У сваім казаньні а. Андрэй Крот заклікаў вернікаў быць вернымі Грэка-Каталіцкай Царкве, не зважаючы на цяжкасьці, якія сустракаюцца на нашым хрысьціянскім шляху, і праз гэта паказваць для сьвету нашую еднасьць і багацьце, якое ёсьць у Каталіцкай Царкве. Важна не зьвяртаць увагу на тое, як шмат нас, трэба пакінуць усе сумневы, як гэта зрабіў апостал Андрэй Першапакліканы, і пайсьці за Хрыстом, каб несьці яго для тых, хто вакол нас. А для гэта трэба найперш быць вернымі запаветам Хрыста ў нашым штодзённым жыцьці.

Гэтую тэму працягнуў таксама і Апостальскі Адміністратар для грэка-католікаў Беларусі Архімандрыт Сяргей, які заахвоціў да сумеснага сьведчаньня Хрыста для бліжніх разам з вернікамі іншых канфесіяў і расказаў пра прыклады такога супрацоўніцтва ў апошні час. Ён заклікаў вернікаў умацоўваць малітоўную еднасьць з Богам у супольнасьці, а таксама ў асабістай малітве, каб у сьвяты юбілейны 2025 год, які надыходзіць, увайсьці пілігрымамі надзеі.