group-telegram.com/Fadfadah98/4022
Last Update:
سلسلة
#مودة_ورحمة❤️
الفصل ( 13)
#النبي_الزوج🌸
مِن منطلَق الآية البتقُول :
{قُل إنمَا أنَا بَشَرٌ مِثلَكُم..}..
حابٍّه أقول إنو حياة النبِي ﷺ مدرسَة في كل شئ ولأي حد عايِز يعيش حيَاة مُتوازنَة وصِحية على كل المُستويات سواءً كانت نفسِية ، إجتماعِية ، أخلاقية..غيرو.
والنبي عليهِ الصلاة والسَّلام هو خَير من عامَل النِّساء وخيرَ من أوصَى بهِن ، وخيرَ من أوفَى بحقوقهِن (عايز تتأكد أقرأ عن الحقبة الزمنية -على مستوى العالم ما قَبل البعثة - كتاب السيرة النبوية لـ علي محمد الصلابي).
وحياة النبِي ﷺ بعِيدة كُل البُعد عن دُعاة التشدّد والتعنُت في الدِين وإنما كان النبي ﷺ سَهل المعشَر ، بسّاماً ولينَاً ورؤوفاً في تعاملهِ مع الكُل💕.
البُوست دا جزء صغير من التفاصِيل البسيطة عَن حياتو الزوجِية
-مُعظمها بلسَان السيدَة عائشة ما عشَان كان مفضلهَا على نسائه وإنما لأنها المرأة الوحيدة من بين زوجاتو اللي كانت بتروِي الحدِيث-وبالتالِي وبلا شَك إنو كل الأوامِر وكل النواهِي النبي ﷺ كان بطبقهَا على نفسُو أول ، ومستحيل يأمُر بشِئ غير لمّا يكون هوَ أول المطبقِين ليهُو.
🌸 التَنزُه مع الزوجة لَيلاً:-
روى البخاري إنو النّبي ﷺ إذا كانَ بالليل سارَ مع عائشَة يتحدّث..
ودي حاجة لطيفَة جداً ، طلعَات وجلسات أُنس مع شريكتَك كَفيلة بإنو تعِيد التوازُن لحياتكم من جديد💕.
🌸الضحك على فكاهتهَا والإستمَاع إلى كلامها ومجاراتها في الحدِيث♡
السيدة عائشة -رضى الله عنها- قالت : قلتُ يا رسُول الله أرأيت لو نزلتَ وادِياً وفيه شجرةً أُكِلَ منها ، ووجدتَ شجراً لم يؤكل منها ، في أيُّها كنت تُرتِعُ بعيرَك؟ قال {في التي لم يُرتع فيها}
وهي كانت تعني أن النبي لم يتزوج بكراً😉 غيرها.
-أخرجه البخاري.
🌸 الشُرب والأكل من موضِع واحِد
في حديث للسيدَة عائشة بتقول فيه :
{كنتُ أشرَب في إناء وله ﷺ فيضَع فاه على موضع فِيّ ، وأتعرّق فيضع فاه على موضع فيّ}.
رواه مسلم.
رُومانسيَة ولا أفلام بوليود زاتو😂 ، المحيرنِي الجفاء في التعامُل بين الأزواج -خصوصاً السودانيين ديل- آي هو بحبها بس نهاي ما بقول ليها كدا ولا حتى لو إتصرف بلطف بكون حاسي زي الكأنو طعنوه في رجولتُو!!!
ياااخوانا ليي بس الواحِد بيبخَل بالحب على زوجتُو ، ليي ما بيكسب أصغر المواقِف عشان يبين ليها الحاجَة دي ، هو إنت يعني فايت الرسُول بشنو!
🌸 الإتِكاء على الزوجة:
لقول عائشة : كان رسُول الله ﷺ يتكئُ في حجري وأنا حائِض.
- رواه مسلم.
-والله تقريباً آخر مرة شفت فيها أبويا بيتكئ على أمِّي كان قبل ما أتولِد😂
🌸 مساعدتها في أعبَاء المنزِل
-ودي أهمّ نقطة في نظري- لإنو نحن عندنا إعاقَة في الحاجة دي ، البيسمع كلام زوجتو خروف!!!! ، البيساعد مرتو في شغل البيت ما عندو شخصيَة!!! البيكوِي ولا يخيط ملابسو براهو ما عندو كلمَة!!
من متين كان اللُطف عيب!
ومن متيِن بقى مساندة الزوجَة معنى مساوِي لنقص الرجُولة!
نحن كمجتمَع تقريباً الدين عندنا شبه بقى ما عندو أولويَة في حياتنا ، بقت الأولوية لأفكارنا الشخصية وأهوائنا وعادتنَا وتقاليدنَا!
طيّب لما سُئلت السيدَة عائشة ، ما كان النبي ﷺ يصنَع في بيته ؟ قالت : كان في مِهنة أهله.
- رواه البخاري
وفي رواية تانِية ليها قالت :
" كانَ يخصِف نعلَه -يعني يترزو ويرقعو- ويخيِط ثوبَه".
النبي ﷺ كان أكثر الناس تواضعاً ، وما كان بيترفّع أبداً عن مساعدة نسائه أو خدمتهُن..
وفي رواية للإمام أحمد يقول :
"كانَ بشراً من البشَر يفلِي ثوبه ، ويحلب شاته ويخدِم نفسَه. "
دا غير إنو -رغم فقره- عليه الصلاة والسّلام كان يحضر لزوجاته من الخدم ما يساعدهُن في أعباء المنزِل ، فقد كان للسيدة عائشَة جارية اسمها بُريرَة
إمكن هسي مافي جوارِي بس الزمن إتطور ، في غسالات وفي مايكرويف😂😂 ، فلو قادر ما تبخل عليها بأي حاجة ممكن تخفّف عليها من شغل البيت
والله الحياة دي بسيطة جداً بس نحن المعقّدنها للأسف!♡.
🌸 يَهدِي لأحبتها
كان رسول الله ﷺ إذا ذبح شاةً يقول :"أرسلوا بها إلى أصدِقاء خديجة" - رواه مسلم.
حتى بعد ما ماتت ما نساها ، إخلاص عظيم ، وحب كبير💕
🌸 يمتدِحهَا
لقوله ﷺ :
"إن فَضل عائشة على النِّساء كفضل الثريد على سائِر الطعام. "
بيشكِّرها ، بيمدحهَا قدام الناس
ليي نحن عاملين فيها خجولين وبتاع!
الكلام الحلو والمديح ليها حتى لو قدام أهلها وصاحباتهَا وين المشكلة! خليهم يقولوا عبيط وأهبل!😌💕
🌸يسرّ اذا اجتمعَت بصويحباتها
قالت عائِشة : كانت تأتيني صواحبي فكنّ ينقمعنّ (يتغيبنّ) من رسول الله ﷺ ، فكان يُسربهن إليّ (يرسلهن إلي)
- رواه مسلم.
كان حرِيص على إنها تكون مبسوطة، وعلي إنو يكون عندها وقت ترفه فيهو عن نفسهَا مع أترابها ، يعني حتى لمن صاحباتها يغيبوا عنها بسبب إنو قاعد ، برسّل ليهم عشان يجُوها.
🌸يعلن حُبها
لقوله ﷺ عن خديجة : " إني رُزِقت حبها.
- رواه مسلم.
BY It's Tanzeel ♡.
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/Fadfadah98/4022