⚡️MUNOSABAT

Bilim va malakalarni baholash agentligi tomonidan joriy yilning 2 – 3-noyabr kunlari Umumta’lim fanlarini bilish darajasini baholashning milliy test tizimi doirasida ona tili va adabiyot fanidan imtihon o‘tkazildi.

Milliy sertifikat imtihonlari O‘zbekiston Respublikasi Vazirlar Mahkamasining 2020-yil 12-oktabrdagi “Umumta’lim fanlarini bilish darajasini baholashning milliy test tizimini joriy etish to‘g‘risida” 646-son qarori bilan tasdiqlangan “Umumta’lim fanlarini bilish darajasini aniqlash va sertifikat berish tartibi to‘g‘risida”gi Nizomga asosan tartibga solinadi. Unga ko‘ra tegishli umumta’lim fanini bilish darajasi to‘g‘risida davlat namunasidagi sertifikatga ega bo‘lgan abituriyentga sertifikat darajasiga mos ravishda oliy ta’lim muassasasi bakalavriatiga o‘qishga qabul qilish bo‘yicha test sinovlarida ushbu fandan belgilangan maksimal ball yoki maksimal ballga nisbatan tabaqalashtirilgan (proporsional) ball berish tartibi joriy etilgan.

Bilimni baholash agentligi tomonidan Umumta’lim fanlarini bilish darajasini aniqlash va davlat namunasidagi sertifikatni berish uchun tuziladigan test topshiriqlari umumiy o‘rta ta’lim tizimiga joriy etilgan davlat ta’lim standartlariga hamda ta’lim o‘quv dasturlariga muvofiq ishlab chiqilgan. Xususan, ona tili fanidan lingvistik va nutqiy kompetensiyalarni, adabiyot fanidan badiiy asarni tahlil qilish hamda adabiy-nutqiy kompetensiyalarni baholashga yo‘naltirilgan test topshiriqlaridan foydalanilgan.

So‘nggi kunlarda ijtimoiy tarmoqlarda keng muhokamaga sabab bo‘layotgan ayrim test topshiriqlari hamda esse mavzularining imtihon savollari bilan muvofiqligi agentlik tomonidan o‘rganib chiqildi. Tahlil jarayonida mazkur holat turli omillar ta’sirida yuzaga kelganligi ma’lum bo‘ldi.

Ma’lumki, yozma savodxonlikni baholashda o‘lchov vositasi sifatida yozma ishning esse turidan foydalanilmoqda. Esse yozish texnologiyasi bo‘yicha ko‘nikma va malakalarni shakllantirish va o‘zlashtirish talabi yaqin yillardan boshlab ta’lim dasturlarida belgilab ko‘rsatildi. Shu sababli dastlab milliy test tizimi doirasida ona tili va adabiyot fanidan o‘tkazilgan imtihon jarayonlarida yozma savodxonlikni baholashga yo‘naltirilgan test topshiriqlari sifatida o‘quv dasturlarida belgilab ko‘rsatilgan mavzularga mos vaziyatlarga oid esse yozish talabi belgilangan ("Gender tengligi” “Maktabni bitirgach qay yo‘ldan borgan ma’qul?”, “Oliy ta’lim olish yoki ishga kirish?” kabi mavzular doirasida) edi.

Quvonarlisi shundaki, so‘nggi yillarda talabgorlar orasida yozma savodxonlikni oshirishga bo‘lgan e’tibor ortgani bois esse yozish malakasi ham to‘laqonli shakllanib borayotgani ko‘zga tashlanmoqda. Shu bois o‘tkazilayotgan imtihon jarayonlarida esse mavzulari sifatida ijtimoiy hayotda muhim ahamiyat kasb etayotgan, ijtimoiy tarmoqlarda keng muhokamalarga sabab bo‘layotgan, e’tiborga loyiq, tarixiy ahamiyatga ega bo‘lgan dolzarb va qiziqarli mavzular tanlanmoqda. Xususan, ta’lim sohasidagi muammolar, xususiy oliy ta’lim muassasalari faoliyati, ayniqsa, joriy yilda bo‘lib o‘tgan “Parij-2024” yozgi olimpiada o‘yinlarida yurtdoshlarimizning qo‘lga kiritgan yutuqlari asnosidagi sport va ta’limga bo‘lgan e’tibor mavzularining keng jamoatchilik muhokamasida ekanligi sir emas. Esse uchun omma e’tiborida bo‘lgan mavzular tanlanishi bir qancha sabablar tufaylidir. Talabgor uchun notanish mavzu uning tilni bilishga oid bilimlarini aniqlashga xizmat qilmasligi mumkin. Esse yozish jarayonida talabgorning jamiyatshunoslik, tarix yoki boshqa fanlarga oid bilimlari emas, balki uning yozma savodxonligi tekshiriladi, matn yaratish, matnga xos mantiqiy-mazmuniy xususiyatlar, til birliklaridan matnda to‘g‘ri foydalana olish, imlo qoidalariga amal qilish, tinish belgilarini to‘g‘ri qo‘llay olish, lug‘at boyligidan unumli foydalana olish kabi bilim, ko‘nikma va malakalar baholanadi.