" ኦነግ የሚቆም ትግል አልጀመረም ፤ የተቋቋመበትን አላማ ከግብ ሳያደርስ አያቆመም " - አቶ ዳውድ ኢብሳ

የኦሮሞ ነፃነት ግንባር (ኦነግ ) ከ5 ዓመታት ቆይታ በኃላ በአዲስ አበባ የሚገኘውን ጽ/ቤት ዳግም መክፈቱን ተከትሎ ይፋዊ ፕሮግራም በጽ/ቤቱ አካሂዷል።

በወቅቱ መስሪያ ቤቱ ሊዘጋ የቻለው በኦነግ አመራሮች መካከል አለመግባባት በመፈጠሩ ነበር።

ዛሬ በተካሄደው በዚህ የመክፈቻ መርኃግብር ላይ የፖርቲው ሊቀ-መንበር የሆኑት አቶ ዳውድ ኢብሳ ባደረጉት ንግግር " ኦነግ የሚቆም ትግል አልጀመረም፥ የተቋቋመበትን አላማ ከግብ ሳያደርስ አያቆመም " ሲሉ ተናግረዋል።

አቶ ዳውድ በንግግራቸው ኦሮሞ ያካሄደውን ትግል ወደኋላ በመመለስ ያስታወሱ ሲሆን፥ ከሜጫ እና ቱለማ ማኅበር ምስረታ ጀምሮ እስከ ዛሬ ያለው እንቅስቃሴ በሰላም ለሚደረገው ትግል እድል ካለመስጠት የመነጨ መሆኑን ገልጸዋል።

አክለውም ከጓደኞቻቸው ጋር ያለፉበትን ውጣ ውረዶች በመስታወስ " የሚቆም ትግል አልጀመርንም " ያሉ ሲሆን በሰላም መንገድ የመታገል ዕድሉ መስፋት አለበት ሲሉ ጥያቄ አቅርበዋል።

ሊቀመንበሩ ፥ ላለፈው ምርጫ በሚደረግ እንቅስቃሴ አሁን የተመለሰላቸውን ጨምሮ  በሌሎች አከባቢዎች ያሉ ቢሮዎቻቸውም እንደተዘጋባቸው አባላቶቻቸው ለእስርና ለእንግልት እንደተጋለጡ በማስታወስ በኋላ ላይም በፓርቲው መሪዎች መካከል የተፈጠረው አለመግባባት ከምርጫው እንዳሶጣቸው ነው የገለጹት።

በነበሩት ጊዜያት ፓርቲያቸው ከኃላፊዎች እስከ አባላት ድረስ ብዙ ስቃይ እንደደረሰባቸው ገልጸዋል ፤ በዚሁ መንገድ ህወታቸውን ያጡ የመኖራቸውንም አመልክተዋል።

እዚህ ላይ አቶ በቴ ኡርጌሳን በማንሳት ተናግረዋል።

አቶ ዳውድ " እስካሁን ድረስ ባልታወቀ አካል ተገድሏል (አቶ በቴ ኡርጌሳ) ፤ በህይወት ባለ ጊዜ ባደረገው ትግል ብዙ ነገር አድርጎልናል " በማለት አመስግነዋል።

አቶ ዳውድ፥ መንግስት በሰላም መንገድ ለሚደረገው ትግል እድል እንዲሰጥ ጥሪ አቅርበዋል።

በተጨማሪም ፥ ዋና መስሪያ ቤታቸውን ለማስመለስ ትልቅ ትግል እንደነበር በማንሳት፣ በዚህ ትግል ውስጥ የኢትዮጵያ ምርጫ ቦርድ እና ተቃዋሚ ፓርቲዎች ትልቁን ድርሻ እንደተወጡ ተናግረዋል።

ሌሎች ሳይመለስላቸው የቀሩትን የተቋሙ መስሪያ ቤቶች እንዲመለስላቸው በመጠየቅ ሂደት ላይ መሆናቸውን ገልጸዋል።

አቶ ዳውድ ኢብሳ ፥ የብሔራዊ ምክክሩን በተመለከት ሁሉን አቀፍ ሀገራዊ ምክክር አስፈላጊ መሆኑን በመጠቆም አሳታፊ ውይይትና ፍትህ የተሞላበት እንዲሆን እየጠየቁ እንደነበርና ያ ሳይሆን ሲቀር መሳተፍ እንደተዉ ተናግረዋል።

