group-telegram.com/GenPr/6145
Last Update:
Жетісу облысының Үйлестіру кеңесінде су тасқыны кезеңіне дайындық мәселелері қаралды
Жетісу облысының прокуроры Мадияр Басшыбаевтың төрағалығымен аймақтық Үйлестіру кеңесінің кезекті отырысы өтті.
Отырыс барысында уәкілетті органдардың су тасқыны кезеңіне және басқа да табиғи және техногендік сипаттағы төтенше жағдайларға дайындық шаралары қаралды.
Кеңес жұмысына облыс әкімінің орынбасары, мәслихат депутаттары, қала және аудан әкімдері, уәкілетті мемлекеттік және құқық қорғау органдарының, су инспекцияларының басшылары, сондай-ақ «Қазсушар» және «Қазселқорғау» мемлекеттік кәсіпорындарының жергілікті филиалдары қатысты.
Талқылау барысында су бұру арналары мен су өткізу құрылыстарын абаттандыру, өзен арналарының тазартылуы, бөгеттердің салынуы және нығайтылуы, сондай-ақ гидротехникалық құрылыстарды жөндеу мәселелері қаралды.
Үйлестіру кеңесінің төрағасы Мадияр Басшыбаев қатысушылардың назарын су тасқынына қарсы шаралардың ұйымдастырылуындағы олқылықтарға және облыс аумағында орналасқан гидротехникалық құрылыстардың қауіпсіз пайдаланылуын қамтамасыз ету үшін жедел шаралар қабылдау қажеттілігіне аударды.
Облыстағы 114 гидротехникалық құрылыстың 12-сі (10,5%) қанағаттанарлықсыз жағдайда. Олардың пайдалану жарамдылығын анықтау үшін кешенді зерттеулер жүргізу ұсынылды.
Сонымен қатар, су тасқынына қарсы іс-шаралар жоспарларының формалды түрде жасалатыны анықталды. Онда жыл сайын бірдей шаралар көрсетіліп, жергілікті жердің ерекшеліктері мен алдыңғы жылдардағы су басу оқиғалары (6 рет елді мекендерді су басу және 2 жол шайылуы) ескерілмеген.
Кейбір жағдайларда, лай суды сору үшін сатып алынған жабдықтар (сорғы қондырғылары) талап етілетін техникалық сипаттамаларға сәйкес келмейтіні анықталды.
Сондай-ақ, ықтимал су тасқынын жою үшін қажетті инертті материалдардың дайындалуы бойынша да олқылықтар бар екені көрсетілді.
Жалпы, Үйлестіру кеңесі уәкілетті және жергілікті атқарушы органдар тарапынан су тасқынына қарсы іс-шаралардың келісімділігінің жеткіліксіздігінен атап өтті.
Кеңес қорытындысы бойынша оның мүшелері мен мәслихат депутаттары су тасқынына қарсы іс-шаралардың орындалуын бақылауды күшейту қажеттілігін қолдады.
Барлық мүдделі органдарға анықталған кемшіліктерді жою, лауазымды тұлғалардың жауапкершілігін арттыру және халықты қорғау бойынша қосымша шаралар қабылдау жөнінде нақты ұсынымдар берілді.
Прокурорлық қадағалау актілері енгізілді.
#ЗаңжәнеТәртіп
#Жауапкершілік
Жетісу облысы прокуратурасының сайтына сілтеме:
https://www.gov.kz/memleket/entities/prokuratura-zhetysu/press/news/details/945747?lang=kk&ysclid=m7n9aseycs119243018
Facebook | Instagram | YouTube | Сайт ГП
