💫Тохсунньу 17 күнэ

♈️Хой

Өй уонна сүрэх мөккүөрүгэр сылдьаҕын. Өй кыайыан сөп. Сынньанарыҥ, аралдьыйарыҥ ордук. Үлэ улаханнык тахсыбат күнэ.

♉️Оҕус

Көхтөөх үлэ күнэ. Үлэҕин-хамнаскын эрдэ саҕалыырыҥ ордук. Биир тылынан, хамсанарга, кэлэргэ-барарга бэлэмнэн.

♊️Игирэлэр

Сотору кэминэн саҥа олох саҕаланыа. Саҥа билсиһиилэр, саҥа бырайыактар күүтэллэр. Таҥаскын саҥардарыҥ куһаҕана суох буолуо этэ.

♋️Рак

Сырдык ыра санааҥ күннээҕи түбүгү үмүрүтэр. Көннөрү да күнү бырааһынньык оҥорор кыахтааххын. Бу күн суолталаах дьыалалары былааннаама.

♌️Хахай

Айанныырга табыгастаах күн. Дьиэҕэ олорооччулар чуҥкуйаллар. Онон бу күн хайаан да ханна эрэ тахсыахха, барыахха наада. Ол туһанан эрэ дьайыа.

♍️Кыыс

Харчы чааһыгар көмөлөһөр киһи көстүө. Ол эрэн, сэрэнэр ордук. Албыннатыы ыраахтан ылбат. Саҥа дьону кытта билсиһии, кэпсэтии күүтэр. Дууһаҕын арыйарга ыксаама.

♎️Ыйааһын

Саҥаны арыйартан, эбиини билэртэн куттаныма. Ылсар дьыалаҥ барыта табыллар аналлаах. Айар-тутар дьоҥҥо ордук тахсыылаах, табыллыылаах күн.

♏️Скорпион

Үлэ оччо тахсыбат күнэ. Дьиэтээҕи үлэни тохтото түһэр ордук. Чугас, тапсар дьоҥҥун кытта көрсөн, сэргэхсий. Айанныыр да куһаҕана суох.

♐️Охчут

Болҕомто киинигэр сылдьаҕын. Бэл, салалта хараҕын далыгар киириэххин сөп. Онон сарсыардаттан настырыанньалаах сылдьарга кыһан. Бээтинсэ диэн ыһыктыма.

♑️Чубуку

Кимиэхэ да орооспокко, бэйэҥ бэйэҕэр сылдьа сатаа. Тус үлэҕэр-хамнаскар, кыһалҕаҕар болҕомтоҕун уурарыҥ ордук. Кэлин мунньуллан хааллаҕына, эмиэ бэрдэ суох.

♒️Күрүлгэн

Илииҥ иһиттэн мүччү тута сылдьар күнүҥ. Кыҥкыйдыырыҥ да элбииһи. Онон ыксаабакка, кимиэхэ да бааспакка, бэйэҥ бэйэҕэр холкутук сылдьарыҥ ордук.

♓️Балыктар

Күүс-сэниэ бөҕөҕүн. Ону үчүгэйгэ туһана сатаа. Үлэҕэр түстэххинэ, ситиһии кэтэһиннэриэ суоҕа.Айар үлэҕэ, тапталга, сынньалаҥҥа табыгастаах күн.

✅@uamurusahargata @ulusmedia
 

📆Тохсунньу 17 күнэ. Чөл күн

🥶Бэҕэһээ эмиэ тымныы күн буолла. Киэһэ арыый сымнаабыт этэ эрээри, илинтэн сытыы соҕус тыаллааҕа.

🌥Бүгүн сарсыарда 6 чааска Бороҕоҥҥо 38 кыраадыс тымныы буолбут. Күнүс 25-27 кыраадыс тымныы буолара күүтүллэр. Илинтэн сөкүүндэҕэ 2 м түргэннээхтик үрэр тыаллаах былыттаах күн.

🙏Дьэ, тымныыбыт сымнаата диэххэ сөп. Сүллүкүүттэрбит икки күн дьыбарынан тыыннылар. Аны Кириһиэнньэҕэ хайдах күн-дьыл буоларын кэтэһэбит. Онно тымныйбатаҕына, тохсунньу сылаас буолла диэххэ сөп.

✍️ Афанасий Сектяев

📸 Дария Ордахова. Мүрү

✅ @uamurusahargata @ulusmedia

🔭Тохсунньу 1⃣7⃣ күнэ – Оҕо саҥаны айыытын (изобретение) күнэ.

🔭 Бу күн 12 сааһыгар харбыырга атахха кэтиллэр лапчааннары айбыт Бенджамин Франклин төрөөбүт күнүгэр сыһыарыллыбыт. Кини хачайданар кириэһилэни, чаҕылҕаны тэйитэр тэрили, онтон да элбэх саҥаны айбыт учуонай быһыытынан биллэр.

🔭 Атын холобурдары аҕаллахха, хаарынан сүүрэр тиэхиньикэни 15 саастаах Жозеф-Арман Бомбардье 1922 с. айбыта. Мыыла хабахтарын таһаарар оонньууру 1968 с. Бэтти Гэллоуэй диэн кыыс баара эрэ 10 сааһыгар оҥорбута. Көрбөт дьоҥҥо аналлаах ''Bat-1'' диэн аппарааты 2014 с. Волгодонск куоракка 16 саастаах Валерий Ильин оҥорон, тарҕаппыта.

🔭 Оҕолор сыллата 500 000 саҥаны айаллар. Арассыыйа оҕолоро космонавтарга аналлаах тиис суунар паастаны, көрбөттөр туһанар тайахтарын, ардах электростанциятын айбыттара биллэр.

🔭 Оҕону үөһээттэн көрүмэҥ. Кини кыаҕын ити аҕалбыт холобурдарым даҕаны туоһулууллар.

🔭 Тугу эрэ толкуйдуу сатыыр оҕоҕутун суолталааҥ, бүгүн кини дьоҕурун бэлиэтээҥ.

✍️ Уйаара КУСТУК

✅ @uamurusahargata