يواهس تضحك الدنيا على شفافك
‏يبو الليل الحلو ‏اليلعب على جتافك

‏أحس روحي تأمن بيك وتخافك
‏واحسك لغز شنهو انت وشنو اوصافك

ولأ غيرك نبع بالشوك يرويني توصيني
توصيني أعله يا ذمه توصيني ؟

عـريــٰان السيد خـلف

عيـونك ماي زمزم للعِطش شوفه
وضحكتك فرحة احديثات مزفوفه

وشعرك ليل سارح والملامح غيم
وشاماتك مضيف اشفايفي ضيوفه

يغيمه ومن تطش روحك بگاعي اتطيح
أخضر وأنتشي وأستاهل الشوفه

وفرحتي البيك تشبه فرحة العميان
الاعمى يشوف كلشي بلحظه طيوفه

ومن شفتك صرت اشبه اجروف الماي
الماي يگضي عمره ايغازل اجروفه

النده التارس خدودك ورد وإبستان
وانه فلاح خشنه حجاية جفوفه

ترف كلش واحس من الگمر مثلوم
وياهو اللي يّوصفك تفرح احروفه

يبو خصر الرمل من شفتك احتاريت
طفل وامه بعيده بساعة الخوفه

وروحي العاشگه عيونك اتعيل هواي
بيه وداعتك يالبيك مچتوووفه

يتارس كلشي بيه من الجدم للراس
مدمن بيك جني العاشگ أگطوفه
.
.

أمير الخفاجي

ناسنا واهلنا وحبايبنا الانضموا بالجديد حياكم الله وشرفتونا 🟥❤️✅

تعب ليل وفـرح غبـشه وملامه وهم
وحلم عابر ضحكتي وجذب ما مهتم

الحزن خطار روحي وابد ما حنيت
جذاب اليّگلك بعدك أتألم

الفرح جان بوصالك من رحت خسران
وموش انه بعد بالراح اضل احلم

واذا لحظه ويمر ذكراك اغمها الروح
واعاتب گلبي ذاك البالجرح يعلم

الوكت دولاب يفتر وانسى كل الصار
يوم ثنين والثالث واتأقلم

وارد ذاك القوي المرتاح واضحك حيل
واختار البعقلي وگلبي شابع ذم

العوض نعمه فضيلة وما اضل مكسور
ويجي يوم ايتعوض گلبي الـ امهشـم

وابدي وبأختياري الصح اعيش ايام
حلوه وفرحتي تنشاف بالمبسم

وعيوني التضحك وتلمع وحُبها يبان
واحس الفرحه من احجيها جوري أنشم

واطش روحي اعله رزقي الجاي طشت غيم
الخير شما تبده وجب أن ينلّم

الـ إيـحبني ربحني وما خــسر لو يـوم
انه گلبي حنين وللجرح بلسم

وانه گلبي اليطبله يعيش نعمه وخير
وحك ذاك النطق بالمهد واتكلم

خساره الما حواني ولمني من الناس
الاخذني الديرة اگليبه صدگ يفهم

.
.
.

أمير الخفاجي

روحي هدها الشوگ لعيونك تريد
شما كبر شوگي كبر بيك البُـعد

وفرعت بيبان گلبي اعله اللقاء
ومن وصلتك شفتك ابابك تسد

وابتسم گلبي وراك وگلي شوف
بدنيتك مو كلشي وياه تنسعد

ولام روحه واستحى من روحي حيل
وگلها اعذريني الگلب بالحب عبد

وزغرت الدنيا وكبر خوفي ولگيت
اكبر من الدنيا بعيوني اللحد

وانه لو ادري بثگل وجهك اروح
من البدايه وانه الاختار ابتعد

.
.
.
أمير الخفاجي

أحيانًا يُصان المتبقي من الودّ بقطع الوِصال ..!

عندَك يا حِلو بيت بگلبنـه ....!

يماي إشما عِليت أبصيتك اتضيــع
ألومك چي تعز نفسك ع الحسين

باچر شنهو عذرك وكت الـ إعتّـاب
وكت دمع الاطفال إبرگبتك ديـن

يـ المعطش الرضيــع وكل الـ أعيال
يـ الـ بالطف أبد ما منحـسب زين

وگفت بوجه شيخ الدنيـا والناس
وشيخ المرجله إلمتصَوّب العيـن
.
.