#OLF #BBCAfaanOromoo

@tikvahethiopia

" አሁንም የፓርቲው ምክትል ሊቀመንበር እኔ ነኝ " - ራሔል ባፌ (ዶ/ር)

በትናንትናው ዕለት፣ ሰኔ 14 ቀን 2017 ዓ.ም፣ በተለያዩ የማህበራዊ ትስስር ገፆች ሲዘዋወር የነበረው፣ የኢትዮጵያ ሶሻል ዴሞክራቲክ ፓርቲን የሚመለከተው መግለጫ ሐሰተኛ መሆኑን፣ ፓርቲውን በምክትል ሊቀመንበርነት የሚመሩት ራሔል ባፌ (ዶ/ር) አስታወቁ፡፡

" የፓርቲው ስራ አስፈፃሚ ኮሚቴ፣ ምክትል ሊቀመንበሯን ከኃላፊነት አገደ " በሚል የተሰራጨው መግለጫ፣ ከስራ አስፈፃሚ ኮሚቴ አባልነት በታገዱ ሰዎች በሐሰተኛ ማህተምና ቲተር ተዘጋጅቶ መለቀቁን ራሔል ባፌ (ዶ/ር) ለቲክቫህ ኢትዮጵያ በሰጡት ቃለመጠይቅ ገልፀዋል፡፡

ራሔል ባፌ (ዶ/ር) በዝርዝር ምን አሉ ?

" አሁን የሶዴፓ ምክትል ሊቀመንበር ነኝ፣ ሙሉ የሊቀመንበርነትን ስልጣን ይዤ ነው የምሰራው፡፡ በጠቅላላ ጉባኤያችን ሊቀመንበር እስክንመርጥ ድረስ ማለት ነው፡፡ የመተዳደሪያ ደንባችንም የሚለው ይህንን ነው፣ የማዕከላዊ ኮሚቴውም የሰጠኝ ስልጣን ይህ ነው፡፡

የፓርቲው ሊቀመንበር ፕሮፌሰር በየነ ጴጥሮስ ባለፈው መስከረም ወር ላይ ከዚህ አለም መለየታቸውን ተከትሎ በኢትዮጵያ ሶሻል ዲሞክራቲክ ፓርቲ/ሶዴፓ የስራ አስፈፃሚ አባላት መካከል አለመግባባት ተፈጥሯል፡፡

ይኸው አለመግባባት የሊቀመንበራችንን ህልፈት ተከትሎ፣ ባለፈው ጥር 4 ቀን 2017 ዓ.ም የተካሔደው የማዕከላዊ ኮሚቴ ስብሰባ እንዳይካሔድ፣ አራት የስራ አስፈፃሚ ኮሚቴ አባላት አሉታዊ እንቅስቃሴ አድርገዋል፡፡ ምርጫ ቦርድንም ስብሰባውን እንዲያግድ በደብዳቤ ጠይቀዋል፡፡

ለምርጫ ቦርድ ባስገቡት ደብዳቤ ላይ፣ ሌሎች ሁለት አባላትም አብረዋቸው እንደሆኑ በማስመሰል በአጠቃላይ ስድስት አባላት ሆነው የጥር 4ቱ የማዕከላዊ ኮሚቴ የስብሰባ ቀን እንዲራዘም መጠየቃቸውን በሐሰት ገልፀዋል ሰዎቹ፡፡

ሆኖም፣ ምርጫ ቦርድ ጉዳዩን በማየትና ለእኛም በማሳወቅ፣ 31 አባላት የሚሳተፉበትን የማዕከላዊ ኮሚቴውን ስብሰባ መከልከል እንደማይችል ገልፆላቸዋል፡፡ ለምርጫ ቦርድ ባስገቡት ደብዳቤ ላይ የሁለት ሰዎችን ስም በሐሰት በማስገባትና ፊርማቸውንም አስመስለው በመፈረም ለፈጠሩት ችግርም ለፖሊስ አመልክተን ክትትል ሲደረግባቸው ነበር፡፡

