مبادرة مكتبة العلم الأبيض هي مبادرة لإنشاء مكتبات عامة في جميع مدن السودان عن طريقة مشاركة الجميع ومساهمتهم بالتبرع بكتاب واحد ، وجمع الكتب المتنوعة وجمع التبرعات المالية لانشاء المكتبات وشراء كتب قيمة وهادفة تخدم جميع الأعمار ، تركز المبادرة على تشجيع طلاب مرحلتي الأساس والثانوي على القراءة والإطلاع بمشاركتهم في المكتبة بعضوية مجانية ودائمة لدخول المكتبة في اي زمن والاستفادة من الكتب ونشر الوعي والمعرفة بأهمية القراءة ودورها العظيم في بناء الشخصية والأمم ونهضة وتطور العقول والبلدان .
إنطلاقة المبادرة ستكون من مدينة الأبيض عروس الرمال وبعدها باذن الله ستتوجه المبادرة الى مناطق أخرى من السودان الحبيب .

لكل الشعب السوداني الجميل ، محتاجة وقفتكم معاي أولا بالشير وتعميم فكرة البوست

كلنا متذكرين وما ح ننسى شهداء ثورتنا الكرام من طلاب مدارس الأساس والثانوي والجامعات ، متذكرين مجزرة الأبيض الأليمة 29 يوليو ، متذكرين قميص الطالب الأبيض الملطخ بالدم ، تمجيدا وتخليدا لأرواح شهدائنا الطلاب الطاهرة ، فكرت في مبادرة تهتم بتشجيع طلاب الأساس والثانوي على القراءة والإطلاع ، المبادرة ح تكون مكتبة عامة للقراءة 70% من اهتمام المكتبة ح يكون لطلاب الاساس والثانوي و 30% للفئات الأخري يعني لو المكتبة فيها 100 كرسي 70 كرسي أولوية للطلاب بعضوية مجانية ثابتة ، المبادرة ح تكون بأسم #مبادرة_مكتبة_العلم_الأبيض ، ايوااا العَلَم الأبيض هو رمز لقميص الطالب الاترفع في مجزرة الأبيض ، الأبيض لون السلام والنقاء والطمأنينة .
طيب واحدة واحدة تابعوا معاي :-
∆ اسم المبادرة :-
مبادرة مكتبة العلم الأبيض .
∆ أهداف المبادرة :-
_ تحفيز وتشجيع الطلاب من مرحلة الاساس والثانوي علي القراءة ، قراءة كتب مختلفة بتوجيه من الأسرة والمجتمع في المدرسة ، وخارج المدرسة ، دي رسالتنا ومسؤوليتنا نحن لازم نبني جيل قارىء واعي يقدر يتحدى الصعوبات وينهض ببلدنا بصورة سليمة وخطى ثابتة ، من عمر الروضة لازم نغرس في صغارنا روح القراءة والتفكر في عالم الكتب والمعرفة والنبوغ .
∆ المناطق المستهدفة :-
المبادرة مستهدفة كل السودان #مكتبة_العلم_الأبيض ح تكونوا باذن الله تعالى في كل مدن السودان لكن #ضربة_البداية ح تكون من #ولاية_كردفان من #عروس_الرمال مدينة #الأبيض .
∆ خطوات تنفيذ المبادرة :-
1 _ نشر فكرة المبادرة على أوسع نطاق بشير للبوست ولايك ودعوة لصفحة المبادرة المرفق رابطها نهاية البوست .
2_ تعميم الفكرة على المجتمع ( البيت ، المدرسة ، الشارع ) .
3_ محتاجين نجمع أكبر عدد من الكتب ، مطلوب أي زول وصلتو فكرة المبادرة يتبرع لينا بأي كتاب يكون بحالة جيدة .
4 _ بعد يومين ح نعمل أرقام لجمع التبرعات المالية عن طريق تحويل الرصيد ان شاء الله تحول جنيه جنيهين المهم تساهم معانا عشان #نبنيهو ، التبرعات المالية ح تكون لانشاء المكتبة ومتطلباتها من ملكية المكان بمدينة الأبيض والتجهيزات الداخلية للمكتبة + ح نشتري كتب متنوعة وهادفة تخدم الطلاب بمختلف اعمارهم في مرحلتي الأساس والثانوي .
5 - محتاجة لشباب يساعدوني في جمع الكتب من الولايات ، أي زول شايف انو قادر يطوع ويجمع كتب من منطقته ويرسلها لي يراسلني على خاص الصفحة للتنسيق .
6_ زمن تنفيذ فكرة المبادرة حتى الأن مفتوح ، أنا أملي كبير في ربنا وفي الخير الموجود في بلدي بلد الكرم والقيم ، أملي كبير في سواعد الشباب وهمة الكبار و الأمل الشامخ في عيون الصغار ، كتحدي مبدئيا كده ان شاء الله ان شاء الله المكتبة تتفتح في بدايات 2020 بس ايدكم معاي والإيد الواحدة ما بتصفق و #حنبنيهو ، ونبني المكتبة و مكتبات كتيرة في كل السودان .