أمير الخفاجي

أنه يحبيّبه أشـتفيد عيوني أذا مو أنتي بيـها ؟

سَـلِّـم أمُـورَكَ للإلهِ فـربما
جعل الشدائدَ لِلرَّخاءِ سَبِيلا

وَأرِحْ فؤادكَ مِنْ شِكُوكٍ إنهُ
رَبٌ كـريـمٌ لا يَـرُدُّ نَـزِيـلا

وي غبشة عمال المسطر
بجويريد ابلايا انگاب

كاشخ بهديمات ارفيجي
وبالدربونه اتلفت طاب

زيبگ جدم عيوني ..وگلبي
يتسابگ وي ريح الهاب

چن ميل وساعة صريفتهم
واتنطر باگي اعله الباب

يمتى افلانه تفك الباب؟

عدت فترة وطولي تجمد
و گليبي تحول عطاب

خاف تأخرت اعله الموعد؟
خاف وخاف ابلايا اسباب

عاينت اعله الساعة البيدي
وبس رويه الساعه مخليها

مااعرف وكتي وطلعتها
چا انشد ياهوه اعليها

وافرك بچفوفي من الحيرة
واتذكر چفي ابلا چف

وفجئة المح طرف اعبايتها
و فز دلال العين و رف

عدت من سدي وفرحانه
وتكابر جدامي اعناد

باسن خد چفيها اچفوفي
وعن لا طول شردت غاد.!

مابين رجفاتي بسدها
حاولت شكد و مافاد

انه الصل ربعي يسموني
يمها الحيل اخويط وباد

وتمشينا

تمشينا ونيتها المعهد
وانـه ابلا نية املاحكها

و تتلبد عن عين الوادم
حدثة وبت ابيوت وحگها

وسرنه ودرب الجان شطوله
شو صار اتذكر شبرين

وضلينه بسكتتنه نسولف
ياهوَّه اليبدي إمتانين

وما اچذب اعليكم سولفنه
لچن بس باللسان العين

و واحدنه يعاين للـ آخر
خجلانين و محد بادر

حدما وصلت يم معهدها
والتمت وادم بالشارع

دنگت عيوني بساعتها
وضل دلالي اعليها يباوع

راحت ماگلتلها اعشگها
ونار وچن شبت بچلاي

ذبيت اللوم اعله گليبي
چا المن جبتك وياي؟

رديت وگايد صفناتي
وصدري محمل ضيم هواي

وعيني المطرت مدري الدنيا
بس اذكر خدي اعليه ماي

رقية الحاج

تسألني أحبك أي نعـم

هذا السؤال المن صدگ

تعرف جوابه وأكـثر

چي حبتك روحي وعلي
إعله الدنيا گمت أنه أنغر

إنتَ الأمـان الما شفت
مثلك جميـل أمعتبر

يابس زرع روحي گبل
بس هسه يمك خَـضَّـر

يا التمشي بالدم والنفس
يالحاسبك چن أبـهـر

أمير الخفاجي

https://www.instagram.com/reel/DAOhbLQorvK/?igsh=MTFkYnNueGdjemF4eA==



مقطـع ريلز انستگرامي ❤️

انتِ وحدج دنيا مرسومه أعله گدي
وانه من لّمن عرفتج عمري يبدي

وخدج الابيض مثل رايةةة سلام
وضحكتج بهجة صباحي

من اشوفج اخ لو تدرين گلبي
إيغني ويسولف الروحي
هاي هي اليمها أحسّن بأرتياحي

وعيني فرحتها شككككككبرها
رغم ما انتي بعيده بنصها بيتج

انه بإسمج كاتب البيت من اساسه
بايع الدنيا وأجيتج


والتعب لّمن لفاني طلّعت صوره الحضرتج
وباوع أگليبي عليها وعيني غاااااارت

ولامست خدج لـَمن بيدي أمسحتها
وروحي چن فراشة طارت

انتِ ذيج الـ ربي كاتبها اليه
هذا چان أحساسي من أمي أستخارت

وبيش أوصفج وانتِ ماي

وبيج كل طعم الحياة
وللممات وياچ حـدي

يمج الضحكه أعرفتها و ورّد أگليبي ويـَ خدي



أمير الخفاجي

وإذا دفـنـوني

أسـولف بيك للميتين

وأگلهُـم هذا أعـز ناسي

❤️🧿