اليأس ينتشر في روحي كَوباء مُفاجئ
لم أصل لهذه المرحلة من اليأس من قبل.
اليأس الذي يجعلني أفكر بأفكار مُخيفة
وفجأة..
أتذكر ذلك الجسر البني الذي يتوسط المدينة
جسر مليء بذكريات طفولتي وأحاديث أمي عند عودتنا من الدوام معاً
أتخيل نفسي أتهاوى من فوقه بلا سبب
أقضي على حياتي، على آلامي وأحزاني وأعدائي وأحلامي ووجودي
أختفي وأتلاشى مع الأرض
يبتلعني التراب
يغضب مني الله ويعاقبني للأبد
بعدها أتساقط من فوق جسر عدد لامتناهي من المرات
أعدّل الفكرة، لأني لا أريد أن أجعل الله يكرهني ولا أن اتساقط من فوق جسر للأبد كورقة خريفية عَلق فيها الزمن.
أقول سأمشي عليه فقط وأتخيل نفسي فوقه بلا هموم، خفيفة كالغيمة التي أتخيلها أقرب بعقلي الطفولي.
خيالي هذا هو الذي أنقذني مرات عديدة، وهو الشاهد الوحيد على قتلي حية لأنه أخذني بأحضانه وقال لي تخيلي.
أشاهدني كطفلة تركض عليه وتسأل أمها متى سنصل إلى البيت
كي نغلق علينا بابنا وأرتاح
كان شوقي يقتلني لألعابي وتلفازي وأكلات ماما.
أتابع المشي
أمشي فوقه بخفة تلك الطفلة وضحكتها البريئة
أقترب من نهايته، أنزل على الدرجات
وأتذكر الطفلة التي لم يعد لها وجود، أصبحت عشرينية أوقعتها الحياة منها بدون قصد في حفرة، حفرة كبيرة لا ترى سُلماً للخروج منها
صرخت مرات كثيرة من داخلها، لكن أحداً لم يسمع.
أنزل من على الجسر، أشتري كروسان بالشوكولا للفطور وأتابع المشي على الأرض داخل واقعي وأفكر في الجسر.

آية ♥️
٢٩ـ٩ـ٢٠٢٤
التاسعة صَباحاً
مُقابل الجسر البُني.

ـ

في منشور مهم بعد شوي ♥️

كروب "مُحاولة" 🪄

هي رحلة لمدة ٢١ يوم رح نرجع فيها لنفسنا ونتعلم التنظيم والتخطيط والالتزام بشكل احترافي ويناسب شخصيتنا الفريدة ♥️
رح أشارك معكم فيديوهات ومقالات وكتب تساعدكم +رح أتابع معكن وحدة وحدة بطريقها لوضع خطتها وأهدافها الشخصية
بالإضافة لأنشطة جماعية مفيدة وممتعة
رحلتنا رح تبدأ بـ ١ أكتوبر وتنتهي بـ ٢٢ أكتوبر

للاشتراك أبعثيلي ملخص عن نفسك وأهدافك وسبب انضمامك معنا
رح أختار بس ٥ بنات 💛☀️

سكرت الانضمام ♥️♥️

تم ✅
صح ما تحسنت حياتي، بس فقرات ظهري ورقبتي صاروا أحسن 😂

ها أنا أسرق من يومي لصناعة هذه اللحظات في غرفتي هُنا، بعد أن كنت أصنعها مرارا في مصر، أصنعها الآن لأعيد شعوري ذلك، مع أنني حينها كُنت أريد شعوري الآن، وهذا هو الإنسان..

بحس بسعادة لما اكتشف حدا بقرأ معي نفس الكتاب بنفس الوقت ✨✨

دراسة: الأنثى مهما كانت بتملك جمال خارجي بس إذا كانت بالمكان الغلط أو مع الشخص الغلط رح تفقد هالجمال ورح تكون منطفية وباهتة لأن روحها ميتة وبالتالي رح نشوف نفسها مو حلوة وبلا جاذبية، أما الأنثى حتى ذات الملامح العادية (مع إني ما بقتنع إنو في بنت عادية، كلهن جميلات بطريقة ما) بس هي موجودة ببيئة صح ومع الشخص الصح رح تكون متوهجة ولامعة ورح تبين وكأن في هالة حواليها بتخليها مشرقة لأن روحها منتعشة وفيها حَياة.
طبعاً هاي دراسة أني عملتها من شوي وحاسة إنها صحيحة 😔♥️

أغلب الناس رافضة موضوع إنو الإنسان الآخر يتطور وبتغير وبصير أحسن وأشطر وأقوى لما يشتغل على حاله
بتذكر لما كنت بالصف العاشر ما كنت مهتمة بدراستي وما كنت شاطرة كثير خاصة بالانكليزي يلي كنت أحس إني مستحيل أقدر على اللغة وما كنت أدرس وكانت علاماتي سيئة، بس بالبكلوريا كنت مجبرة أدرس هالمادة وفعلاً درست ٣ كتب لحالي بدون مساعدة ودروس خصوصية و جبت يمكن ٢٧ أو ٢٦ من ٣٠ ومن وقتها تغيرت نظرتي للغة ولنفسي

و من وقتها بلشت أشتغل على لغتي حتى صرت بوضع أحسن، فَ بعد ٤ سنين بقابل رفيقة من الثانوية وكانت بصفي وضمن الحكي قلت إني عم أتعلم على برنامج إحصائي باللغة الأجنبية ويمكن رح أبلش أعطي كورسات فيه لأني متمكنة من اللغة ومن الإحصاء، فقابلت كلامي باستهزاء وقالت أي بتذكر قديش لغتك قوية بطريقة مو لطيفة.

هي فعلياً بتكون داخلياً رافضة أي تغيير أو تحسّن ممكن يصير بحياة الناس، وضلت مثبتة صورة وفكرة جداً قديمة عني ورفضت تغيرها حتى تحس بالأمان والتفوق.

✨شكلي وأني عاملة حذف لكمالة القصة وقت رديت عليها مشان ما تعرفوا إني شريرة😔✨

#امتنان_اليوم
امتنان صباحي ما بعرف ليش خطر ببالي
بس حابة أخبركم عن مدى حبي لحضرتكم 😔♥️
كثير بكون مبسوطة وقت تتفاعلو على كلامي وتبعثولي على البوت وتشاركوني شلون استفدتو من وجودكم بقناتي يلي هي أكثر مكان بحبو بالحياة ♥️♥️🪄
و كمان ولا مرة تخيلت أنو القناة تكون سبب حتى أتعرف على أكثر أشخاص لطيفين بالحياة وبعدها نصير رفقات
ميس، مايا، شهد، جودي، تغريد، حنين، آية، رند، حسناء و بعد كثير بنات صارو جزء أساسي من حياتي ♥️♥️
عنجد شكراً ♥️