በዚህ አመት ባለፈው ጥር 4 ቀን 2017 ዓ.ም በወላይታ ሶዶ ከተማ በተካሔደ የማእከላዊ ኮሚቴ ስብሰባ፣ አራቱ ሰዎች በፈጠሩት ችግር ምክንያት ከስራ አስፈፃሚ ኮሚቴ አባልነት ታግደዋል፡፡

31 አባላት ያሉት ማዕከላዊ ኮሚቴው፣ ከ 10 ስራ አስፈፃሚ አባላት 4ቱን በማገድ፣ የፓርቲው ስራ በ6ቱ አባላት ብቻ እንዲከናወን፣ እንዲሁም ጉዳያቸው በሚቀጥለው የማዕከላዊ ኮሚቴ ስብሰባ ላይ የመጨረሻ ውሳኔ እንዲሰጠው ወስኗል፡፡

የሚቀጥለውን የማዕከላዊ ኮሚቴ ስብሰባ ለመጥራት በዝግጅት ላይ እያለን ነው አሁን ሐሰተኛ ማህተምና ቲተር በማስቀረፅ፣ የትናንትናውን ሐሰተኛ መግለጫ የለቀቁት፡፡

በመግለጫው ላይ እንደተጠቀሰው፣ ስራ አስፈፃሚ ኮሚቴው ምክትል ሊቀመንበሯን አግዷል ይላል፡፡ ስራ አስፈፃሚ እንዲህ ዓይነት ስልጣን አልተሰጠውም በመተዳደሪያ ደንባችን፡፡

ሐላፊዎችን መሾምና መሻር የሚችለው በትንሹ 500 አባላት የሚሳተፉበት ጠቅላላ ጉባኤው ነው፡፡ በመሐል ግን 31 አባላት ያሉት ማዕከላዊ ኮሚቴው ሐላፊዎችን የማገድ ስልጣን በውክልና ተሰጥቶታል፡፡ ግን የመጨረሻውን ውሳኔ በጠቅላላ ጉባኤ ነው አቅርቦ የሚያፀድቀው፡፡

ይህን ባደረጉት አባላት ላይ ህጋዊ እርምጃ እንዲወሰድ በነገው ዕለት ለፖሊስ እናመለክታለን፡፡ በቅርቡ አስቸኳይ የማዕከላዊ ኮሚቴ ስብሰባ ጠርተን በጎደሉት የስራ አስፈፃሚ አባላት ምትክ እናሟላለን፣ በታገዱት ሰዎች ጉዳይ ላይም የመጨረሻ ውሳኔ እንሰጣለን፡፡ "

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

#Ethiopia

" ኢትዮጵያ በሚቀጥለው መስከረም ወር ላይ የመጀመሪያ ዙር የጋዝ ምርት ለገቢያ ታቀርባለች " ሲሉ ጠቅላይ ሚኒስትር ዐብይ አሕመድ (ዶ/ር) ተናገሩ።

ጠቅላይ ሚኒስት ዐብይ አሕመድ (ዶ/ር) ይህንን ጉዳይ የተናገሩት ከሚዲያ እና ከኮሚኒኬሽን ባለሞያዎች ጋር ባደረጉት የውይይት መድረክ ነው።

" ላለፉት ዓመታት በዚህ ጉዳይ ምን ሲሰራ እንደነበር አታውቁም " ያሉት ጠቅላይ ሚኒስትሩ " ከነገርናችሁ ከውስጥም ከውጭም ጣጣው ስለሚበዛ ነው ዝም ብለን የሰራነው " ሲሉ ገልጸዋል።

ይህ ምርት የት አከባቢ እንደሆነ በቀጥታ ባይናገሩም በንግግራቸው ወቅት " ላለፉት ሁለት ሦስት ዓመታት እኔ የምጎበኘው ጋዙን ነው እናንተ የምታዩት ስንዴውን " ሲሉ ተናግረዋል።

