group-telegram.com/RwayatSudan/42560
Last Update:
#ثمن_الإختيار❤️
حلقة 2
"ولكنّنا نعتاد في النهاية، لا أعرف إذا كان هذا أسوأ ما يحدث أو أفضله.))
قبل ما أرد لقيت إني إتحظرت كُنت عايز أتصل بس لقيت الزمن بدري وما بتكون صِحت .. رُغم إني إتعودت على تصرفات أنهار المتهورة دي بس لازم أبرر ليها إني أمس ما قفلت التلفون مع إنها عارفة ظروفي والمشاكل المارة بي بس مُصرة تضغط علي وأنا كُل مرة بلقى نفسي بعتذر وبحنس وصلت معاها درجة تحظرني؟
ياخي من أنهار مُتعبة مُتعبة شديد بس مشكلتي بحبها وما قادر بدون تعبا دا.
طلعت من غرفتي ومحتار ما عارف أعمل شنو مدخل يديني في جيبي وماشي فيني يأس الدنيا كلو سمعت أبوي بنده عليّ:
_تعال يا عمرو.
= مشيت عليهو وحاولت أبين إني كويس قلت ليو:
صباح الخير يا غالي.
_صباح النور تعال أقعد جنبي هنا ..
=إتوترت اول ما قال لي كدا معناه عندو كلام مهم عايز يقولو لي الله يستر
"مشيت قعدت جنبه وفضلت مستنيه يتكلم"
_امك قالت لي بالكلام القالو ولد عمك وأصلًا مرت عمك ليها كم يوم بتجيب سيرة الموضوع بي فوق بس نحن ما فهمناها إنت كيف تدس مننا موضوع زي دا؟
=بصراحة ما كُنت قادر أستوعب إنو عامر عمل كدا وكل يوم كُنت بسألو وبديه فرصة عسى ولعل يجي يشرح لي بس يلا عادي.
_لا ما عادي أخوك دا أخد حقك وتعبك وجاي تقول لي عادي الكلام دا قولو لـ أمك وأختك ما لي .. ما كفاية إحساس الذنب الـ مُلازمني كل ما أتذكر البيحصل معاك والبتعملو .. رجعتك وش الفجر وإنت الليل كلو شغال وأنا هنا راقد .. شغلك النهار كلو وأنا من مكاني ما قادر أتحرك.
=مش زمان قلت إني ضهرك وإني عكازك البتتسند عليه أسي الـ إتغير شنو ولا بقينا ما قدر المقام يا حاج؟
مريم جات قاطعتهم: شنو لكن ونسة خصوصية بين الولد وأبوه ولا كيف؟
عمرو: إييك إنتِ عايشة معانا بالله؟لي كم يوم ما شُفتك؟
مريم: ما إنت لو مهتم كان شُفتني وسألت عني ولا بالغلط ساي ما قلت عندي أخت أشوفا حية ولا ميتة حُبك إتغير شديد يا عمرو أسي جيت أشكيك لـ أبوي.
محمد"أبوهم": معقولة يا مريومة أسي عمرو دا بلقوا فيهو فرقة لما يشكوهو؟
مريم: أنا أصلًا كُنت حاسة إنكم ما بتحبوني شايفة يا أمي أبوي ما برضى في ولدو دا خالص.
سُعاد"أمهم": عمرو ود السرور والخاطر المجبور ولا كلمة ما فوقو عاد أريتو ولادة الحريم ويعقرن عليه.
محمد: تعالي كدي أقعدي جنبي هنا وقولي طلباتك.
عمرو: أي تعالي يا غيورة يا مدلعة يا دراما كوين.
مريم : أنننننننن أسي منو الغيران من التاني؟
محمد : قولي عايزة شنو؟
مريم : عمرو سجل عندك. ..
1/قروش التخريج.
2/تلاتة فساتين.
3/ حق المكياج والترحال.
4/حق شيتات أخر سمستر ما أديتني شُفت لما أقول ليك ما شغال بي دي ما دراما مني.
عمرو : شوفيهم كلهم بكلفوا كم ووريني تاني عندك أي طلبات؟
مريم : قول لي بحبك عشان ما أحس حبك إتغير.
عمرو : ضروري يعني؟
مريم : شايف يا أبوي كلكم بقيتوا ما بتحبوني وخلي أمشي الجامعة نفسياتي تعبانة كدا وما أعرف أنتبه للمحاضرات وما أجي البروف المرة دي و..
محمد وسعاد كانوا ساكتين وهم الدنيا كلو في قلبهم سرحانين فيهم وهم بتناقروا كدا وزاد عليهم هم بعد كلام مريم عن مصاريف التخريج وطلباتا الزايدة دي..))
عمرو: طيب بريدك والله يا مريم وإنتِ عارفة كويس ما عندي غيرك يلا أمشي عشان ما تتأخري وركزي كويس في قرايتك ما تنشغلي بأي حاجة أوكيه؟
جات حضنته وسلمت لي أبوها باسته في راسو ودعت أمها وطلعت.
دي أسرة عمرو الصغيرة وكل حاجة حلوة في حياته ♡
بيتهم بسيط وعادي مبني بطوب أحمر عليه أسمنت وجير لونه رمادي .. غُرفتين وبرندة وبرة مظلة كبيرة وصالون رجال ومطبخ وشجرة نيم تحتها مزيرة.
أبوه كبير في العمر وعندو إعاقة في رجله مؤخرًا منعته الحركة من غير الكرسي وأمه مرة مثابرة ربتهم بتعبا كانت بتبيع كسرة وزلابية وبتعمل "مقشات وبروش سعف" لحدي ما عمرو إتخرج من كُلية مُحاسبة ومسك شغل قال ليها تاني ما في داعي تشتغل هو حيصرفهم.
مريم أخته الصغيرة فرق العمر بينهم 5سنوات هي خريجة إلا سمستر.
عايشين حياة بسيطة وحلوة رغم المشاكل والضغوطات البتواجهم.
بعد مريم طلعت .. أبوه قال ليه:
_أعفي لي يا ولدي.
=يا حاج ما تشيل هم أذمة وحتعدي زي غيرا كتير.
أمه قالت ليه:
_ما كلمنا مريم خايفين تتأثر وما تقرا كويس عشان كدا بس أنا ح..
= لالا يا أمي ما ح تكلمي مريم بي أي حاجة وأنا حأعمل ليها أحسن تخريج هي تستاهل دايمًا رافعة راسنا ومُشرفانا ما ح خليها تعمل زي وما تتخرج.
=بس يا عمرو الشي دا تكاليفه نحن ما قدرها.
_بتتسهل بإذن الله أسي شوفي لينا فطور عايز أفطر مع أبوي دا الليلة وبعدها طالع عندي شغل.
=خضرة عليك محل ما تقبل يا ولدي.
دخلت المطبخ جابت ليهم صينية الفطور وقعدوا ياكلو سوا ..!
"في بيتنا دفءٌ، ورائحة كعكٌ وخبز،
وبه أهلٌ وكتبٌ وعافية وسِتر وقهوة وحب.
نحنُ بخير مازل بيتنا بخير ..
فلا يُمكن للمرءِ أَن يجد مأوىً أهدأ وأكثر سكونًا من بيته))
____
"في المستشفى"
BY رِوايات سُودانية🪐🤎!)"
Warning: Undefined variable $i in /var/www/group-telegram/post.php on line 260
Share with your friend now:
group-telegram.com/RwayatSudan/42560