🕯️ Тапталлаах күндү дьүөгэбит, чугас киһибит, биир идэлээхпит, өр сылларга улуус култуурунай, уопсастыбаннай, спортивнай олоҕун, ситиһиитин, үлэтин-хамнаһын хаһыакка, телевидениеҕа, радиоҕа тиһигин быспакка эргиччи сырдаппыт, үгүс дьонун-сэргэтин сурукка киллэрэн үйэтиппит, СӨ Бэчээтин туйгуна, “Түмүктээх үлэтин иһин” суруналыыстар бириэмийэлэрин лауреата, үс оҕо амарах ийэтэ, эрэллээх кэргэн, улахан дьиэ кэргэн эдьиийэ, истиҥ дьүөгэ Ольга Егоровна ШЕПЕЛЕВА – Олябыт олус соһумардык бу сиртэн хомолтолоохтук суох буолбутунан тапталлаах кэргэнигэр Сергей Петровичка, уолаттарыгар, бииргэ төрөөбүттэригэр, ийэтигэр, аҕатыгар, чугас аймахтарыгар, билэр, алтыспыт дьонугар-сэргэтигэр дириҥ кутурҕаммытын тиэрдэбит.

Олябыт барахсан, сырдыгынан сыдьаайа сылдьар, күлэн мичилийэр күндү киһибит, түүннэри-күннэри илиитин араарбакка идэтигэр бэриниилээхтик үлэлээбитэ. Улууска буолар бары тэрээһиннэр кини сырдатыыта суох ааспатахтара буолуо. Суруналыыс быһыытынан кинини билбэт киһи аҕыйах буолуохтаах. Өссө да айыахтаах-тутуохтаах киһибитин этэ диирбит биһиэхэ күннэтэ эн-мин дэһэн алтыһа сылдьыбыт, үөрүүбүтүн-хомолтобутун тэҥҥэ үллэстибит биир идэлээхтэригэр олус ыарахан сүтүк буолла. Эдэр сааһыгар суорума суолламмыта ордук харааһыннарар.

Олябыт сырдык аатын кини суруйбут үлэлэрэ, олорон ааспыт ситиһиилээх үлэтэ-хамнаһа, дьоҥҥо үтүө-мааны сыһыана, үлэһит, үөрүнньэҥ майгыта өрүү сырдык өйдөбүл буолан сүрэхтэн-санааттан сүтүө суоҕа, бииргэ үлэлэспит дьоно, дьүөгэлэрэ Олябыт сырдык аатын өрүү үрдүктүк тута сылдьыахпыт. Быдан дьылларга быраһаай, күндү доҕорбут...

@uamurusahargata @ulusmedia