" እስካሁን ያልነገርናችሁ በህዳሴ ላይ የከፈልነውን ዋጋ ከፍተኛ ስለሆነ ነው " ሲሉ ፕሮጀክቱ ላለፉት ዓመታት በተለያዩ መንገዶች በሚዲያው ከሚደርስበት ጫና ለመላቀቅ በዝምታ መስራታቸውን አስረድተዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

#Ethiopia

ኢትዮጵያ የማዳበሪያ ፋብሪካ ለመገንባት በቅርቡ ከናይጄሪያው ባለኃብት ዳንጎቴ ጋር እንደምትፈራረም ጠቅላይ ሚኒስትር ዐብይ አሕመድ (ዶ/ር) ተናግረዋል።

ጠቅላይ ሚኒስትሩ በፈረንጆቹ ሐምሌ ወር አጋማሽ የስምምነት ፊርማው እንደሚደረግ የገለጹ ሲሆን " በቀጣይ 3 ዓመታት ኢትዮጵያ ማዳበሪያ ይኖራታል " ሲሉ በንግግራቸው ጠቅሰዋል።

ይህ የአፈር ማዳበሪያ ፋብሪካ በጎዴ አከባቢ እንደሚገባ የጠቆሙት ጠቅላይ ሚኒስትር ዐብይ አሕመድ (ዶ/ር) የ3 ቢሊዮን ዶላር ኢንቨስትመንት መሆኑን መግለጻቸውን ቲክቫህ ኢትዮጵያ ሰምቷል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

" የ3 ዓመት ህጻንን ጨምሮ 9 ሰዎች ህይወታቸው አልፏል " - ፖሊስ

በአዲስ አበባ ከተማ አቃቂ ቃሊቲ ክፍለ ከተማ ወረዳ 3 በተለምዶ አባሳሙኤል ተብሎ በሚጠራው አካባቢ ዛሬ ረፋድ በግምት 3 ሰዓት ገደማ በደረሰ የትራፊክ አደጋ የ9 ሰዎች ሕይወት ማለፉን ፖሊስ አስታውቋል፡፡

ከሟቾቹ መካከል የ3 ዓመት ዕድሜ ያለው ሕጻን የሚገኝበት ሲሆን፤ በ8 ሰዎች ላይ ከባድ የአካል ጉዳት መድረሱን ፖሊስ ገልጿል።

አደጋው ሊከሰት የቻለው ከሃይሌ ጋርመንት ወደ ዩኒሳ አደባባይ ይጓዝ የነበረ የሰሌዳ ቁጥር ኮድ 3-78979 ኢት የሆነ የፐብሊክ ሰርቪስ ትራንስፖርት አገልግሎት ድርጅት አውቶቡስ የሰሌዳ ቁጥሩ ኮድ 3-04273 ኢት ከሆነ ሌላ ከባድ ተሽከርካሪ ጋር በመጋጨቱ እና መንገድ ስቶ ወደ ተቃራኒ አቅጣጫ በመግባቱ ነው፡፡

አውቶቡሱ ወደ ተቃራኒ አቅጣጫ ከገባ በኋላ ከዩኒሳ አደባባይ ወደ ሃይሌ ጋርመንት ሲጓዝ ከነበረ የሰሌዳ ቁጥሩ ኮድ 3-77970 ኦሮ ከሆነ ዶልፊን ተሽከርካሪ ጋር በመጋጨቱ በዶልፊኑ ውስጥ ከነበሩት ተሳፋሪዎች መካከል አሽከርካሪውን ጨምሮ የዘጠኝ ሰዎች ሕይወት ማለፉን ፖሊስ አስረድቷል።

ከሟቹቹ መካከል የ3 ዓመት ሕጻን ይገኝበታል።

በሌሎች 8 ሰዎች ላይ ደግሞ ከባድ የአካል ጉዳት ደርሷል።

ከዚህ በተጨማሪ በአካባቢው ላይ የቆመ እና በጉዞ ላይ የነበረ ሌሎች ሁለት ተሽከርካሪዎች በአውቶቡሱ ጉዳት ደርሶባቸዋል፡፡

የአደጋው መንስኤ እየተጣራ እንደሚገኝ ፖሊስ ገልጿል።

#AddisAbabaPolice

@tikvahethiopia