թուրքական բեռնատարների համար վերացնում է լիքը բաքի պարտադրանքը:

Խնդրին վերջնական լուծում տալու համար 3 ամսվա ընթացքում կողմերը ձևավորվելու են համատեղ կոմիտե, որտեղ քննարկելու են վառելիքի գնի հաշվարկման և հարակից այլ հարցեր:

@IRI2day

❗️Իրանի հոգևոր առաջնորդ Ալի Խամենեին՝ ԱՄՆ հետ Իրանի բանակցությունների մասին.

«Նման կառավարության հետ չպետք է բանակցել: Դա խելամիտ չէ, պատվաբեր չէ»:

Խամենեին հիշեցրել է, որ Իրանը նախկինում ԱՄՆ հետ բանակցել ու համաձայնություն էր կնքել, որից հենց Թրամփի կառավարությունն է դուրս եկել:

«Դա փորձ է, օգտվենք այդ փորձից: Բանակցեցինք, զիջումներ արեցինք, բայց մեր նախատեսած արդյունքը չստացանք»,- ասել է Խամենեին:

@IRI2day

📌Միջուկային բանակցությունների հարցը կրկին փակուղում է

📍Դեռ ամիսներ առաջ Իրանը միջուկային բանակցությունները վերսկսելու հարցով քննարկումներ էր սկսել Գերմանիայի, Ֆրանսիայի և Մեծ Բրիտանիայի հետ: Նույնիսկ ԱՄՆ նախագահական ընտրություններում Թրամփի հաղթանակից հետո Իրանի կառավարությունը շարունակում էր ընդգծել, որ պատրաստ է բանակցությունների՝ փոխադարձ շահերի հիման վրա։ Այդ դիրքորոշման համար կառավարությունը նաև պահպանողականների լայն քննադատությանն էր արժանացել։

📍Այժմ, երբ Թրամփը հայտարարել է, որ որդեգրում է Իրանի նկատմամբ «առավելագույն ճնշման» քաղաքականություն, իսկ ԻԻՀ առաջնորդն էլ կարգադրել է, որ ԱՄՆ հետ բանակցելը խելամիտ չէ, Իրանի կառավարությունը փոխել է հռետորաբանությունն ու ասում է, որ Վաշինգտոնի հետ չեն բանակցելու:

🔶Սա իրականում սպասելի էր. երբ Թրամփը խոսում է բանակցությունների մասին, նկատի ունի ավելի շատ ոլորտներ ընդգրկող բանակցություններ, քան միջուկային գործարքը ներառում էր։ Այդպես էր 2018-ին, երբ Թրամփի վարչակազմը 12 պահանջ էր ներկայացրել Իրանին՝ հայտարարելով, որ միայն դրանց կատարման դեպքում ԱՄՆ պատրաստ կլինի նոր միջուկային համաձայնագիր կնքել Իրանի հետ:

🔸Այդ պահանջների թվում էր բալիստիկ հրթիռների արտադրության, ուրանի հարստացման, տարածաշրջանում պրոքսի ուժերին աջակցության դադարեցումը և այլն:

📍Նման պահանջներն Իրանի համար եղել և մնում են անընդունելի, ինչը նվազագույնի է հասցնում բանակցությունների հնարավորությունը։ Միևնույն ժամանակ, սա մեծացնում է այլընտրանքային սցենարների հավանականությունը, որոնցից մեկը կարող է լինել ոչ միայն ռազմական գործողությունների վտանգը, այլև Իրանի ներսում բողոքի ալիքի կազմակերպումը: Վերջինիս համար շարժառիթները շատ են՝ տնտեսական մինչև հանրային-սոցիալական խնդիրներ:

@IRI2day

🇮🇷🇦🇲Իրանի արտգործնախարար Աբբաս Արաղչին այսօր այցելելու է Հայաստան։

Ըստ իրանական կողմի՝ ՀՀ պաշտոնյաների հետ հանդիպմանը քննարկվելու են երկկողմ հարաբերությունների և Հարավային Կովկասի վերջին զարգացումները։

@IRI2day

🇮🇷🇦🇲Իրանի արտգործնախարար Աբբաս Արաղչին Երևանում հայտարարել է.

📍«Իրանն աջակցում է երկրների տարածքային ամբողջականությանն ու դեմ է տարածաշրջանում միջազգային սահմանների և աշխարհաքաղաքական փոփոխությանը։ Սա Իրանի հստակ ու անփոփոխ դիրքորոշումն է։

📍Մեր համոզմամբ՝ տարածաշրջանի հարցերը պետք է լուծվեն տարածաշրջանի ներսում, բանակցությունների և դիվանագիտական ճանապարհով՝ առանց ուժի կիրառման։

📍Իրանն աջակցում է հաղորդակցական ուղիների բացմանը՝ երկրների տարածքային ամբողջականության, ազգային իշխանության, օրենքների հարգման հիման վրա։

📍Իրանն աջակցում է Հայաստանի ու Ադրբեջանի միջև խաղաղության համաձայնագրի ստորագրմանը։ Հուսով ենք՝ երկու երկրների կողմից հնարավորինս շուտ կընդունվի այս համաձայնագիրը ստորագրելու վերջնական որոշումը։ Այն կարևոր է տարածաշրջանում խաղաղության, կայունության և տնտեսական համագործակցության ընդլայնման համար։ Հուսով ենք՝ առկա խոչընդոտները կվերացվեն և համաձայնագիրը կստորագրվի»։

@IRI2day

🇮🇷🇺🇲Իրանն Օմանի միջոցով պատասխանել է բանակցելու վերաբերյալ ԱՄՆ նախագահ Դոնալդ Թրամփի նամակին։

📍Իրանական կողմի հռետորաբանությունն այս պահի դրությամբ այն է, որ Թեհրանն առավելագույն ճնշման ու ռազմական սպառնալիքի պայմաններում ուղիղ չի բանակցելու ԱՄՆ հետ, բայց բաց է միջնորդավորված բանակցությունների համար։

@IRI2day

🇮🇷🇺🇲Իրանի հոգևոր առաջնորդի խորհրդական Ալի Լարիջանի.«Եթե ԱՄՆ-ն կամ Իսրայելը միջուկային պատճառաբանությամբ ռմբակոծեն Իրանին, Իրանը ստիպված կլինի շարժվել ատոմային ռումբի ստեղծման ուղղությամբ։ Ժողովուրդը ճնշելու է, որ ատոմային ռումբի ստեղծման ուղղությամբ գնանք»։

@IRI2day

📍Իրան-ԱՄՆ լարվածության ֆոնին ապատեղեկատվական հոսքերը կրկին ակտիվացել են

❗Ռուսալեզու, արդեն նաև հայկական թելեգրամյան ալիքները, հղում անելով իրանական Mehr գործակալությանը, գրում են, թե Իրանը փակել է իր օդային տարածքը և զորքերը բերել մարտական պատրաստվածության բարձր աստիճանի։

❗Mehr-ում նման հրապարակում չկա։ Իրանական փորձագիտական դաշտը ևս սկսել է հերքել այդ լուրը։

@IRI2day