Кіраўніца і чальцы Кабінета сустрэліся з міністаркай нацыянальнай адукацыі Польшчы Барбарай Навацкай

У сустрэчы разам са Святланай Ціханоўскай бралі ўдзел яе намеснік Павел Латушка, прадстаўніца па моладзевай палітыцы і студэнцтве Кабінета Маргарыта Ворыхава, в.а. прадстаўніка па нацыянальным адраджэнні Кабінета Павел Баркоўскі.

Абмяркоўвалі:

🔹 Прызнанне беларускіх атэстатаў

Беларускія атэстаты аб сярэдняй адукацыі будуць прызнавацца на ўзроўні польскіх матуральных дакументаў, а патрабаванні да дакументаў будуць уніфікаваны для спрашчэння паступлення беларускіх вучняў у польскія школы і ўніверсітэты.

🔹 Будучыню ліцэя ў Гайнаўцы з дадатковай беларускай мовай навучання

Працягваецца пошук аптымальнага рашэння, каб захаваць унікальную ролю гэтай установы для беларускай меншасці.

🔹 Механізмы рэагавання на булінг

Будзе створаны аператыўны канал рэагавання з удзелам Міністэрства нацыянальнай адукацыі Польшчы і Прадстаўніцтва па нацыянальным адраджэнні Кабінета.

👉 Калі вашы дзеці сутыкнуліся з такімі праблемамі, звяртайцеся ў чат-бот Кабінета або на пошту revival@belaruscabinet.org

У польскіх школах будзе распрацаваны курс для інфармавання вучняў пра папярэджанне булінгу і гвалту. У школах з’явіцца новая роля – асістэнт па міжкультурнай камунікацыі, які дапаможа дзецям з розных нацыянальнасцей адаптавацца да польскай адукацыйнай сістэмы.

🔹 Падтрымку беларускіх школ выходнага дня

Міністарка пацвердзіла важнасць развіцця сеткі беларускіх школ выходнага дня. На ўзроўні мясцовых улад будзе аказана дапамога ў пошуку бясплатных памяшканняў і абсталявання для гэтых школ.

👉 Каб адкрыць школу, звяртайцеся праз каналы Прадстаўніцтва па нацыянальным адраджэнні Кабінета і Міністэрства адукацыі Польшчы.

📢 Павел Латушка: «31 тысяча беларускіх школьнікаў і выхаванцаў дзіцячых садкоў знаходзіцца зараз у Польшчы. 31 тысяча! Вось, што справакаваў рэжым Лукашэнкі. Ну і важная навіна, у найбліжэйшы час будзе змененае заканадаўства і беларускія атэстаты аб сярэдняй адукацыі будуць прымацца вышэйшымі навучальнымі ўстановамі Польшчы».

📢 Маргарыта Ворыхава: «Міністэрства адукацыі Польшчы прызнала важнасць узнятых праблем і запэўніла нас у тым, што ў найбліжэйшы час будуць праведзены змены ў сістэме настрыфікацыі. І пацвердзіла гатоўнасць да падтрымкі беларускіх студэнтаў і стварэння гасціннага асяроддзя, якое дазволіць беларускай моладзі атрымаць доступ да еўрапейскай адукацыі і магчымасцей».

📢 Павел Баркоўскі: «Мы бачым безумоўную падтрымку і разуменне большасці важных для беларусаў пытанняў на ўзроўні Міністэрства адукацыі і наша камунікацыя адбываецца на высокім і інтэнсіўным узроўні. Ёсць базавая згода аб важнасці падтрымкі беларускай мовы і ідэнтычнасці для грамадзян Беларусі, якія цяпер пражываюць у Польшчы. Мы шукаем кансэнсус і дамагаемся стварэння працоўных інструментаў для вырашэння нашых задач і праблем».

@CabinetBelarus