مبادرة مكتبة العلم الأبيض مبادرتنا كلنا عشان جيلنا يكون ناضج فكريا ومتقدم

اخيرا شير للبوست
تاق لأي زول ممكن يساعد في المبادرة ( تبرع كُتب ، تبرع مادي ، تطوع في المبادرة )
تاقات كتيرة لأهل الابيض #إنطلاقة المكتبة ح تكون من الأبيض تاق لشباب الأبيض

إقرا
ثم إقرا
لنرتقي
لنعي أن النور أتٍ بالقراءة والإطلاع
لندرك أن النجاة والنهضة بالقراءة
القراءة أسلوب حياة وغذاء للعقول ومصباح يضيء الكون بالأخلاق والجمال والحكمة .

#نوادر_ابراهيم

القراءة ثم القراءة
#مبادرة_مكتبة_العلم_الأبيض
هي مبادرة انشاء مكتبات عامة تهتم بتشجيع طلاب مرحلتي الأساس والثانوي علي القراءة وتنمية العقول وتزوديها بالمعرفة بشتى مجالاتها ، يعني عندكم طلاب في البيت شجعوهم يمشوا المكتبة يقروا كتب متنوعة في اوقات الفراغ والجمعة والاجازة ، شجعوهم على الاطلاع ، خلوهم يفهموا من بدري انو المعرفة والوعي ما بجي بالساهل والمناهج الدراسية ما كافية لمواجهة الصعوبات والعراقيل الموجودة في الحياة ، ابدا انت من بيتكم ، من الحي ، من الشارع ، انشر الفكرة ، و وعي الأسر باهمية القراءة لجيلنا والأجيال الجاية
#مكتبة_العلم_الأبيض
ح نبداها ان شاء الله من عروس الرمال #مدينة_الأبيض
ساهم معانا
ساعدنا
أولا بنشر الفكرة وشير للصفحة
جهز كتاب كتابين من عندك واتبرع بيهم للمبادرة
ح يكونوا عندنا ارقام لجمع التبرعات المالية عن طريقة تحويل الرصيد
+ اذا شايف انك قادر تساعدنا بأي حاجة تانية مرحب بيك على خاص الصفحة
محتاجين متطوعين لانجاح المبادرة ، متطوعين لجمع الكتب من كل مناطق السودان
همتكم معاي عشان نبنيهو وننهض وقداااام وقدااااام ✌🏼✌🏼✌🏼✌🏼✌🏼

.
#العلم_الأبيض
رمز لقميص الطالب الاترفع في مجزرة ثانويات الأبيض
الأبيض لون طرحة كنداكاتنا الطالبات
الأبيض ثوب المعلمة العظيمة
الأبيض طباشير السبورة الكلنا اتعلمنا بيهو
الأبيض لون الورق الدفاتر والكتب
الأبيض لون السلام

يلااااا همتكم معاي عشان العلم الأبيض #ينتصر و#سينتصر باذن الله تعالى ✌🏼✌🏼✌🏼✌🏼

سلام عليكم
اذا انت شغوف بالعمل الطوعي وخدمة المجتمع وتقديم الدعم ل #مبادرة_مكتبة_العلم_الأبيض
أو بتعرف شخص مستعد يتطوع معانا في المبادرة
ده رابط الاستمارة للتطوع والإنضمام لمبادرة مكتبة العلم الأبيض

التي ستكون انطلاقتها من مدينة #الأبيض الساحرة
https://docs.google.com/forms/d/e/1FAIpQLScxxRmijTzLTyai2fd1zcxmPBe0dHBFmJGLE3TEokVsMiy4Iw/viewform?usp=sf_link

شير + لايك للبوست ودعوة لكل الاصدقاء لدعم الصفحة وانجاح حلم المبادرة
#تطوع
#تبرع
#العلم_الأبيض عشان طلاب بلادي
عشان وعي الأجيال
عشان نشر الوعي والمعرفة
عشان #شهدائنا الكرام ✌🏼✌🏼✌🏼
و قداااام
قداااام
ايدكم على ايدي عشان #نبنيهو وطن قارىء وجيل متفكر واعي وكفاءة في كل المجالات
#مدنيااااااو